पोखरा । पोखरामा सबै प्रकारका पर्यटकीय गतिविधि शुरु भएको छ । बैशाख तेस्रो सातादेखि पोखरामा जारी भएको लकडाउन अब पूर्ण रुपमा खुलेको हो । जिल्ला कोभिड– १९ व्यवस्थापन समितिको मंगलबार बसेको बैठकले असोज १ गतेदेखि लकडाउन खुलाउने निर्णय गरेको हो। यससँगै पोखराका स्कुल, होटल, रेष्टुरेण्ट, क्लब, दोहोरी साँझ, डान्सबारलगायत सबै गतिविधि खुलाउने निर्णय भएको हो । जेठ अन्तिम सातादेखि लकडाउन खुकुलो भएपनि स्कुल र रात्रिकालीन व्यवसाय खुलेका थिएनन्।

पछिल्ला दिनमा कोरोना भाइरसको संक्रमण र मृत्युदर घटेका कारण लकडाउन खुला गर्ने निर्णय गरिएको जिल्ला प्रशासन कार्यालयको भनाई छ । प्रमुख जिल्ला अधिकारी गौतमले बुधबार साँझ आदेश जारी गरि लकडाउन खुला गरिए पनि सरकारले जारी गरेको स्वास्थ्य तथा सुरक्षा मापदण्ड भने पूर्ण रुपमा पालना गर्न भनेका छन् ।

यसअघि साँझ ८ बजेसम्म मात्र खुला गरिएको बजार अब थप समयसम्म खोल्न पाइने भएको छ। बुधबार जारी गरेको आदेशमा पोखराका होटल तथा रेष्टुरेण्ट राति साढे ११ बजेसम्म खोल्न पाइने उल्लेख छ। डान्सबार, क्लब, दोहोरी साँझ जस्ता रात्रिकालीन व्यवसाय राति साढे १ बजेसम्म संचालन गर्न पाइने भएको छ ।