अमेरिका

बाल यौन दुराचारको आरोपमा पोखराबाट अमेरिकी नागरिक पक्राउ

पोखरा । बाल यौन दुराचारको आरोपमा पोखराबाट एक अमेरिकी नागरिक पक्राउ परेका छन्। केन्द्रीय अनुसन्धान ब्युरो (सिआइबी)का अनुसार मंगलबार अमेरिकाको क्यालिफोर्निया स्थायी घर भएका ६६ वर्षीय माइकल नोरम्यान टेलर पक्राउ परेका हुन् । उनलाई ब्युरोले पोखरा महानगरपालिका १८ सेदीस्थित विष्णु होमस्टेबाट पक्राउ गरेको प्रहरीले जनाएको छ ।

उनी यौन दुराचारको मनसायबाटै पटक पटक नेपाल आउने गरेको खुलेको हो । उनीविरुद्ध परेको गोप्य सूचनाका आधारमा प्रहरीले पच्छ्याएको थियो । उनी नेपालमा सन् २०१८, २०१९ र २०२१ गरी तीन पटकसम्म आएको खुलेको छ । पेशाले वकिल उनले सन् २०१९ मा मात्रै उनले तीन जना बालबालिकालाई बाल यौन दुराचार गरेको जाहेरी परेको थियो ।

सन् २०१९ मै उजुरी परेको र नेपाल आएको मौका पारेर प्रहरीले पक्राउ गरेको हो । उनको साथबाट ४ हजार ६ सय अमेरिकी डलर, एक थान ल्यापटप, दुई वटा आइफोन, पेनड्राइभ र पासपोर्ट बरामद भएको छ । थप अनुसन्धान भइरहेको प्रहरीले जनाएको छ ।