राष्ट्रपति विद्यादेवी भण्डारीले शुक्रबार वितरण गरेका नक्मामा नेपालको पुरानो नक्सा प्रयोग भएको छ । सरकारले नयाँ नक्सा जारी गरी लिम्पुवाधुरा, लिपुलेक र कालापानीलाई नक्सामा समेटेको भएपनि सर्वोच्च संस्थाबाट वितरण गरिने अति सम्मानित तक्मामा भने पुरानै नक्साको प्रयोग भएपछि सरकारको नियतमाथि प्रश्न उठेको छ ।

तर, गृह मन्त्रालयले भने गत वर्ष नै तक्मा छापिएको र त्यति बेला नयाँ नक्सा नबनिसकेको भन्दै कुतर्क गरेको छ । नयाँ नक्सा सार्वजनिक गरेको एक वर्ष पुगिसकेको छ ।

यस अवधिसम्म पनि तक्मामा नयाँ नक्सा राख्न नसकेको सरकारले नक्सा अंकित नभएको विषयमा आएका प्रतिक्रिया र समाचारको विषयमा ध्यानाकर्षण भएको समेत जनाएको छ ।

संविधान दिवसको अवसरमा २०७६ साल असोजमा विभूषण घोषणा भएको हो । यी तक्मा २०७७ साल वैशाख एक गते वितरण गर्ने गर्ने कार्यक्रम थियो । तर, कोरोना भाइरसको महामारीका कारण तक्मा वितरण शुक्रबार मात्र भएको हो ।