समाचार

आजबाट नेपालमा चिनियाँ खोप लगाउन शुरु

काठमाडौं । नेपालमा आजबाट चीनले अनुदानमा दिएको खोप लगाउनु शुरु भएको छ । सरकारले विभिन्न उमेर समूह तोकेर सोही अनुसार खोप लगाउन थालेको हो । स्वास्थ्य सेवा विभागका अनुसार सात वटै प्रदेशमा खोप लगाइने छ । चीनको सीमाना जोडिएका जिल्लामा १८ वर्षमाथिका मानिसहरुले यो खोप पाउने छन् ।

सबै हिमाली जिल्लामा भने ५५ वर्षदेखि ५९ वर्षबीचका पहिलो डोज लगाउन बाँकी व्यक्तिले यो खोप लगाउन पाउने छन् । अन्य जिल्लाको हकमा भने ६२–६४ वर्ष उमेर समूहले मात्र खोप पाउने छन् । आवश्यकता र उपलब्ध भएसम्म ६० देखि ६४ वर्ष उमेर समूहका ज्येष्ठ नागरिकले समेत खोप पाउने छन् ।

काठमाडौं उपत्यकामा ६२ देखि ६४ वर्ष उमेर समूहलाई प्राथमिकता दिन भनिएको छ । सम्बन्धित स्थानीय तहले तोकेको स्थानमा गएर खोप लगाउन सकिने छ । खोप लगाउने समयमा सरकारले उपलब्ध गराएको फोटोसहितको परिचय पत्र साथमा हुनुपर्छ । चीनले १० लाख डोज खोप अनुदानमा दिएको थियो । सोही खोप नेपालमा लगाउन शुरु भएको हो । ५ लाख मानिसले यो खोप पाउने छन् ।