काठमाडौं । बहराइनका राजपरिवारका सदस्य शेखमोहम्मद हमाद मोहम्मद अल खलिफासहितको टीमले वसन्त ऋतुमा सगरमाथा चढ्न अनुमति प्राप्त गरेको छ । पर्यटन विभागले यो टोलीका लागि आरोहण अनुमति जारी गरेको हो । यस सिजनका लागि अहिलेसम्म सगरमाथा चढ्न दुई समुहले अनुमति लिएका छन् ।

बहराइनबाट त्यहाँको डिफेन्स फोर्सका १६ जनाको टोली २ चैतमा नेपाल आएको हो । यो टोलीले यसअघि नै नेपालका दुई हिमाल चढिसकेको छ । बहराइनी आरोही समूह १६ जनाको भएकाले दुई समूह बनाएर अनुमति दिइएको छ । एक आरोही समूहमा बढीमा १५ सदस्य रहने प्रावधान अनुसार दुई समुह बनाइएको विभागले जनाएको छ ।

वसन्त ऋतुमा सगरमाथा चढ्न अहिलेसम्म ७ टोलीले अनुमति लिइसकेका छन् । सगरमाथा, अन्नपूर्ण, मनास्लु र नुप्से हिमालका लागि सात आरोही समूहका ६१ आरोहीले अनुमति पाएका हुन् ।