न्युयोर्क

संचालमा आए यता कहिलै बन्द नगरिएको न्युयोर्कस्थित रेल सेवा अर्को सुचना जारी नभएसम्मका लागि हरेक रात १ बजेदेखि ५ बजेसम्म ४ घण्टा बन्द हुने भएको छ । १ सय १६ बर्षको ईतिहास बोकेको न्युयोर्क रेल सेवा अन्तर्गत संचालित सबै रेलका प्रत्येक डब्बाको सर सफाईका लागि राती ४ घण्टा बन्द गरिने गभर्नर एन्ड्रु कुमोले बिहीवार घोषणा गरेका हुन्  । रेल सेवा संचालन गर्दै रेलका डब्बाहरुमा राम्रोसँग किटाणू नाश गर्न असम्भव भएको हुँदा राती ४ घण्टा सेवा बन्द गरेरै गर्दा सजिलो हुने गभर्नर कुमोको भनाई छ । ९२ प्रतिशत यात्रुको चाप घटेको बर्तमान अवस्थामा रातको ४ घण्टामा जम्मा १० हजार यात्रुले मात्र सेवा लिने गरेको सबैभन्दा कम चाप भएको समय छानेर सफा गर्न लागेको समेत कुमोले बताएका छन् । रेल सेवा बन्द गरिने उक्त चार घण्टा एमटिएले बस डलर भ्यान लगायतबाट यात्रुहरुलाई सेवा दिने जनाइएको छ भने आत्यावश्यक सेवाका कामदारहरुलाई अतिरिक्त शुल्क बिना नै उबर लिफ्ट जस्ता सेवा समेत  प्रदान गरिने जनाईएको छ ।  

दैनिक ५५ लाख मानिसले प्रयोग गर्ने न्युयोर्क रेल सेवा कोरोना महामारीको चपेटामा समेत नियमित सेवामा नै छ । तर यात्रुको चाप भने निक्कै घटेको छ । सन् १९०४ को अक्टुबरदेखि संचालित न्युयोर्क रेल सेवाले १ सय १६ बर्षमा १ अर्ब ७२ करोड ७३ लाख यात्रुलाई सेवा प्रदान गरी सकेको छ ।रेल सेवा भने आगामी मे ६ तारिक देखी बन्द हुने छ ।