काठमाडौं । अमेरिकी मिलिनियम च्यालेन्ज कर्पोरेसन (एमसीसी) उपाध्यक्ष फातिमा सुमारसहितको टोली अहिले काठमाडौंमा छ । बिहीबार आइपुगेको यो टोली भेटघाटमा व्यस्त रहेको छ । टोलीले बिहीबार नै विपक्षी दलका नेता केपी शर्मा ओलीलाई भेटेको थियो । शुक्रबार भने प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहालसँग भेट गर्ने कार्यक्रम रहेको छ ।

नेपालको संसदबाट सम्झौता अनुमोदन गराउन यो भ्रमणले पहल गर्ने भएको छ । बिहीबार ओलीसँगै नेकपा एकीकृत समाजवादीका अध्यक्ष माधवकुमार नेपाल तथा जसपा अध्यक्ष उपेन्द्र यादव र संघीय परिषद् अध्यक्ष बाबुराम भट्टराईसँग छलफल गरिसकेको छ । नेताहरुसँगको छलफलमा सुमारले एमसीसी कुनै सैन्य रणनीति नभएको स्पष्ट पारेकी छिन् । उनले एमसीसीलाई विवादमा नल्याउन समेत आह्वान गरेकी छिन् ।

प्रधानमन्त्री देउवा यस पटक संसदबाट एमसीसी पारित गर्ने तयारीमा छन् । सत्तारूढ गठबन्धनमा माओवादी र एकीकृत समाजवादी यसको विपक्षमा छन् । पास भएपनि परिमार्जन हुनुपर्ने उनीहरुको माग छ । एमालेले भने सरकारमा हुँदा समर्र्थन गरेको यो कार्यक्रम प्रतिपक्षमा हुँदा मौन बसेको छ ।