२९ भदौ, काठमाडौं । नवनियुक्त प्रधानमन्त्री सुशीला कार्कीले सृजनात्मक युवापुस्ताको सोचबमोजिम भ्रष्टाचार अन्त्य, सुशासन र आर्थिक समानता दिन अठोटका साथ काम गर्न निर्देशन दिएकी छिन् । सिंहदबारमा आज पदबहालीपछि उच्च पदस्थ कर्मचारीलाई निर्देशन दिँदै उनले आफू पदको रसास्वादन गर्न नभई युवाको चाहनाबमोजिम सेवा गर्न आएकाले छ महिनाभित्र निर्वाचनबाट नयाँ संसद्लाई जिम्मेवारी दिने उदेश्यका साथ आएको बताइन् । 



“कुन परिस्थितिबाट अन्तरिम सरकार बन्यो यहाँलाई विदितै छ । ठूलो जनधनको क्षति भएको छ । मुख्य निकायका प्रमाण र अभिलेख नष्ट हुँदा शून्यमा पुगेका छौँ । सुरक्षा निकायलाई दिइएका सवारीसाधन जलेका छन् । हत्याहिंसा भएको छ । अत्याश्यक निकायलाई छानीछानी आक्रमण गरिएको छ । यसको अनुसन्धान हुन बाँकी छ”, उनले भनिन्, “नेपाली नै भएर यो काम गरेको हो भने लाज लाग्नुपर्ने हो । यस्तो घटना नेपालमा पहिलो पटक भएको हो । हाम्रा मुख्य भवनहरु अनुहार देखाउन नमिल्ने भएका छन् । यो षड्यन्त्र नियोजित हो कि भन्ने लागेको छ । अनुसन्धान गरेर दोषीलाई कारबाहीको दायरामा ल्याउनुपर्छ ।”



प्रधानमन्त्री कार्कीले क्षतिपूर्ति र पुनःनिर्माणका काम देशमा उपलब्ध स्रोतसाधन प्रयोग गरेर बनाउनुपर्छ भन्ने आफूलाई लागेको बताउँदै यो मुलुकविरुद्ध गरेको नृशंस कार्यको एकताबद्ध भएर, जनतालाई गुहारेर सामना गर्नुपर्नेमा जोड दिइन् । “म हिजो महाराजगञ्ज जाँदा त्यहाँ जलेको प्रहरीवृत्त बनाउने जिम्मा त्यहाँका व्यवसायीले लिन्छौँ भन्नुभयो, मैले उहाँहरुलाई धन्यवाद दिएँ । हामी सबै यसरी नै मिलौँ । एकलेअर्काको आलोचना नगरौँ । मलाई सहयोग गर्नुहोस् ।”



मुख्यसचिव एकनारायण अर्यालले क्षति भएका सरकारी संरचनाको पुनःस्थापना गरी सेवा प्रवाहलाई निरन्तरता दिनुपर्ने चुनौती रहेको बताए । उनले सबै जिल्लाका सरकारी कार्यालय र सुरक्षा निकायका भवनमा क्षति भएको जानकारी दिँदै पुनःसंरचनाका लागि बजेटको व्यवस्था गरी प्राथमिकताका आधारमा पुनःनिर्माण गर्नुपर्ने आवश्यकता औँल्याए । जेनजी समूहको यही भदौ २३ र २४ गतेको आन्दोलनपछिको उत्पन्न स्थितिपछि यही भदौ २७ गते अन्तरिम सरकारको प्रधानमन्त्रीमा नियुक्त कार्कीले आज गृह मन्त्रालयका लागि निर्माण गरिएको भवनमा पदबहाली गरेकी हुन् ।

