काठमाडौं । अमेरिकाले इजरायल इरानसँग युद्ध लडेमा साथ नदिने भएको छ । ह्वाइट हाउसका अधिकारीहरुले यस्तो जवाफ इजरायललाई दिएको अन्तर्राष्ट्रिय समुदायले जनाएका छन् । शनिबार राती इरानले इजरायलमा ३ सय भन्दा बढी ड्रोन र मिसाइल प्रहार गरेको थियो ।

सिरियास्थित आफ्नो दूतावासमा आक्रमण भएपछि इरानले जवाफमा इजरायलमाथि आक्रमण गरेको हो । १ अप्रिलमा सो दूतावासमा आक्रमण भएको थियो । इजरायलले भने इरानले प्रहार गरेका सबै ड्रोन र क्षेप्यास्त्र आकासमै निस्तेज पारेको बताएको छ । इजरायलको बलियो प्रतिरक्षा प्रणालीमा अमेरिका र बेलायतको हात छ ।

इजरायली प्रधानमन्त्री नेतन्याहुसँगको कुराकानीमा अमेरिकी राष्ट्रपति जो बाइडनले समेत रणनीतिक रुपमा कदम चाल्न सुझाव दिएका छन् । उनले प्रतिकारमा हमला नगर्न समेत सुझाव दिएको समाचारहरुमा उल्लेख छ ।