काठमाडौं । काठमाडौं उपत्यकाको प्रदुषण लेवल मापदण्डभन्दा माथि पुगेको छ । जसले गर्दा काठमाडौंबासीले भारतको नयाँ दिल्लीबासीले भोगे जस्तै अनुभूति गर्नु परेको छ । कम भिजिविलिटीका कारण सडकमा चर्को जाम समेत भएको छ । सोमबार दिनभर काठमाडौंबासीले घाम पनि देख्न पाएनन् । कतिपयमा आखाँ पोल्ने समस्या समेत देखिएको गुनासो आएको छ ।

काठमाडौं उपत्यकामा न्यूनतम तापक्रम बढ्नु अत्यधिक वायु प्रदूषणका कारण वातावरण धुमिल भएको मौसम विद्हरुले जानकारी दिएका छन् । वन तथा वातावरण मन्त्रालय, वातावरण विभागका अनुसार सोमबार साँझ काठमाडौं, भैंसेपाटीको एअर क्वालीटी इन्डेक्स (एक्युआई) ४०३ रहेको छ ।

यो आइतबारको तुलनामा दोब्बर हो । अर्थातः अकस्मात काठमाडौंको आकास प्रदुषित बनेको छ । आइतबार भैंसेपाटीको एक्युआई १७३ थियो । यसबाट काठमाडौंको प्रदुषण घातक विन्दुमा पुगेको संकेत गरेको छ । खतरा जनाउने सूचक रंगमा काठमाडौं खैरे स्थानमा पुगेको छ । काठमाडौंको प्रदूषणले खासगरी बिरामी र संक्रमितलाई बढी जोखिम देखाएको छ ।