प्रधानमन्त्रीद्वारा युवापुस्ताको चाहनाबमोजिम काम गर्न निर्देशन

एजेन्सी २९ भदौ, न्यूयोर्क । अमेरिकी राष्ट्रपति डोनाल्ड ट्रम्पले उत्तर एटलान्टिक सन्धि सङ्गठन (नेटो) का सहयोगीहरूलाई युक्रेनमा जारी युद्ध अन्त्यका लागि रूसलाई दबाव दिन मस्कोमाथि कडा प्रतिबन्ध लगाउन र रुसी तेल किन्न बन्द गर्न आग्रह गरेका छन् । नेटोका सदस्य राष्ट्रहरूलाई लेखेको पत्रमा ट्रम्पले भनेका छन्, “सबै नेटो राष्ट्रहरूले यही काम गर्न सुरु गरिसकेको अवस्थामा म रुसमाथि कडा प्रतिबन्ध लगाउन तयार छु र प्रतिबन्धसँगै सबैले रूसबाट तेल खरिद गर्न पूर्णरूपमा बन्द गर्न आवश्यक हुनेछ।”



ट्रम्पले नेटोको प्रतिबद्धताको कमीको आलोचना गर्दै भने, “नेटोको जीत हासिल गर्ने प्रतिबद्धता १०० प्रतिशतभन्दा निकै कम छ र केहीले रुसी तेल खरिद गर्नु आश्चर्यजनक छ । यसले तपाईंको वार्ताको स्थिति र रूसमाथि मोलतोल गर्ने शक्तिलाई धेरै कमजोर बनाउँछ।” उनले आफ्नो तत्परतामा जोड दिँदै भने, “म तपाईँसँगै अघि बढ्न तयार छु, तपाईंहरूको साथ अवश्यक छ। क्हिले गर्ने निर्णय दिनुहोस्।”



नेटोले चीनमाथि ५० देखि १०० प्रतिशतसम्म कर लगाउनुपर्ने प्रस्ताव ट्रम्पले गरेका छन् । ट्रम्पले लेखेका छन्, “मलाई विश्वास छ कि रुस र युक्रेनसँगको युद्ध समाप्त भएपछि चीनमाथि ५० देखि १०० प्रतिशतसम्म करवृद्धि गर्ने नेटोले पनि यो घातक तर हाँस्यास्पद युद्ध अन्त्य गर्न ठूलो सहयोग गर्नेछ ।” उनले थपे, “रुसमाथि चीनको बलियो नियन्त्रण छ र पकड पनि छ र यो शक्तिशाली करले त्यो पकड तोड्नेछ।”



ट्रम्पले गत हप्ता सात हजार ११८ जनाले जीवन गुमाएको उल्लेख गर्दै अघिल्लो प्रशासनको आलोचना गरे । उनले भने, “यो ट्रम्पको युद्ध होइन । यदि युद्ध शुरू हुँदा म राष्ट्रपति भएको भए यो सुरु हुने नै थिएन । यो बाइडेन र जेलेन्स्कीको युद्ध हो । मैले यहाँ यसलाई रोक्न मद्दत गर्न र हजारौँ रूसी र युक्रेनी जीवन बचाउन मात्र सक्छु। गत हप्ता मात्र सात हजार ११८ जनाले जीवन गुमाएका छन्।”



उनले भने, ‘यदि नेटोले उहाँको प्रस्तावलाई पछ्यायो भने युद्ध चाँडै अन्त्य हुने र ज्यान जोगाउने ट्रम्पको विश्वास छ । “यदि नेटोले मैले भनेजस्तै काम गर्यो भने, युद्ध चाँडै समाप्त हुनेछ, र ती सबैको जीवन बचाउनेछ, होईन भने, तपाईं केवल मेरो समय, र संयुक्त राज्य अमेरिकाको समय, ऊर्जा र पैसा बर्बाद गर्दै हुनुहुन्छ।”



