नयाँ दिल्ली । नेपालको छिमेकी मुलुक भारतमा एकदिनमा अहिलेसम्मकै धेरै कोरोना संक्रमित भेटिएका छन् । भारतीय संचारमाध्यमका अनुसार पछिल्लो २४ घण्टाको परीक्षणबाट १ लाख ७० हजार मानिसमा कोरोना देखिएको छ । यो अहिलेसम्मकै उच्च संख्या हो ।

पछिल्ला दिनमा भारतमा कोरोना संक्रमणको गति तीव्र देखिएको छ । यो संक्रमण पहिलो वेवको तुलनाका बढी फैलावट भएको समेत पाइएको छ । आइतबार माहराष्ट्र राज्यमा मात्र ६३ हजार २ सय ९४ जना भेटिएका हुन् । नेपालको सीमा जोडिएको उत्तर प्रदेशमा १५ हजार २ सय ७६ जनामा संक्रमण देखिएको छ।

यसले नेपालमा समेत जोखिमको उच्च अवस्था रहेको पुष्टी गरेको छ । संक्रमणले गति लिएपछि मृत्युदरमा समेत उच्च वृद्धि भएको छ । आइतबार भारतमा ९ सय चार जना मानिसको कोरोनाका कारण ज्यान गएको तथ्यांक आएको छ ।

यो सँगै अहिलेसम्म भारतमा १ करोड ३५ लाख मानिसमा कोरोना संक्रमण भएको छ । १ लाख ७० हजार संक्रमितले ज्यान गुमाउन बाध्य भएका छन् । भारतले अहिलेसम्म १० करोड मानिसलाई खोप लगाइसकेको छ ।