बिचार

माओवादी कमजोर हुनुको कारणबारे आत्मसमीक्षा हुन्छ : प्रचण्ड

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले माओवादी कमजोर हुनुको कारणबारे आत्ममीक्षा हुने बताएका छन् । आइतबारबाट राजधानीमा शुरु ८ औं महआधिवेशन तथा राष्ट्रिय सम्मेलनको उद्घाटन समारोहलाई सम्बोधन गर्दै उनले यसमा अरुलाई आरोपित नगरेर आफैंलाई चिरफार गरिने बताएका हुन् । प्रचण्डले शान्ति प्रक्रियामा आएपछि आफूहरु कहाँ चुक्यौँ भन्ने कुराको आत्मसमीक्षा महाधिवेशनमा प्रस्तुत हुने प्रतिवेदनमा हुने बताए ।

‘हामी शान्ति प्रक्रियमा आएपछि कहाँकहाँ चुक्यौँ, विचार, संरचनाको क्षेत्रमा रणनीतिक कुरामा कहाँ कहाँ चुक्यौँ । यो प्रस्तावमा सबैभन्दा बढी आत्मसमीक्षा मैले मेरो गरेको छु’, उनले भने ।

जनयुद्धको तयारी र नेतृत्व गर्ने अवसर आफुलाई जुटेको भन्दै शान्ति प्रक्रिया, संविधान निर्माणको अवसर मिलेको समेत उनले स्मरण गरे । त्यसकारण माओवादी कमजोर हुनुमा मैले अरुलाई आरोपित गरेर हुँदैन । ‘मैले आफैंलाई चिरफार गरेको छु,’ उनले भने ।

प्रचण्डले आफ्नो दस्तावेजमा सच्चा कम्युनिष्टको आन्दोलनलाई अगाडि बढाउने कुरा समेटेको समेत समारोहमा जानकारी गराए । उनले महाधिवेशनमा विज्ञान र प्रविधिको प्रभावको समीक्षा गरेको समेत बताए । यो देशका उत्पीडितको हक र हितका लागि के गर्न सकिन्छ भन्ने नयाँ कार्यनीति र रणनीति प्रस्तुत गरिएको उनले जानकारी गराए ।