काठमाडौँ, २३ कात्तिकः नेपाल प्रिमियर लिग (एनपिएल) क्रिकेट प्रतियोगिताको जारी तेस्रो संस्करणमा पोखरा एभेन्जर्सले पहिलो जित निकालेको छ । आज सम्पन्न आफ्नो पाँचौँ खेलमा पोखरा एभेन्जर्सले कर्णाली याक्सलाई ६३ रनले पराजित गरेको हो । कीर्तिपुरस्थित त्रिभुवन विश्वविद्यालय अन्तरराष्ट्रिय क्रिकेट मैदानमा टस जितेर पहिला ब्याटिङ रोजेको पोखराले निर्धारित २० ओभरमा तीन विकेट गुमाएर २१७ रन बनायो । दुई सय १८ रनको विजयी लक्ष्य पछ्याएको कर्णाली याक्सले १८ दशमलव तीन ओभरमा सवै विकेट गुमाएर एक सय ५४ रन बनायो ।



दुई सय १७ रन बनाउने क्रममा पोखराका लागि युवराज सम्राले शतकीय पारी खेले । उनले उत्कृष्ट ब्याटिङ गर्दै ४८ बलमा १० चौका र छ छक्काको मद्दतमा १०२ रन बनाए । त्यस्तै कप्तान कुशल भुर्तेलले ३९ बलमा सात छक्का प्रहार गर्दै ६२ रन बनाए । कप्तान चमिका करुणारत्नेले ११ बलमा तीन चौका र तीन छक्कासहित अविजित ३५ रन जोडे । महेदी हसन पाँच रनमा र सन्नी विक तीन रनमा आउट भए ।



बलिङतर्फ कर्णाली याक्सका लागि सोमपाल कामीले चार ओभरमा २४ रन खर्चेर दुई विकेट लिए । यस्तै मार्क वाटले एक विकेट लिए । जवाफी ब्याटिङ गर्ने क्रममा कर्णाली याक्सका लागि पवन शर्राफले ३२, अरिफुल स्लामले २४, दीपक डुम्रेले २२, सोमपाल कामीले २१ तथा सूर्य तामाङले १३ रन बनाए । बलिङतर्फ पोखरा एभेन्जर्सका लागि मेहदी हसनले तीन, धनन्जय लक्षण, कुशल भुर्तेल र विपिन खत्रीले दुई दुई विकेट लिए ।

एनपिएलमा पोखरा एभेन्जर्सको पहिलो जित

काठमाडौँ, २३ कात्तिक । तेस्रो संस्करणको नेपाल प्रिमियर लिग (एनपिएल) अन्तर्गत आज दुई वटा खेल हुँदैछन् । नेपाल क्रिकेट सङ्घ (क्यान) अनुसार आज हुने पहिलो खेल मध्याह्न १२ः३० बजे मा कर्णाली याक्स र पोखरा एभेन्जर्सबीच तथा दोस्रो खेल अपराह्न ५ः०० बजे काठमाण्डु गोर्खाज र चितवन राइनोजबीच हुँदैछ । यी दुई वटै खेल कीर्तिपुरस्थित त्रिभुवन अन्तरराष्ट्रिय क्रिकेट मैदानमा हुनेछन् । ‘प्लेअफ’ पुग्ने झिनो आशा बाँकी राख्न पोखराले आज जित्नैपर्ने दबाबमा छ । चार खेल खेल्दा जितविहीन पोखरा अहिले अङ्क तालिकाको अन्तिममा छ ।



छैटौँ स्थानमा रहेको कर्णालीले चार खेल खेल्दा दुईमा जित र दुईमा हारको सामना गरेको छ । आजको दोस्रो खेलमा प्रतिस्पर्धा गर्ने काठमाण्डु गोर्खाज अहिले सानदार लयमा छ । दोस्रो स्थानमा रहेको ऊ आज पनि जित निकालेर शीर्ष स्थानमा उक्लिने योजनामा छ । उता चितवन पनि आफ्नो अपराजित यात्रा जारी राखेर अङ्क तालिकामा सुधार गर्ने लक्ष्यमा हुनेछ । ऊ अहिले चार खेलबाट पाँच अङ्कका साथ तालिकाको चौथो स्थानमा छ । आगामी मङ्सिर ५ गतेसम्म सञ्चालन हुने एनपिएलको यस संस्करणमा आठ वटा टोलीले प्रतिस्पर्धा गरिरहेका छन् ।

