काठमाडौं । महिलाहरुको महान चाड हरितालिका तीज बिहीबार परेको छ । त्यसको अघिल्लो दिन आज दर खाने दिनका रुपमा मनाइदैछ । तीज पर्वको अघिल्लो दिन तीजको व्रत बस्न शक्ति प्राप्तिका लागि नेपाली हिन्दु महिलाहरूले दर खाने गरिनछ । दर खाने दिनमा विभिन्न मिठा परिकार बनाएर खाने र नाचगान गरेर रमाइलो गरिन्छ । आज बिहे गरेर गएका चेली आज माइतीमा फर्कने छन् । आज दर खाएर चेलीहरु तीजको दिन निराहार व्रत बस्छन् । सो दिन शक्ति प्राप्त होस भनी अघिल्लो साँझ पौष्टिक तत्व भएका खानेकुरा खाने गरिएको हो ।

सामान्यताय आज तीजको दर खाने गरिए पनि शहर बजारमा भने एक महिना अगाडीबाटै तीजका कार्यक्रम राख्ने फेसन शुरु भएको छ । परापूर्वकालमा देवी पार्वतीले भगवान शिवलाई स्वामी पाउँ भनी निराहार व्रत बसेको र उनको कामना पूरा भएको विश्वासका साथ अविवाहिताले राम्रो पति पाउन र विवाहिताले पतिको सुस्वास्थ्य, दीर्घायु र प्रगतिको कामना गर्दै तीज पर्व मनाइन्छ ।