तमिलनाडु । दक्षिण भारतमा शक्तिशाली तुफान निवारका कारण जनजीवन प्रभावित भएको छ । दक्षिण भारतको तमिलनाडु र पोन्डीचेरीका विभिन्न स्थानमा भारी वर्षा र तीव्र गतिको हावासहित ‘निवार तुफान’ आएको छ ।

समुन्द्री तटका १ हजार घरपरिवारबाट हजारौं मानिसलाई सुरक्षित स्थानमा सारिएको र जलसेनाका ४० भन्दा बढी उद्धार समुह तयारी अवस्थामा रहेको भारतीय संचारमाध्यमले जनाएका छन् । तुफानका कारण सडक अवरुद्ध भएके छ ।

हवाई यातायात ठप्प छ । रुख ढल्दा भौतिक संरचनाहरुमा क्षति पुगेको छ । पछिल्लो केही घण्टायता भने तुफानको प्रभाव क्रमशः कमजोर बन्दै गएको बताइएको छ ।

तुफानको प्रभाव चेन्नई र महाबलीपुरमसम्म देखिएको छ । तुफान प्रतिघण्टा १ सय २० देखि १ सय ४५ किलोमिटरको दरले अघि बढिरहेको भारतीय संचारमाध्यमले लेखेका छन् ।