एनपिएल : आज दुई खेल, यी चार टोलीबीच हुँदैछ प्रतिस्पर्धा

लोकेश धामी/रासस 



काठमाडौँ, २१ कात्तिकः नेपाल प्रिमियर लिग (एनपिएल) खेल्न विश्व क्रिकेटका चर्चित खेलाडीहरू यतिबेला नेपालमा छन् । अष्ट्रेलियाका डेविड वार्नरदेखि दक्षिण अफ्रिकाका डेविड मिलरसम्मका अन्तरराष्ट्रिय ख्यातिप्राप्त खेलाडीको उपस्थितिले नेपाली क्रिकेटको चर्चा अन्तरराष्ट्रियस्तरमा बढाएको छ । प्रतियोगिताले नेपाली क्रिकेटको प्रचारसँगै विदेशी खेलाडीको नेपाल आगमन र उनीहरूले सामाजिक सञ्जालमा सार्वजनिक गरेका सामग्रीमार्फत नेपालको पर्यटन प्रवद्र्धनमा पनि योगदान पुग्ने विश्वास गरिएको छ ।



एनपिएल खेल्न नेपाल आएका विदेशी खेलाडीले यहाँको प्राकृतिक सुन्दरता, हिमाली दृश्य, सांस्कृतिक विविधता र नेपालीको आतिथ्यको प्रशंसा गरिरहेका छन् । उनीहरूले नेपालमा बिताएका क्षण र घुमफिरका तस्बिर तथा भिडियो सामाजिक सञ्जालमार्फत सार्वजनिक गर्दा नेपालको पर्यटन प्रवर्द्धनमा सहयोग पुगेको छ ।



विश्वभर ठूलो सङ्ख्यामा समर्थक र दर्शक भएका खेलाडीले नेपालका पर्यटकीय गन्तव्यबारे सामाजिक सञ्जालमा सामग्री सार्वजनिक गर्दा विदेशी पर्यटकको नेपालप्रतिको चासो बढ्ने र पर्यटक आगमनमा समेत सकारात्मक प्रभाव पर्ने अपेक्षा गरिएको छ । अष्ट्रेलियाका चर्चित क्रिकेटर डेविड वार्नरले हालै हेलिकोप्टरमार्फत सगरमाथा आधार शिविर क्षेत्रको अवलोकन गरेका थिए । 



सगरमाथाको प्रत्यक्ष दृश्यबाट प्रभावित उहाँले सामाजिक सञ्जाल इन्स्टाग्राममा आफ्नो अनुभव सार्वजनिक गर्दै नेपालको प्राकृतिक सुन्दरताको प्रशंसा गरेका छन् । उनले लेखेका छन्, “शब्दमा वर्णन गर्नै नसकिने अनुभव रह्यो । आफ्नै आँखाले सगरमाथा देख्न पाउनु अविश्वसनीय क्षण थियो । तस्बिर र भिडियोले यहाँको वास्तविक सुन्दरतालाई न्याय गर्न सक्दैनन् । यो संसार कति विशाल र अद्भुत छ भन्ने महसुस गराउने क्षणमध्ये यो पनि एक हो ।”



वार्नरले अर्को भिडियोमार्फत नेपालीको आतिथ्य, दयालुपन र क्रिकेटप्रतिको अगाध मायाको पनि प्रशंसा गरेका छन् । नेपाल प्राकृतिक सुन्दरताले मात्र नभई यहाँका मानिसको सरलता, व्यवहार र आत्मीयताले पनि विशेष रहेको उनको भनाइ छ । पहिलोपटक नेपाल आउनुभएका वार्नर एनपिएलको तेस्रो संस्करणमा काठमाण्डु गोर्खाजबाट खेलिरहेका छन् । दुई खेल खेलिसकेका उनको ब्याटिङमा प्रभावशाली प्रदर्शन छ । अष्ट्रेलियालाई विश्वकपको उपाधि दिलाउन महत्त्वपूर्ण भूमिका निर्वाह गरेका वार्नरको उपस्थितिले एनपिएलप्रति अन्तरराष्ट्रिय क्रिकेटप्रेमीको चासोसमेत बढाएको छ ।



