समाचार

सर्वोच्चको फैसलाको मुखमै प्रधानमन्त्रीले बोलाए सुरक्षा परिषद् बैठक

काठमाडौं । प्रधानमन्त्री केपी शर्मा ओलीले आज राष्ट्रिय सुरक्षा परिषद्को बैठक डाकेका छन् । बैठक मंगलबार बिहानका लागि बोलाइएको हो । संसद विघटनको मुद्दामा सर्वोच्च अदालतको फैसला आउने समय नजिकिएको समयमा उनले डोकेको बैठकलाई महत्वपूर्ण रुपमा हेरिएको छ ।

यसअघि प्रधानसेनापति र प्रधानन्यायाधिशबीच सोमबार सर्वोच्च अदालतमा भएको बैठकले समेत पुनः एक पटक राजनीतिक विवाद बढेको छ । आजको बैठकमा समसामयिक सुरक्षा विषय, देशमा विकसित पछिल्ला घटनाक्रम लगायत विषयमा छलफल हुने बताइए पनि मुल एजेण्डा सार्वजनिक भएको छैन ।

बैठकमा परराष्ट्रमन्त्री प्रदीप ज्ञवाली, अर्थमन्त्री विष्णुप्रसाद पौडेल, गृहमन्त्री रामबहादुर थापा र प्रधानसेनापति पूर्णचन्द्र थापासहितका मन्त्री समेत रहने छन् । प्रधानमन्त्रीको अध्यक्षतामा राष्ट्रिय सुरक्षा परिषद् रहन्छ । सदस्यमा रक्षामन्त्री, गृहमन्त्री, परराष्ट्रमन्त्री, अर्थमन्त्री, मुख्यसचिव र प्रधानसेनापति रहन्छन् । सुरक्षा परिषद्को बैठक सकिएपछि आज नै मन्त्रिपरिषदको बैठक समेत डाकिएको छ ।