डायस्पोरा

ओमानमा आइतबारबाट खोप वितरण, आप्रवासी कामदारले समेत पाउने

ओमान । ओमानले आइतबारबाट कोरोना विरुद्धको खोप वितरण थाल्ने भएको छ । फाइजर र बायोएनटेक कम्पनीले निर्माण गरेको कोरोनाविरूद्धको खोप ओमान पुगेको छ । यस्तो खोप ओमानी नागरिकसहित आप्रवासी कामदारले समेत पाउने भएका छन् । यसबाट नेपाली नागरिक समेत लाभान्वित हुनेछन् ।

पहिलो ब्याच भ्याक्सिन डीएचल कार्गो विमानमार्फत ओमान लगिएको ओमानी स्वास्थ्य मन्त्रालयले जनाएको छ । पहिलो व्याचमा १५ हजार ६ सय डोज खोप ओमान पुगेको छ । ओमानी स्वास्थ्य मन्त्रालयका अनुसार ओमानले भाइरसविरूद्ध फाइजर र बायोएनटेकले निर्माण गरेको खोप खरिद गरेको हो ।

खोप वितरण अभियानको नेतृत्व स्वास्थ्य मन्त्री डा. अहमद बिन मोहम्मद अल सईदीले गर्ने कार्यक्रम रहेको छ । पहिलो चरणमा स्वास्थ्यकर्मी, दीर्घ रोगी, वृद्ध वृद्धाले खोप पाउने भएका छन् । ओमानले यहाँ रहेको कुल जनसंख्याको ६० प्रतिशतलाई खोप दिने तयारी गरेको छ ।