ओस्लो । नर्वेमा कोरोना भाइरस (कोभिड–१९) विरुद्धको खोप लगाएको २९ जनाको मृत्यु भएको अन्तर्राष्ट्रिय संचारमाध्यमले जनाएका छन् । फाइजरले बायोएनटेकसँग मिलेर बनाएको कोरोना खोप लगाएका २९ जनाको मृत्यु भइसकेको स्थानीय संचारमाध्यमलले उल्लेख गरेका छन् ।

खोपको साइड इफेक्टपछि उनीहरुको मृत्यु भएको बताइएको छ । त्यसो त शनिबारबाट शुरु भएको कोरोना खोप लगाएपछि भारतमा समेत सयौं व्यक्ति घाईते भएको र एक जनाको अवस्था गम्भीर रहेको समाचारमा जनाइएको छ ।

नर्वेमा भने मृत्यु हुने सबै ७५ वर्षभन्दा माथिका ज्येष्ठ नागरिक छन् । उनीहरु सबैलाई कोरोना खोपको पहिलो डोज दिइएको हो । मृत्यु हुने व्यक्तिमा यसअघि कै गम्भीर स्वास्थ्य समस्या रहेको जनाइएको छ । सबैजसो दीर्घरोगबाट पिडित थिए ।

तर, ठूलो संख्यामा खोपका कारण मानिसको ज्यान गएपछि अधिकारीहरु भने यसबारे चनाखो बनेका छन् । यो मुलुकले अहिलेसम्म ४२ हजार जनालाई खोप लगाइसकेको छ ।

नर्वेजियन मेडिसिन एजेन्सीका अनुसार अहिलेसम्म नर्वेमा फाइजरको कोरोना खोप मात्र लगाइएको छ । त्यसकारण २९ जनाकै मृत्यु फाइजरको कोरोना खोपसँग सम्बन्धित रहेको छ । नर्वेजियन मेडिसिन एजेन्सीले फाइजरको खोपबारे चिन्तित भने नरहेको उल्लेख गरेको छ ।