काठमाडौं । काठमाडौंसहित देशका विभिन्न स्थानमा प्रदुषण हट्दै आकास खुल्ने क्रम शुरु भएको छ । शुक्रबार साँझ हावाहुरीसहित भएको वर्षाका कारण समेत शनिबार वायु प्रदूषण हट्न थालेको हो ।

शुक्रबार देशका विभिन्न स्थानमा हावाहुरीसहित वर्षा भएको जल तथा मौसम विज्ञान विभागले जनाएको छ । वायु प्रदूषण मापन गर्ने इकाई अनुसार नेपालको एक्यूआई अहिले १५० भन्दा तल झरेको छ । यो अति हानिकारक अवस्था भन्दा सुधारिएको अवस्था हो । केही समय काठमाडौंको आकास विश्वकै सबैभन्दा प्रदुषित शहरका रुपमा रहेको थियो ।

शनिबार प्रदेश १ र देशको पहाडी भाग बाहेकका ठाउँहरुमा मौसम सफा रहेको मौसम पूर्वानुमान महाशाखाले जनाएको छ । प्रिमनसुन भएकाले आज पनि बेलुकीपख देशका पहाडी ठाउँहरुमा फाट्टफुट्ट पानी पर्न सक्ने भएको छ । शुक्रबार गण्डकी, वाग्मती र प्रदेश१ मा पानी परेको थियो ।

अहिले न्यूनचापीय मौसमी प्रणाली कमजोर बन्दै गएको र स्थानीय वायुको प्रभाव रहेकाले ठूलो पानी पर्ने सम्भावना भने कम रहेको महाशाखाको भनाई छ ।