त्यस्तै, दक्षिण अफ्रिकाका चर्चित क्रिकेटर डेविड मिलर पनि नेपालको प्राकृतिक सुन्दरता र यहाँको क्रिकेट वातावरणबाट प्रभावित भएका छन् । पहिलोपटक नेपाल आएका उनले यहाँका हिमाली दृश्य र वातावरणको प्रशंसा गर्दै आगामी दुईदेखि तीन साता नेपालमा बिताउन पाउँदा उत्साहित रहेको बताए । “नेपाल साँच्चै सुन्दर ठाउँ हो । यहाँ आएपछि देखिने प्राकृतिक दृश्य र हिमालहरूले मन लोभ्याउँछन् । यहाँको सुन्दरता र वातावरण अविश्वसनीय छ । आगामी दुई–तीन साता नेपालमा बिताउन पाउँदा म निकै उत्साहित छु”, मिलरले नेपाल आइपुगेलगत्तै भने ।



 उनले नेपालको क्रिकेट विकास र यहाँका समर्थकको उत्साहको पनि प्रशंसा गरे । मिलरले नेपाल क्रिकेटमा तीव्र गतिमा अघि बढिरहेको देश भएको उल्लेख गर्दै नेपालीको क्रिकेटप्रतिको लगाव, जोश र ऊर्जालाई प्रशंसनीय बताए । “नेपाल क्रिकेटमा तीव्र रूपमा अघि बढिरहेको देश हो । यहाँका मानिसहरू क्रिकेटलाई निकै माया गर्छन् । उनीहरूको क्रिकेटप्रतिको लगाव, जोश र ऊर्जा साँच्चै प्रशंसनीय छ । नेपालमा क्रिकेटको भविष्य उज्ज्वल देख्छु”, उनले भने ।



 मिलर यस सिजनको एनपिएलमा कर्णाली याक्सबाट खेलिरहेका छन् । उनले प्रतियोगितामा आफ्नो पहिलो खेलमै अविजित ९३ रनको पारी खेल्दै क्षमता प्रदर्शन गरिसकेका छन् । अन्तरराष्ट्रिय क्रिकेटमा लामो अनुभव हासिल गर्नुभएका मिलरको प्रदर्शनले नेपाली खेलाडी र दर्शकको ध्यानसमेत खिचेको छ ।



यसैगरी, बङ्गलादेशका चर्चित अलराउन्डर शाकिब अल हसनले पनि नेपालका विभिन्न स्थान र गतिविधिसम्बन्धी भिडियो सामाजिक सञ्जालमा सार्वजनिक गरिरहेका छन् । उनका पोस्टले नेपालबारे अन्तरराष्ट्रिय क्रिकेट समर्थकमाझ थप चासो सिर्जना गर्न सहयोग पुर्‍याएको छ । एनपिएलमा सहभागी विदेशी खेलाडीको गतिविधि क्रिकेट मैदानमा मात्र सीमित छैन । उनीहरूले नेपालको प्राकृतिक तथा सांस्कृतिक पक्षलाई नजिकबाट नियाल्ने र आफ्ना अनुभव सामाजिक सञ्जालमार्फत विश्वभरका समर्थकमाझ पुर्‍याउने अवसर पाएका छन् । यसले नेपाली क्रिकेटको अन्तरराष्ट्रिय पहिचान विस्तारसँगै नेपालको पर्यटन प्रवर्द्धनमा पनि टेवा पुग्ने अपेक्षा गर्न सकिन्छ ।

