विज्ञान प्रविधि

चितवनमा गैंडा गणना टोलीमाथि ध्रुबे हात्तिको आक्रमण, पाँच जना घाइते

File Photo

चितवन । एक सिंगे गैंडा गणना गर्न चितवन राष्ट्रिय निकुञ्जमा खटिएको टोलीमाथि जंगली हात्ती ध्रुबेले आक्रमण गर्दा पाँच कर्मचारी घाइते भएका छन् । आक्रमणमा परी राष्ट्रिय प्रकृति संरक्षण कोषका संरक्षण अधिकृत विनोद श्रेष्ठ गम्भीर घाइते भएको निकुन्जले जनाएको छ ।

उनलाई उपचारका लागि साँझ हेलिकप्टरबाट काठमाडौं पठाइएको छ । गैंडा गणनामा खटिएको टोली शुक्रबार निकुञ्जको पश्चिम सेक्टरको गैंडाखासा भन्ने स्थानमा पुगेपछि धु्रबेको आक्रमणमा परेको थियो । ध्रुबे जंगली हात्ती हो । उसले निकै लामो समयदेखि चितवनमा दुःख दिइरहेको छ ।

ध्रुबेले २०६६, ६७, ६८ र ६९ सालमा गरी १३ जनाको ज्यान लिएको थियो। यो हात्तिलाई मार्ने सरकारको योजना रहेपनि ज्यान जोगाएर भाग्न सफल भएको थियो । आज जंगली हात्तिले आक्रमण गरेसँगै चितवन राष्ट्रिय निकुञ्जमा गैंडा गणना समेत तत्कालका लागि रोकिएको छ । चितवन राष्ट्रिय निकुञ्जमा चैत ९ गतेबाट एक सिंगे गैंडाको गणना थालिएको थियो ।