काठमाडौं । नेपाल पर्यटन बोर्डले लकडाउनमा घर भित्रै बसेर पर्यटन प्रवद्र्धन गर्ने गज्जबको अभियान थालेको छ ।

यसै सिलसिलामा झ्याल भित्र बसेर त्यहाबाट देखिने सुन्दर तस्वीर पठाएर त्यसबाट उत्कृष्ट ५ तस्वीरलाई नगद पुरस्कार दिने गरी प्रतियोगिता थालेको छ ।

लकडाउनमा घर बसाइको समयलाई सिर्जनात्मक बनाउँदै आफ्नो ठाउँलाई प्रचार गर्ने उद्देश्यका साथ बोर्डले प्रतियोगिता आयोजना गरेको उल्लेख गरको छ ।

नेपालको कुनै ठाउँको प्राकृतिक सौन्दर्य, संस्कृति, पर्यटन गतिविधि, गाउँ घर वा अन्य सान्दर्भिक तस्बिरहरु अनलाइनबाट पठाउन सकिने भएको छ ।

प्रतियोगितामा भाग लिनेले फोटो नेपाल डट ट्राभलमा आफ्नो आफूले खिचेको फोटो इमेलबाटै पठाउन सकिने भएको छ ।

सहभागीहरुले आगामी जेठ १८ सम्म फोटो पठाइसक्नुपर्ने बोर्डको सूचनामा उल्लेख छ । सहभागीहरुमध्ये उत्कृष्ट पाँच फोटोले पुरस्कार पाउने भएको छन् ।

प्रत्येक फोटोको दश हजार रुपैयाँ पुरस्कार दिइने बोर्डले उल्लेख गरेको छ ।

नेपाल पर्यटन बोर्डले चार वर्षदेखि फोटोको माध्यमबाट देशको पर्यटन प्रवर्द्धन गर्ने उद्देश्यका साथ नियमित फोटो प्रदर्शनी गर्दै आएको छ ।

तर, लकडाउनका कारण फिल्डमा गर्ने फोटो प्रदर्शनी भने रोकिएको छ ।