एनपिएल : पर्यटन प्रवर्द्धनमा सकारात्मक प्रभाव पर्ने अपेक्षा

२१ कात्तिक, काठमाडौं । नेपाल प्रमियर लिग (एनपीएल) मा आज एक खेल मात्रै हुँदैछ । साँझ ५ बजे त्रिवि मैदानमा हुने खेलमा काठमान्डु गोर्खाजले अंकतालिकाको शीर्ष स्थानमा रहेको लुम्बिनी लायन्सको सामना गर्दैछ । लुम्बिनी ७ अंकका साथ शीर्ष स्थानमा छ भने काठमान्डु ४ अंकका साथ चौथो स्थानमा रहेको छ ।



लुम्बिनी अपराजित छ । ४ खेलमा ३ मा विजयी भएको छ भने एक खेल रद्द हुँदा अंक बाँडेको छ । काठमान्डुले ३ खेलमा २ खेल जितेको छ भने एक खेलमा पराजित भएको छ ।

एनपीएलमा आज काठमाडौं र लुम्बिनी भिड्दै

२० कात्तिक, काठमाडौं । नेपाल प्रिमियर लिग (एनपीएल) क्रिकेटमा आज पनि दुई वटा खेलहरू हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा शुक्रबार दिउँसो साढे १२ बजे हुने पहिलो खेलमा कर्णाली याक्स र सुदूरपश्चिमबीच प्रतिस्पर्धा हुनेछ । तीन खेल खेलेको कर्णाली याक्स अंक तालिकाको तेस्रो स्थानमा छ । उसले तीन खेल खेलेकोमा २ मा जित र एकमा हार बेहोरेको छ । पहिलो खेलमा काठमाडौंसँग पराजित भएको कर्णालीले दोस्रो खेलमा विराटनगर र तेस्रो खेलमा जनकपुरलाई हराउँदै दुई खेल जितेको थियो ।



सुदूरपश्चिम भने अंक तालिकाको छैटौं स्थानमा छ । चार खेल खेलेको उसले २ मा जित र २ मा हार बेहोरेको छ । सुदूरपश्चिमले पहिलो खेलमा चितवनलाई हराउँदै पहिलो जित निकालेको थियो भने दोस्रो खेलमा विराटनगरसँग पराजित भएको थियो । यसैगरी तेस्रो खेलमा पोखरालाई हराएको सुदूरपश्चिम आफ्रनो चौथो खेलमा लुम्बिनीसँग पराजित भएको थियो ।



यसैगरी आज दिउँसो साढे ४ बजे हुने दोस्रो खेलमा चितवन राइनोज र पोखरा एभेन्जर्सबीच आमने-सामने हुनेछन् । तीन खेलमध्ये एकमा जित, एकमा हार र वर्षाका कारण एक खेल रद्द हुँदा बराबरी अंक बाडेर चितवन अंक तालिकाको सातौं स्थानमा छ । चितवन आफ्नो पहिलो खेलमा सुदूरपश्चिमसँग पराजित भएको थियो भने लुम्बिनीसँगको दोस्रो खेल वर्षाका कारण रद्द भएको थियो । तस्रो खेलमा भने उसले विराटनगरविरुद्ध पहिलो जित निकालेको थियो ।



पोखरा भने अंक तालिकाको पुछारमा छ । तीन खेलमा तीनै खेल हारेको पोखरा आजको खेलमा पहिलो जित निकाल्ने दाउमा छ । पोखरा पहिलो खेलमा लुम्बिनी, दोस्रो खेलमा जनकपुर र तेस्रो खेलमा सुदूरपश्चिमसँग पराजित भएको थियो ।

एनपीएलमा आज दुई खेल

१९ कात्तिक, काठमाडौं । पोर्चुगलका सुपरस्टार क्रिस्टियानो रोनाल्डोले अन्तर्राष्ट्रिय फुटबलबाट सन्यास लिएका छन्। बिहीबार उनले सामाजिक सञ्जालमा एक भिडियो साझा गर्दै सन्यासको आफ्नो निर्णयबारे जानकारी गराए । रोनाल्डोको २३ वर्ष लामो यात्रा समाप्त भएको छ। रोनाल्डोको नाममा सर्वाधिक अन्तर्राष्ट्रिय खेल खेल्ने र सर्वाधिक अन्तर्राष्ट्रिय गोल गर्ने विश्व रेकर्ड छ । 



