काठमाडौं । प्रधानमन्त्री तथा पार्टी अध्यक्ष केपी शर्मा ओलीले महाधिवेशनबाट निर्वाचित पदाधिकारीहरु खारेज गर्ने निर्णय गरेको भोलीपल्ट बरिष्ठ नेताद्वय झलनाथ खनाल र माधवकुमार नेपाल समूहले समानान्तर कमिटी गठन गरेको छ । यो संगै एमालेमा स्पष्ट दुई धारमा कमिटीहरु क्रियासिल भएका छन् ।

एमालेको नेपाल-खनाल समुहको आज बसेको केन्द्रीय कमिटी बैठकले समानान्तर कमिटी गठन गर्ने निर्णय गरेको नेपाली संचारमाध्यमले जनाएका छन् । समुहले प्रदेश १ को संयोजकमा भीम आचार्य तोकेको छ । प्रदेश २ मा घनश्याम भुसाल, वागमती प्रदेशमा अष्टलक्ष्मी शाक्य र गण्डकीको जिम्मा सुरेन्द्र पाण्डेलाई तोकिएको छ ।

लुम्बिनी र कर्णालीको जिम्मा युवराज ज्ञवाली र प्रदेश ७ को जिम्मा भीम रावललाई दिइएको छ। बैठकले रघुजी पन्त युवा विभाग, गोकर्ण बिष्टलाई विद्यार्थी विभाग, योगेश भट्टराईलाई प्रचार विभाग, अष्टलक्ष्मी शाक्यलाई महिला विभाग र प्रमेश हमाल बुद्धिजीवी विभागको प्रमुख तोकेको समेत जनाइएको छ ।

यसअघि प्रधानमन्त्री ओलीले माधव नेपाल र झलनाथ खनालको पक्षमा रहेका सबै नेताहरुको जिम्मेवारी खोस्दै एकलौटी महाधिवेशनको मिति तोकेका थिए ।