यूएई । इन्डियन प्रिमियर लिग (आईपीएल) क्रिकेटको १३ औं संस्करणमा चेन्नई सुपर किग्ङ्स समुह चरणबाटै बाहिरिएको छ । साविक विजेता मुम्बई इन्डियन्ससँग १० विकेटको अन्तरले पराजित हुँदै चेन्नई समुह चरणबाटै बाहिरिएको हो ।
शुक्रबार राती सम्पन्न खेलमा मुम्बई भने शीर्ष स्थानमा उक्लिएको छ । आईपीएल इतिहासमा पहिलो पटक चेन्नई लिग चरणबाट नै बाहिरिएको हो । टस हारेर पहिले ब्याटिङ गरेको चेन्नाईले निर्धारित २० ओभरमा ९ विकेट गुमाएर मात्र ११४ रन बनायो ।
१ सय १५ रनको लक्ष्य मुम्बईले १२ ओभर २ बलमा विना विकेटको क्षतिमा भेटायो । जितपछि मुम्बईको १० खेलमा १४ अंक भएको छ । दिल्ली क्यापिटल्स र रोयल च्यालेन्जर्स बेङ्ग्लोरको समेत १४ अंक नै छ । तर रन रेटका आधारमा मुम्बई लिगको शीर्ष स्थानमा उक्लिएको हो ।