 गिनिज बुक अफ वर्ल्ड रेकर्ड्सले पनि रोनाल्डोको सर्वाधिक म्याच र सर्वाधिक गोलको विश्व रेकर्ड सेयर गरेको छ। उनले पोर्चुगलका लागि कुल २३४ वटा अन्तर्राष्ट्रिय म्याच खेले, जसमा १४६ गोल गरे। रोनाल्डोले २० अगस्ट २००३ मा पुर्तगालको सिनियर टिमका लागि पहिलो अन्तर्राष्ट्रिय म्याच खेलेका थिए। २०२६ मा उनले सन्यास लिए, त्यसैले उनको करियर २३ वर्षको रह्यो।



रोनाल्डोको नाममा १० वटा अन्तर्राष्ट्रिय ह्याट्रिक दर्ज छन्। यसमा दुई पटक त उनले ४–४ वटा गोल गर्ने कमाल पनि गरे। उनी यस सूचीमा दोस्रो स्थानमा रहे। अर्जेन्टिनाका पूर्व खेलाडी लियोनल मेस्सी ११ वटा ह्याट्रिकसहित पहिलो नम्बरमा छन्। १४६ मध्ये १२४ गोल उनले प्रतिस्पर्धी खेलहरूमा गरे, जसमा फिफा विश्वकप, युरोपियन च्याम्पियनसिप, युइएफए नेसन्स लिग खेल र छनोट खेलहरू सामेल छन्। बाँकी २२ गोल उनले मैत्रीपूर्ण अन्तर्राष्ट्रिय म्याचमा गरे।



२०२६ को फिफा विश्वकपमा गोल गरेसँगै रोनाल्डो फिफा विश्वकपका सर्वाधिक ६ वटा संस्करणमा गोल गर्ने खेलाडी बने। उनले २००६, २०१०, २०१४, २०१८, २०२२ र २०२६ मा गोल गरे। फिफा विश्वकपमा उनको नाममा कुल ११ गोल दर्ज छन्। यद्यपि सर्वाधिक गोल गर्ने सूचीमा उनी निकै तल छन्। हाल यो रेकर्ड फ्रान्सका किलियन एम्बाप्पेको नाममा छ, जसले २२ गोल गरिसकेका छन्। युरोपियन च्याम्पियनसिपमा रोनाल्डोको नाममा सर्वाधिक गोल गर्ने रेकर्ड दर्ज छ। उनले यहाँ ६ वटा प्रतियोगितामा कुल १४ गोल गरे। २०१६ मा रोनाल्डोले पहिलो पटक पोर्चुगलको कप्तानी गर्दै युरोपियन च्याम्पियनसिपको उपाधि जितेका थिए।

रोनाल्डोले अन्तर्राष्ट्रिय फूटबलबाट लिए सन्यास

१९ कात्तिक, काठमाडौं । नेपाल प्रिमियर लिग (एनपीएल) क्रिकेट अन्तर्गत आज दुई वटा खेलहरू हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहीबार दिउँसो साढे १२ बजे हुने पहिलो खेलमा लुम्बिनी लाइन्स र जनकपुर बोल्ट्स भिड्ने छन् । लुम्बिनी लिग तालिकाको शीर्ष स्थानमा छ । उसले ३ खेल मध्ये २ मा जित र एक खेल वर्षाका कारण रद्द हुँदा बराबरी अंक बाँडेको छ । 



जनकपुर बोल्ट्स भने लिग तालिकाको चौथो स्थानमा छ । उसले ४ खेल खेलेकोमा २ मा जित र २ मा हार बेहोरेको छ । दिउँसो साढे ४ बजे हुने दोस्रो खेलमा विराटनगर किंग्स र काठमान्डु गोर्खाज आमने–सामने हुनेछन् । विराटनगर किंग्स अंक तालिकाको दोस्रो स्थानमा छ । उसले ४ खेलेकोमा २ मा जित र २ मा हार बेहोरेको छ । यता काठमान्डु भने अंक तालिकाको सातौं स्थानमा छ । उसले २ खेल खेलेकोमा १ मा जित र १ मा हार बेहोरेको छ ।

