काठमाडौं \एजेन्सी । नाइजेरियामा जेलमा आक्रमण गरी १८ सय भन्दा बढी कैदी भगाइएको छ । नाइजेरियाका दक्षिण पूर्वी सहर ओवेरीस्थित जेलको प्रशासनिक भवनमा आक्रमण गरि पृथकतावादी समुहले आफ्नो १८ सय ४५ जना कार्यकर्तालाई भगाउन सफल भएको अन्तर्राष्ट्रिय संचारमाध्यमले लेखेका छन् ।

बीबीसीका अनुसार सोमवार बिहान पीकअप ट्रक र बस चढी ठूलो हातहतियारसहित आएका आक्रमणकारीले जेलबाट कैदी भगाउन सफल भएका छन् । आक्रमणकारीहरुले रकेटबाट फ्याक्न सकिने ग्रेनेड, स्वचालित बन्दुक, बिस्फोटक पदार्थ र राइफल बोकेका थिए ।

अहिलेसम्म ६ जना कैदि भने जेल फर्किएका छन् । ३५ जनाले भने नभागी जेलमै बसेका थिए । यो घटनामा पृथक्तावादी समूह द इन्डीजीनीएस पीपल अफ बीयाफ्राको हात रहेको प्रहरीले जनाएको छ । यो समुह नाइजेरियामा प्रतिवन्धित छ । तर, समुहले प्रहरीको आरोपको खण्डन गरेको समेत बीबीसीले लेखेको छ ।