काठमाडौं । नेपालको निजी लगानीको हिमालय एयरलाइन्समा यात्रारात यात्रुमा आकस्मिक मुटु र स्वास प्रश्वास सम्बन्धी समस्यामा आएमा पनि जहाज डाइभर्ट गर्नु नपर्ने भएको छ । हिमालय एयरलाइन्सले जहाजमै अब अटोमेटेड एक्स्टर्नल डेफिब्रिलेटर (एईडी) मेसिन राखेको छ । कम्पनीका अनुसार अटोमेटेड एक्स्टर्नल डेफिब्रिलेटर एक जीवनदायी मेसिन हो, जसले बिरामीको हृदयगति अकस्मात् बन्द हुँदा वा हुन लाग्दा त्यसलाई रोकी हृदय गति सुचारु राख्न मद्दत गर्छ ।

यस्तो मेसिनसहित सेवा थाल्ने नेपालको एक मात्र कम्पनी बनेको हिमालय एयरलाइन्सले विज्ञप्ती निकाल्दै जनाएको छ । नेपाल–चीन संयुक्त लगानीको हिमालय एयरलाइन्सका सबै जहाज (तीनवटा एअरबस ३२० र एउटा एअरबस ३१९)मा यो मेसिन राखिएको हो । कम्पनीको सेवालाई सुरक्षित, विश्वसनीय र आरामदायी बनाउन यो मेसिन सहयोगी हुने बताएको छ ।

अटोमेटेड एक्स्टर्नल डेफिब्रिलेटर मध्य आकाशमा जहाज उडिरहँदा भवितव्य वा कुनै यात्रुमा श्वासप्रश्वास बन्द हुने वा हृदय गति बन्द हुने जटिल समस्या आउँदा पनि निदान गरी बचाउन सकिने कम्पनीले जारी गरेको विज्ञप्तिमा उल्लेख छ । यात्रुको हृदय गति बन्द भए, नाडी बन्द भए वा सास फेन नसके मेसिनको सहायताले बिरामीको मुटुमा एक प्रकारको दबाव दिएर मुटु, श्वास–प्रश्वास र नाडीको गति पुनःकायम गराउन सकिने बताइएको छ । विगत केही सातादेखि हिमालय एयरलाइन्सका सबै उडान कर्मचारीलाई यो मेसिनको प्रयोगबारे तालिम दिइएको छ ।