१९ कात्तिक, काठमाडौं । आजदेखि यु–१९ एसिया कप क्रिकेट प्रतियोगिता सुरु हुँदै छ । ओमानको अल अमेरातमा प्रतियोगिता सुरु हुन लागेको हो । प्रतियोगिता यही २८ गतेसम्म सञ्चालन हुनेछ । प्रतियोगितामा नेपाल समूह ‘ए’मा परेको छ । समूह चरणमा नेपालले २० कात्तिकमा भारत, २२ कात्तिकमा युनाइटेड अरब इमिरेट्स (युएई) तथा २४ कात्तिकमा पाकिस्तानविरुद्ध खेल्ने तालिका छ ।



उक्त प्रतियोगिताका लागि नेपालले विपिनप्रसाद शर्माको कप्तानीमा टोली घोषणा गरेको छ । टोलीमा निरजकुमार यादव, प्रसिद्ध जैशी, सोहेल कुँवर, दर्श सुनार, रोहित चन्द, निश्चल क्षेत्री, आशिष लुहार, रोशन शाही, सूर्यान्शु कोइराला, अभय यादव, सुशील रावल, नितेशकुमार पटेल, शुभम खनाल र सचिन भट्टले अवसर पाएका छन् । आज उद्घाटनको दिन दुई खेल हुँदैछन् । मलेसिया र श्रीलंकाबीच तथा अफगानिस्तान र बंगलादेशबीच बिहान पौने ११ बजेदेखि खेल सुरु हुनेछ ।

आजदेखि यु–१९ एसिया कप क्रिकेट सुरु, नेपाल र भारतबीच भोली खेल

१६ कात्तिक, काठमाडौँ । शिक्षा तथा खेलकुद मन्त्री सस्मित पोखरेलले कर्णाली दसौं राष्ट्रिय खेलकुद प्रतियोगिता आयोजनाका लागि पूर्ण रूपमा तयार रहेको बताएका छन् । सुर्खेत पुगेर निर्माणाधीन रंगशाला तथा विभिन्न खेल पूर्वाधारहरूको प्रत्यक्ष स्थलगत अवलोकन पछि मन्त्री पोखरेलले राष्ट्रिय खेलकुदको महाकुम्भ आयोजनामा कर्णाली तयार रहेकोमा विश्वस्त रहन आग्रह गरेका हुन् । अवलोकनका क्रममा मन्त्री पोखरेलले आयोजक, स्थानीय पदाधिकारी तथा सरोकारवाला पक्षहरूसँग पूर्वाधार निर्माणका पछिल्ला विकासक्रम र बाँकी कामबारे छलफल गरे ।



 ूनिरन्तरको प्रयास र संवादले पूर्वाधार निर्माणको गतिलाई अझ तीव्र बनाएको छ, निरीक्षणपछि उनले भने, हाम्रा रंगशाला र संरचनाहरू तयार हुँदैछन्। देशैभरका प्रदेश, जिल्ला र स्थानीय तहहरूमा उत्तिकै उत्साह र तत्परता देखिएको छ। मन्त्री पोखरेलले प्रतियोगिता सुरु हुन बाँकी ३० दिनको काउन्टडाउन सुरु भएको घोषणा समेत गरे ।



 लामो समयदेखि विविध कारणले रोकिएको राष्ट्रिय खेलकुदलाई अब कर्णालीको भूगोलले नयाँ उचाइ दिने भन्दै उनले समग्र खेल क्षेत्र र खेलाडीहरू पूर्ण रूपमा उत्साही रहेको उल्लेख गरे । दसौँ राष्ट्रिय खेलकुद लक्षित सुर्खेत भ्रमणको क्रममा मन्त्री पोखरेलले कर्णाली प्रदेशका मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लसँग पनि आइतबार छलफल गरेका थिए ।