 यो प्रस्ताव रुसी तेल आयातको निरन्तरताका कारण भारतीय सामानमा थप २५ प्रतिशत कर लगाएपछि आएको हो । शुक्रबार ट्रम्पले रुसी राष्ट्रपति भ्लादिमिर पुटिनप्रति बढ्दो निराशालाई सङ्केत गर्दै युक्रेन सङ्कट समाधानमा चुनौती देखिएको र दुवै पक्षको सहयोगको आवश्यकतालाई जोड दिएका थिए । ट्रम्पले चिनियाँ राष्ट्रपति सी जिनपिङले अमेरिकाविरुद्ध षड्यन्त्र गरेको आरोप पनि ट्रम्पले लगाएका छन् ।



 रुसी राष्ट्रपति भ्लादिमिर पुटिन र उत्तर कोरियाली नेता किम जोङ उनसहितका विश्व नेताहरू सहभागी भएकोसेप्टेम्बर ३ मा भएको चीनको अहिलेसम्मकै सबैभन्दा ठूलो सैन्य परेडपछि यो आरोप लगाइएको हो । दोस्रो विश्वयुद्ध समाप्त भएको ८० औं वर्षगाँठको अवसरमा चीनले सेप्टेम्बर ३ मा विशाल सैन्य परेड आयोजना गरेको थियो । चिनियाँ राष्ट्रपति सी जिनपिङले अमेरिकाविरुद्ध षड्यन्त्र गरेको आरोप लगाएपनि ट्रम्पले चिनियाँ नेतृत्वसँग आफ्नो व्यक्तिगत सम्बन्ध निकै राम्रो रहेको बताएका थिए ।

ट्रम्पले रूसमाथि थप कडा प्रतिबन्ध लगाउँदै तेल खरिद बन्द गर्न आग्रह

२९ भदौ, काठमाडौं । राष्ट्रपति रामचन्द्र पौडेलले राष्ट्रिय बाल दिवसका अवसरमा समस्त नेपाली बालबालिका तथा अभिभावकहरूमा शुभकामना व्यक्त गरेका छन् । नेपालले बाल अधिकारसम्बन्धी महासन्धी अनुमोदन गरेको दिनलाई आधार मानी हरेक वर्ष भदौ २९ गते राष्ट्रिय बाल दिवस मनाउँदै आएको छ । यस वर्षको बालदिवसका नारा ‘बालबालिकामा लगानीः सुनिश्चित भविष्यको थालनी’भन्ने रहेको छ । राष्ट्रपति पौडेलले सन्देशमा बालद दिवसले बालबालिकाका लागि शिक्षा, स्वास्थ्य, सुरक्षा एवं विकासमा ध्यान दिँदै आवश्यक लगानीको सुनिश्चितता प्रदान गर्ने अपेक्षा गरिएको बताएका छन् ।



 सन्देशमा भनिएको छ, “नेपालको संविधानले मौलिक हकका रूपमा बालबालिकाको हकलाई सुनिश्चित गरेको छ । बालबालिकाका सम्बन्धमा व्यवस्था गरिएका राष्ट्रिय र अन्तरराष्ट्रिय प्रतिबद्धता तथा संवैधानिक कानुनी प्रावधानहरूको प्रभावकारी कार्यान्वयन गर्न सरकारी तथा गैरसरकारी निकाय, नागरिक समाज, अभिभावक, विद्यालय एवं अन्य सरोकारवाला निकायहरूको एकीकृत र समन्वयात्मक भूमिका आवश्यक रहन्छ । बालबालिकाको हितलाई प्राथमिकतामा राखी समाज र राज्यलाई सचेततापूर्वक कार्यसम्पादन गर्न यस दिवसले उत्प्रेरणा प्रदान गर्ने विश्वास गर्न सकिन्छ ।”



उनले अझै पनि केही बालबालिका आफ्नो अधिकारबाट वञ्चित भएको कुरा सुन्नमा आउँछ, तसर्थ विभिन्न कारणले बालबालिकामा पर्ने असरतर्फ सबैको ध्यान आकृष्ट हुनु जरूरी छ भन्दै बालबालिकामाथि हुने सबै किसिमका अमानवीय व्यवहार, हिंसा तथा दुव्र्यवहार रोक्नु सम्बन्धित सरोकारवालाहरूको दायित्व रहेकोे छ ।



