फिचर

गैरआवासीय नेपालीबाट १० अर्ब लगानी भित्राउने अभियानमा सहजिकरणको माग

काठमाडौं । गैरआवासीय नेपाली संघका अध्यक्ष कुमार पन्तसहितको प्रतिनिधि मण्डलले परराष्ट्रमन्त्री प्रदीप ज्ञवालीसँग भेटेको छ । भेटमा संघका अध्यक्ष कुमार पन्तले संघका पछिल्ला गतिविधीबारे परराष्ट्र मन्त्रीलाई जानकारी गराएका थिए । नेपालको पूर्वाधार विकासका लागि गैरआवासीय नेपालीको रु. १० अर्ब लगानी भित्र्याउने घोषणा गरिएको छ । यस अभियानमा थप सहजीकरणका लागि परराष्ट्र मन्त्री ज्ञवालीमार्फत सरकारको ध्यानाकर्षण गराएको संघले जानकारी दिएको छ । सो अवसरमा वैदेशिक रोजगार श्रमिक कल्याणकारी कोषमा नेपाल राष्ट्र बैंकका तर्फबाट पनि योगदान गर्ने सम्बन्धमा सकारात्मक छलफल भएको थियो । संसदमा विचराधिन गैरआवासीय नागरिकता सम्बन्धी विषयमा पनि अध्यक्ष पन्तले मन्त्री ज्ञवालीको ध्यानाकर्षण गराएका थिए । भेटमा गत अक्टोवरमा सम्पन्न विश्व सम्मेलन तथा अन्तर्रा्ष्ट्रिय महाधिवेशन बारे जानकारी गराउँदै अध्यक्ष पन्तले अब छिट्टै दोश्रो एनआरएन विश्व ज्ञान सीप सम्मेलन आयोजनाको तयारीमा जुटेको समेत बताएका थिए । जवाफमा मन्त्री ज्ञवालीले संघले गर्दै आएका गतिविधीप्रति सरकार सकारात्मक रहेको उल्लेख गरे । संघले उठाएका विषयमा नेपाल सरकार सकारात्मक भएको र यी विषयलाई संबोधन गर्न सम्बन्धित निकायमा पहल गर्ने आश्वासन मन्त्री ज्ञवालीले दिएका थिए । दोश्रो विश्व विज्ञ सम्मेलनबारे चासो व्यक्त गर्दै उनले पहिलो विश्व विज्ञ सम्मेलन मौलिक र स्तरीय भएकोमा प्रसन्नता व्यक्त गरेको संघले जानकारी दिएको छ । टोलीले परराष्ट्र सचिव शंकरदास बैरागीसँग समेत भेटघाट गरेको छ ।