वासिंटन । अमेरिकी संसदबाट कोरोना विरुद्ध नयाँ आर्थिक प्याकेज पारित भएको छ ।

संसदको तल्लो सदन तल्लो सदन हाउस अफ रेप्रिजेन्टेटिभबाट ४ खर्ब ८४ अर्ब अमेरिकी डलर बराबरको राहत प्याकेज पारित भएको अमेरिकी संचार माध्यमले उल्लेख गरेका छन् ।

यो राहत साना ब्यापारी र अस्पताललाई लक्षित गर्दै ल्याइएको हो । यसले राहत र परीक्षणमा सहयोग पुग्ने अपेक्षा सरकारको रहेको छ । कोभिड १९ को संक्रमणबाट सबैभन्दा बढी प्रभावित मुलुक अमेरिका हो । यहाँ अहिलेसम्म ८ लाख ४७ हजार मानिस संक्रमित भइसकेका छन् ।

अमेरिकामा मृत्युसमेत धेरै भएको छ । यहाँ अहिलेसम्म ४९ हजार ८ सय जनाको मृत्यु भएको तथ्यांक रहेको छ । अमेरिकाले अघिल्लो महिना समेत राहत प्याकेज ल्याएको थियो ।

अघिल्लो महिना अहिलेसम्मको ठूलोे २० खर्ब डलरको राहत प्याकेज ल्याइएको थियो । अहिले साना ब्यापारी र अस्पतालका लागि राहत दिन प्याकेज ल्याइएको हो ।

कोरोनाले अमेरिकामा बेरोजगारी दर बढाएको छ । नयाँ प्याकेजअनुसार ३ खर्ब १० अर्बको कोष साना व्यापारी र ७५ अर्ब अमेरिकी डलर अस्पतालका लागि हो ।