दसौँ राष्ट्रिय खेलकुदका लागि कर्णाली तयार छ, काउन्ट डाउन सुरु

१६ कात्तिक, काठमाडौं । चीनको राष्ट्रिय टेलिभिजन सीसीटीभीले आइतबार भएको स्पेनिस ला लिगाअन्तर्गत रियाल मड्रिडको खेल प्रसारण गरेन। रियाल मड्रिडका स्टार स्ट्राइकर किलियन एमबापेले चीनका पूर्व नेता माओत्सेतुङसँग सम्बन्धित एक भिडियो–मिमलाई लिएर गरेको टिप्पणीका कारण चिनियाँ पक्ष रुष्ट बनेपछि यो कदम चालिएको हो। फ्रान्सेली टक शो द ब्रिजमा एमबापेले आफ्नो अनुहार चीनका पूर्व नेता माओत्सेतुङको फोटोमा जोडिएको मिम हेरेर हासेको र त्यसलाई चिनियाँ तानाशाहको संज्ञा दिँदै आफूलाई सबैभन्दा धेरै हसाउने मिम भनेका थिए।



 टिप्पणीप्रति तीव्र विरोध भएपछि एमबापेले आफ्नो भनाइ अविवेकी रहेको भन्दै चीन तथा विश्वभरका चिनियाँ समुदायसँग माफी मागेका थिए। उनीसँगै रियाल मड्रिड र ला लिगाले पनि औपचारिक रूपमा क्षमायाचना गरेका छन्। चीनको सञ्चारमाध्यम नियामक निकाय चाइना मिडिया ग्रुपले ला लिगा र एमबापेका खेलहरूको प्रसारण रोक्ने निर्णय गरेको थियो। माफीलाई स्वीकार गरे पनि यो प्रतिबन्ध कहिलेसम्म कायम रहने भन्नेबारे चीनले कुनै स्पष्ट जानकारी दिएको छैन। विवादका कारण एमबापेलाई केही चिनियाँ ब्रान्डहरूले आफ्ना प्रायोजनबाट हटाएका छन्। ँ चिनियाँ कम्युनिस्ट पार्टीका संस्थापक माओत्सेतुङलाई चीनमा उच्च सम्मानका साथ हेरिन्छ। उनको नेतृत्वमा चलेका ग्रेट लीप फरवर्ड र सांस्कृतिक क्रान्ति जस्ता अभियानका क्रममा ठूलो संख्यामा भोकमरी र हिंसाबाट मानिसहरूको ज्यान गए पनि उनीमाथि गरिने व्यङ्ग्य वा टिप्पणीलाई चीनमा निकै संवेदनशील मानिन्छ। चीनले राजनीतिक रूपमा संवेदनशील विषयलाई लिएर खेल प्रसारणमा रोक लगाएको यो पहिलो पटक भने होइन। यसअघि सन् २०१९ मा अमेरिकाको एनबीए टोली ह्युस्टन रकेट्सका जनरल म्यानेजर डारिल मोरेले हङकङका लोकतन्त्रवादी प्रदर्शनकारीको समर्थनमा ट्वीट गरेपछि चीनले एक वर्षसम्म एनबीएका खेलहरूको प्रसारणमा प्रतिबन्ध लगाएको थियो।



प्रसारणमा प्रतिबन्ध रहे तापनि आइतबार भएको खेलमा रियाल मड्रिडले रासिङ सान्टान्डरलाई ३–० ले पराजित गर्‍यो। उक्त खेलमा किलियन एमबापे, जुड बेलिङ्गम र यान डिओमान्डेले ११ गोल गरेका थिए।

फ्रान्सका फुटबलर किलियन एमबापेको माओत्सेतुङ सम्बन्धी टिप्पणीपछि चीनमा रियाल मड्रिडको खेल प्रसारणमा रोक

