काठमाडौं । कोभिड १९ का संक्रमितको संख्यामा भएको वृद्धिसँगै अब टेकुस्थित शुक्रराज ट्रपिकल तथा सरुवा रोग अस्पतालमा कोभिड सङ्क्रमितको मात्रै उपचार हुने भएको छ । यस अस्पतालबाट यसअघि भइरहेका सबै सेवा बन्द गरिएको छ । शुक्रराज ट्रपिकल तथा सरुवा रोग अस्पताल, टेकुका प्रमुख मेडिकल अधिकृत डा. शेरबहादुर पुनका अनुसार मंगलबारदेखि कोभिड उपचार सेवामात्र दिने गरी अन्य सेवा बन्द गरिएको हो ।

एचआइभी र एन्टी रेबिज भ्याक्सिन सेवा भने अस्पतालमा यथावत् रहनेछ । अस्पतालमा अहिले कोभिड सङ्क्रमित आउने क्रम बढेको छ । अहिले ललितपुरस्थित पाटन अस्पतालमा समेत कोरोनाको उपचार हुने गरेको छ । नेपालमा पछिल्लो एक सातायता कोरोना भाइरसका संक्रमितको संख्यामा वृद्धि भएको छ ।