काठमाडौं । आज बडादशैं, हिन्दु धर्मावलम्बीहरुले धुमधामसाथ मनाइरहेका छन् । आज सर्वसाधारणले मान्यजनबाट टिका ग्रहण गरी आर्शिवाद लिएर बडा दशैं मनाएका छन् । यस दिन प्रधानमन्त्री केपी शर्मा ओलीले राष्टपति विद्यादेवी भण्डारीको हातबाट टीका ग्रहण गरेका छन्।

शीतल निवासमा पुगेर प्रधानमन्त्री ओलीले टीका ग्रहण गरेका हुन्। राष्ट्रपति भण्डारीले भने आफ्नी आमा र गुरुको हातबाट टिका ग्रहण गरेकी छिन् । प्रधानमन्त्रीका पिता मोहन प्रसाद ओली भने गृहजिल्ला झापामै थिए । सोहीकारण उनले छोरालाई टिका लगाउन सकेनन् ।

विजयादशमीको १० औं दिन आज टिका ग्रहण गरेसँगै दशैंको मूख्य दिन सकिएको छ । कुनै समुदायले पूर्णिमासम्म टिका लगाउँछन् भने कुनै समुदाय र स्थानमा भने आज मात्र टिका लगाउने गरिन्छ ।