काठमाडौं । संसदमा लगातार एमालेबाट भइरहेको गतिरोध हटाउन सभामुख अग्निप्रसाद सापकोटाले सर्वदलीय बैठक बोलाएका छन् । उनले सोमबार संघीय संसदमा प्रतिनिधित्व गर्ने राजनीतिक दलसँगको संयुक्त बैठक आह्वान गरेका हुन् । बैठक दिउँसो २ः३० बजे नयाँ बानेश्वरस्थित लोत्से हलमा बस्ने छ । प्रमुख प्रतिपक्षी दल नेकपा (एमाले) का सांसदले लगातार ७ वटा बैठकमा अवरोध र नाराबाजी गरेका छन् । सभामुखले गतिरोध हटाउन बैठक आव्हान गरेका हुन् ।

सभामुखले आइतबार समेत एमाले प्रमुख सचेतक विशाल भट्टराई, शान्ता चौधरी र खगराज अधिकारीसँग छलफल गरेका थिए । बैठकमा सहमति हुन नसकेपछि सर्वदलीय बैठक आह्वान गरिएको हो । बैठकमा संसद बैठक सुचारु गर्ने तथा महत्वपूर्ण कार्यसूचीबारेमा छलफल हुने छ । संसदमा एमाले, नेपाली काँग्रेस, माओवादी केन्द्र, नेकपा (एकीकृत समाजवादी), जसपा, लोसपा, राप्रपा, राजमो र नेमकिपासहित एकजना स्वतन्त्र सांसद छन् ।