काठमाडौं । लकडाउनको सफल कार्यान्वयनका कारण नेपालमा कोरोना संक्रमण नियन्त्रण भित्रै रहेको सरकारले विश्लेषण गरेको छ ।

उच्चस्तरीय समन्वय समितिले कोरोना भाइरस नियन्त्रणमा सरकारी प्रयास सही ट्र्याकमा रहेको निष्कर्ष निकालिएको हो ।

लकडाउनकै कारण संक्रमण फैलिन नपाएको सरकारको निष्कर्ष रहेको छ । यद्दपी शनिबार लकडाउनबारे समितिले कुनै निर्णय लिएन ।

मन्त्रीपरिषद् बैठकले यसबारेमा निर्णय लिने भएको छ । शनिबार सिंहदरबारमा बसेको बैठकमा लकडाउनलाई निरन्तरता दिनु पर्ने विषयमा भने एकमत रहेको बताइएको छ ।

प्रधानमन्त्री कार्यालयका सचिव नारायण विडारीले लकडाउनकै कारण संक्रमणलाई नियन्त्रणमा राख्न सफल भएको समन्वय समितिको निष्कर्ष रहेको उल्लेख गरे ।

उदयपुरको एउटा घटनाबाहेक अन्यत्र संक्रमित कम रहेको भन्दे उनले नेपाल सही ट्र्याकमा रहेको बताए । लकडाउनको अवस्थालाई छिमेकी मुलुकहरूको अवस्थालाई हेरी तय गरिने उनले बताए ।