अलास्का । अमेरिकाको अलास्कामा शक्तिशाली भूकम्प गएको छ । ८.२ रेक्टर स्केलको यो भूकम्प पछिल्लो ५० वर्षयताकै शक्तिशाली मानिएको छ । अलास्काको समुद्री क्षेत्रमा गएको भूकम्पको क्षतिको विवरण भने संकलनको क्रममा रहेको बताइएको छ । सीएनएनका अनुसार अलास्काको पेरीभिली क्षेत्रबाट ९१ किलोमिटर दक्षिण–पूर्वको समुद्री क्षेत्रमा ४६ किलोमिटर गहिराइमा भूकम्प गएको छ ।

यसअघि यहाँ सन् १९६४ मा ८.७ रेक्टर स्केलको भूकम्प गएको रेकर्ड छ । भूकम्पपछि दुई वटा ठूला परकम्प समेत गएको छ । भूकम्पको केही समयपछि समुद्रमा ठूला छाल आउन थालेको छ । स्थानीय प्रशासनले सुनामीको चेतावनी समेत जारी गरेको थियो । तर, अहिले भने जोखिम नभएको भन्दै सुनामीको चेतावनी हटाइएको छ ।