स्वास्थ्य

कोरोना रोक्न गरिएको लकडाउन खुलाउन आयोजित आन्दोलनको नेतृत्वकर्ता नै कोरोना संक्रमित

न्युयोर्क अमेरिकामा कोरोना महामारी सुरु भएपछि अधिकांश राज्यमा 'स्टे होम अर्डर' जारी गरी सम्पूर्ण ब्यापार ब्यबसाय बन्द गरिए । लामो समय राज्यहरु बन्द गरेको भन्दै कतिपय राज्यहरुमा जनताहरु सांगठनिक हिसाबबाट स्थानीय सरकार बिरुद्ध प्रदर्शनमा उत्रिए ।राज्यको अर्थतन्त्र तत्काल खोल्न्नु पर्ने माग सहित आन्दोलनको नेत्रित्व गरेका मेरिल्यान्ड राज्यका एक ब्यक्ति स्वयम् कोरोना संक्रमित  भएका छन् । कोरोना संक्रमण फैलिन नदिन गरिएको लकडाउनलाई मेरिल्यान्ड राज्यमा खोल्नु पर्ने मागको नेतृत्वकर्ता टिम वाल्टरले गत हप्ता आफु कोरोना संक्रमित भएको सोसल मिडियाबाट सार्वजनिक गरेका छन् । उनले सोसल मिडियामा लेखेका छन्; "म हिजो कोभिड -१९ पोजेटिभ भएको पत्ता लाग्यो । महिनौंसम्म मास्क नलागाई आन्दोलनमा हिंडेको थिए । चर्चमा अनि यता उता हिंडेको थिए ।  कस्तो अचम्म यो कस्तो सनकी चिज रहेछ" । टिम वाल्टरले मेरिल्यान्ड गभर्नर ल्यारी होगनले राज्यलाई बन्द गरेर ठीक नगरेको भन्दै आन्दोलन गरेका थिए । वासिङ्टन पोष्टका अनुसार वाल्टरले उनिसँग संसर्गमा आएका मानिसहरुको नाम बताउन अस्विकार गरेका छन् ।   उनलाई बिगत एक महिनादेखि सुख्खा खोकी लागेको थियो तर त्यो खोकी पछि झन् झन् बढ्दै गयो । बिस्तारै टाउको पनि ज्यादै दुख्न र ज्वरो आउन थाल्यो साथमा एउटा आँखाले राम्रोसँग हेर्न पनि नस्क्ने भए पछि वाल्टर  अस्पतालको आकस्मिक कक्षमा गए । त्यसपछि कोभिड -१९ पोजेटिभ भएको पत्ता लागेको वाल्टरले सामाजिक संजालमा लेखेका छन् । ५३ बर्षीय वाल्टर मधुमेहका बिरामी हुन । उनलाई सामान्य स्ट्रोक पनि भै सकेको वासिङ्टन पोष्टले लेखेको छ ।  वाल्टरले शुक्रबार आफ्नो स्वास्थ अवस्था बारे जानकारी गराउँदै गरेको एक फेसबुक लाईभ भिडियोमा कतिपयले उनलाई आफुसँग प्रत्यक्ष संसर्गमा आएका मानिसहरुको नाम नबताएर स्वार्थी बनेको आरोप समेत लगाएका छन् । वाल्टर मेरिल्यान्ड राज्यको ब्यबस्थापिका संसदको सदश्यमा दुई पटक पराजित रिपब्लिकन पार्टीका उम्मेद्वार हुन् ।