काठमाडौं । काठमाडौं उपत्यकामा एक साता निषेधाज्ञा लम्बिएको छ । तर, यो बीचमा साविकको तुलनामा निषेधाज्ञा खुकुलो भने गराइएको छ । अब नेपालस्थित विदेशी कुटनीतिक नियोगका कार्यालय र दूतावासमा जानेहरुलाई बाटोमा प्रहरीले अवरोध गर्ने छैन ।

आइतबार बसेको उपत्यकाका तीन जिल्लाका प्रजिअहरुको वैठकले विदेशमा अध्ययन गर्न र डिभी लोटरी विजेतालाई अन्तर्वार्ताको लागि दुतावास सम्म जान सहजीकरण गर्ने निर्णय गरेको छ ।

नेपाल सरकारकाबाट जारी स्वास्थ्यका मापदण्ड परिपालना गरी कुटनीतिक नियोगले आवश्यक अन्तर्वार्ता लिन सक्नेछन् । काठमाडौं स्थित अमेरिकी दूतावासले डिभी विजेताहरुलाई भिसा जारी गरेको छैन । सोहीकारण सन् २०२१ मा डिभी विजेता नेपालीले अन्तर्वार्ता समेत दिन पाएका छैनन् । डिभी विजेताको २०२१ को म्याद तीन महिना बाँकी छ ।

बिजेताहरुले आगामी सेप्टेम्बर अन्त्यसम्म भिसा पाइसक्नुपर्छ । नभए स्वतः खारेज हुन्छ । यो वर्ष ३८०१ जना नेपालीले डिभी लोटरी पाएका छन् । तर, निषेधाज्ञाको समयमा एउटा पनि भिसा जारी भएको छैन । जसले गर्दा नेपालीमा चिन्ता बढेको छ ।