१६ कात्तिक, काठमाडौं । नेपाल प्रिमियर लिग (एनपीएल) अन्तर्गत आज सोमबार दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा काठमाडौं गोर्खाज र कर्णाली याक्स तथा दोस्रो खेलमा सुदूरपश्चिम रोयल्स र चितवन राइनोजबीच प्रतिस्पर्धा हुनेछ । पहिलो खेल दिउँसो साढे १२ र दोस्रो खेल साँझ ५ बजे हुनेछ । प्रतियोगितामा अंकतालिकाको अन्तिममा रहेको काठमाडौं आफ्नो पहिलो जितको खोजीमा रहने छ । पहिलो खेलमा काठमाडौं जनकपुर बोल्ट्ससँग पराजित भएको थियो ।



अर्कोतर्फ, अंकतालिकाको पहिलो स्थानमा रहेको कर्णाली याक्स लगातार तेस्रो जित निकाल्दै शीर्ष स्थान बलियो बनाउन चाहन्छ । यसअघिका दुवै खेल कर्णालीले जितेको थियो । कर्णालीले जनकपुर बोल्ट्स र विराटनगर किंग्सलाई हराएको थियो ।



सुदूरपश्चिम रोयल्सका लागि आजको खेल निकै महत्त्वपूर्ण मानिएको छ। सुदूरपश्चिमले हालसम्म खेलेका ३ खेलमध्ये १ खेलमा जित र २ खेलमा हार व्यहोरेको छ। चितवन भने प्रतियोगितामा अहिलेसम्म अपराजित छ। पहिलो खेलमा जित हात पारेको चितवनको दोस्रो खेल वर्षाका कारण रद्द भएपछि अंक बाँड्नु परेको थियो ।

१५ कात्तिक, सुर्खेत । आगामी दशौँ राष्ट्रिय खेलकुद प्रतियोगिताको तयारीलाई थप तिब्रता दिने र व्यवस्थित बनाउने उद्देश्यले शिक्षा तथा खेलकुद मन्त्री सस्मित पोखरेलले कर्णाली प्रदेशका मुख्यमन्त्री र सामाजिक विकास मन्त्रीसँग सुर्खेतमा छलफल गरेका छन् । दशौँ राष्ट्रिय खेलकुद प्रतियोगिताको आयोजना स्थलसमेत रहेको कर्णाली प्रदेशमा खेलकुद पूर्वाधार निर्माण, व्यवस्थापन र अन्य आवश्यक तयारीका सन्दर्भमा सो छलफल केन्द्रित रहेको हो।



सुर्खेतमा सम्पन्न उक्त भेटमा शिक्षा तथा खेलकुद मन्त्री सस्मित पोखरेल, कर्णाली प्रदेशका मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लबीच प्रतियोगितालाई भव्य र ऐतिहासिक रूपमा सफल पार्न संघीय र प्रदेश सरकारबीच हुनुपर्ने समन्वय, पूर्वाधारहरूको अवस्था लगायतका विषयमा कुराकानी भएको हो।



छलफलका क्रममा मन्त्री पोखरेलले तोकिएकै समयमा प्रतियोगिता सम्पन्न गर्न मन्त्रालयले सबै पक्षसँग सहकार्य गरिरहेको बताउँदै कर्णाली प्रदेशमा खेलकुद पूर्वाधारको विकास र व्यवस्थापनमा संघीय सरकारको तर्फबाट पूर्ण सहयोग रहने प्रतिबद्धता व्यक्त गरे । 



त्यस्तै, मुख्यमन्त्री मंगलबहादुर शाही र सामाजिक विकास मन्त्री जीतबहादुर मल्लले दशौँ राष्ट्रिय खेलकुदलाई सफल बनाउन प्रदेश सरकार पूर्ण रूपमा लागिपरेको जानकारी गराउँदै आवश्यक तयारी अन्तिम चरणमा पुगेको बताए । मन्त्री पोखरेल दशौँ राष्ट्रिय खेलकुद प्रतियोगिताको तयारी, पूर्वाधार निरीक्षण तथा सरोकारवालाहरूसँगको समन्वयका लागि हाल सुर्खेत भ्रमणमा छन् ।

खेल

Vishwa Sandesh Newspaper Inc.

Address

USA:

Nepal:

Contact Information

Email:

Phone: