काठमाडौं । प्रधानमन्त्री केपी शर्मा ओलीले शुक्रबार दिउँसो नेपाली संचारमाध्यमका सम्पादकसँग अन्तरक्रियामा बसे । उक्त अवसरमा वर्तमान संसदले आफुलाई विश्वासको मत नदिने भन्दै सोहीकारण एक महिना भित्र लिनु पर्ने विश्वासको मतको प्रक्रियामा आफु नगएको दावि गरे । त्यस्तो दावि गरेको एक घण्टा भित्रै उनी राष्ट्रपति कार्यालय पुगेर भने, ‘म सँग १५३ जना सांसदको समर्थन छ, मलाई प्रधानमन्त्री पदमा नियुक्त गरियोस ।’

प्रधानमन्त्री ओलीको झुट त्यतिमा सिमित थिएन, उनकै विरुद्धमा हस्ताक्षर गरि शीतल निवास पुगेका माधवकुमार नेपाल, डा. बाबुराम भट्टराई सहितका नेता समेत आफ्नो समर्थनमा रहेको झुटो दावि गरे । यो दाविको राष्ट्रपतिकै अगाडी प्रतिवाद समेत गरेका छन् । डा. बाबुराम भट्टराई ओलीका कडा आलोचक मात्र होइनन्, ओलीको बहिर्गमनमा सबैभन्दा पहिले खुलेर लागेका नेता समेत हुन् ।

उनलाई समेत आफ्नो समर्थक दावि गरेसँगै प्रधानमन्त्रीको झुट पर्दाफास भएको छ । उनले संविधान अनुसार बहुमत सिद्ध गर्न विवासको मत लिनु पर्ने थियो । उनी त्यसो नगरि नयाँ सरकार गठनका लागि मार्गप्रशस्त गर्न राष्ट्रपति विद्यादेवी भण्डारी समक्ष सिफारिस गरेको बताएका थिए । शुक्रबार बिहानसम्म पनि ओली आफ्नो हैसियत बैशाख २७ को भन्दा फरक नभएकाले विश्वासको मत नलिई सीधै संविधानको धारा ५ जान बाध्य भएको दावि गर्दै थिए ।

तर, जब शुक्रबार उनी राष्ट्रपति निवास पुगे, त्यहाँ उनले आफुसँग नै बहुमत रहेको भन्दै दावि प्रस्तुत गरे । बहुमतको भरपर्दो आधारै पेश नगरी पार्टीको तर्फबाट पत्रमात्रै दर्ता गरेर ओलीले दाबी गरेको यो पत्रलाई राष्ट्रपतिले वैधानिकता दिन्छिन् वा विपक्षी दलले आधारसहित दिएको दाविलाई, यो अहिले प्रतिक्षाको विषय बनेको छ ।