समाचार

चितवनमा नहरमा डुबेर दुई किशोरको ज्यान गयो

भरतपुर । चितवनमा नहरमा डुबेर दुई जना किशोरको ज्यान गएको छ । प्रहरीका अनुसार बुधबार दिउँसो भरतपुर महानगरपालिका–२ क्षेत्रपुरस्थित नहरमा डुबेर स्थानीय १६ वर्षीय अंकित जोशी र १४ वर्षीय विवेक शर्माको मृत्यु भएको हो । उनीहरु स्थानीय चौरमा क्रिकेट खेलेर सफा हुन नहर पुगेका थिए । त्यसक्रममा विवेक शर्मा चिप्लिएर नहरमा खसेका थिए। प्रहरीका अनुसार उनलाई बचाउने क्रममा अंकित समेत नहरमा डुबी बेपत्ता भएका थिए।

त्यसपछि स्थानीयले प्रहरीलाई खबर गरेका थिए । प्रहरीले डुबेको स्थानबाट २ सय मिटर पर नहरमा दुवै जनाको उद्धार गरेको थियो । उनीहरुलाई उपचारका लागि अस्पताल पठाइएको थियो । अस्पतालले तत्काल मृत घोषणा गरेको हो । बुधबार नै बाँकेमा समेत तीन किशोरको डुबेर ज्यान गएको थियो ।