काठमाडौं । नेकपा एमालेले समानुपातिक सांसद चयन आज गर्ने भएको छ । सांसद चयन र चुनावी समीक्षा गर्न एमालेको सचिवालय बैठक आज बोलाइएको छ । एमाले सचिवालयका अनुसार आज समसामयिक राजनीतिक विषयवस्तुमा समेत छलफल हुनेछ । बैठकमा समानुपातिकतर्फका सांसदको छनोट, निर्वाचन समीक्षा मूख्य एजेण्डा भएको समेत बताइएको छ ।

एमालेले प्रतिनिधि सभामा प्रत्यक्षतर्फ ४४ र समानुपातिकमा ३४ सिट जितेको छ। समानुपातिकतर्फ जितेका ३४ सिटमा समावेशी सिद्धान्तअनुसार मिल्ने गरी सांसद चयन गर्नु पर्ने हुन्छ । निर्वाचन आयोगले बुधबार राजनीतिक दललाई पत्र पठाउँदै समानुपातिकतर्फको सांसदको नाम पठाउन भनेको छ । तीन दिनभित्र दलहरुले नाम पठाउनु पर्नेछ ।