फिचर

एनआरएनएले कोभिड महामारीमा विश्वभर १ लाख ७० हजार नेपालीलाई दियो राहत

File Photo

काठमाडौं । गैरआवासीय नेपाली संघ (एनआरएनए)ले कोभिड १९ महामारीबाट समस्यामा परेका विश्वभरका १ लाख ७० हजार नेपालाीलाई राहत दिएको छ । समस्यामा परेका विभिन्न मुलुकका ती नेपालीलाई सहयोग गरेको संघले जनाएको छ । कोभिड १९ महामारीपछि संघको पहलमा भएका उद्धार तथा राहत विवरण सार्वजनिक गर्दै सघंले यस्तो जानकारी गराएको हो ।

५० देशका ३ सयभन्दा बढी शहरमा रहेका नेपालीलाई राहत वितरण गरिएको बताइएको छ । संघले समस्यामा परेका नेपाली श्रमिकमध्ये घरफिर्तीका लागि ३२४ जनाको पीसीआर परीक्षण तथा २१७ जनालाई आंशिक हवाई टिकटको समेत व्यवस्थापन गरेको समेत जानकारी गराएको छ ।

रोजगारी गुमाएका, सामान्य गल्तीका कारणले स्वदेश फर्कन बाध्य बनाइएका, महिला, अपाङ्गता भएका, बिरामी, विशेष आवश्यकता भएका व्यक्तिका लागि अन्तर्राष्ट्रिय निकायबाट प्राप्त सहयोग खर्चिएको संघले उल्लेख गरेको छ । संघले धेरै नेपाली श्रमिक भएका मलेसिया, कतार, संयुक्त अरब इमिरेट्स (युएई), साउदी अरब, बहराइन, कुवेत तथा ओमानलगायत मुलुकमा राहत र उद्धारको विशेष अभियान चलाएको थियो ।

आज सम्पन्न भर्चुअल पत्रकार सम्मेलनमा संघका अध्यक्ष कुमार पन्तले नेपाल सरकारसँगको सहकार्यमा खाना तथा बासको व्यवस्था, घरफिर्ती कार्यका लागि आंशिक हवाई टिकट तथा पीसीआर सेवा, मानसिक स्वास्थ्य परामर्श सेवा तथा स्वास्थ्य समस्यामा परेका नेपालीलाई सहयोग गरिएको उल्लेख गरेका छन् ।

संघका महासचिव डा. हेमराज शर्माले कोभिड १९ पछाडि देखिन सक्ने मानसिक स्वास्थ्यलाई विशेष ध्यानमा राखेर विश्वभर २०० बढी नेपाली चिकित्सक परिचालित गरिएको जानकारी दिए ।