सन्देशमा भनिएको छ, “बालबालिकाको भविष्य सुनिश्चिात गर्न सृजनात्मक, व्यावहारिक, निःशुल्क र गुणस्तरीय शिक्षाको व्यवस्था, पोषणयुक्त आहार, सुरक्षित खानेपानी र सरसफाइ, आवश्यक खोप एवं बालमैत्री स्वास्थ्य संस्था एवं नीतिगत, कानुनी र बालमैत्री कार्यसम्पादनको प्रबन्ध गर्नु आवश्यक हुन्छ । बालबालिकालाई घर, विद्यालय र समुदायमा सुरक्षित वातावरण सृजना गरी सबै समूह र समुदायका बालबालिकालाई समन्यायिक अवसरको सुनिश्चितता प्रदान गर्न यस दिवसले सहयोग पुग्ने अपेक्षा गर्दछु ।”



बालबालिकाको संरक्षण, विकास र सहभागिताका लागि आआफ्नोतर्फबाट भूमिका निर्वाह गर्न सम्बद्ध सबै पक्षको ध्यानाकृष्ट हुनेछ भन्ने विश्वासका साथ यस दिवसले बालबालिकाहरूको सर्वाङ्गीण विकासका लागि सम्बद्ध सबैमा थप प्रेरणा मिलोस् भन्ने कामना राष्ट्रपति पौडेलले व्यक्त गरेका छन् ।

आज बाल दिवसः राष्ट्रपति पौडेलद्वारा शुभकामना

२८ भदौ, काठमाडौं । विघटित प्रतिनिधिसिभामा प्रतिनिधित्व गरेका आठ राजनीतिक दलले लोकतान्त्रिक एवं कानुनी राज्यमा सबै प्रकारका समस्याको समाधान संविधान र प्रचलित कानुन बमोजिम हुनुपर्नेमा जोड दिएका छन् । आज संयुक्त प्रेस विज्ञप्ति जारी गर्दै ती दलले सबै निकाय संविधान र कानुनअनुसार सञ्चालन हुनुपर्ने बताएका हुन् । संविधानसभाबाट जारी भएको सङ्घीय लोकतान्त्रिक गणतन्त्रात्मक संविधान विपरीतका कदम अस्वीकार्य हुने बताउँदै आठ दलले प्रतिनिधिसभा विघटन गरिएकामा असहमति जनाएका छन् ।



संवैधानिक सर्वोच्चता कायम हुनुपर्नेमा जोड दिँदै नेपाली कांग्रेस, नेपाल कम्युनिष्ट पार्टी (एमालें, नेपाल कम्युनिष्ट पार्टी (माओवादी केन्द्र), नेपाल कम्युनिष्ट पार्टी (एकीकृत समाजवादी), जनता समाजवादी पार्टी, जनमत पार्टी र लोकतान्त्रिक समाजवादी पार्टी नेपालका विघटित प्रतिनिधिसभाका प्रमुख सचेतक र नागरिक उन्मुक्ति पार्टीका अध्यक्षले हस्ताक्षर जारी गरेको विज्ञप्तिमा संसद् विघटनको निर्णय सच्च्याउन माग गरिएको छ ।

संसदका ८ दलले भने : समस्याको समाधान संविधानभित्रैबाट खोजिनुपर्छ

२८ भदौ, काठमाडौं । राष्ट्रपति रामचन्द्र पौडेलले आगामी फागुन २१ गतेका लागि निर्धारित प्रतिनिधिसभाको निर्वाचन सफलतापूर्वक सम्पन्न गराउन सबै पक्षलाई सहयोग गर्न अपिल गरेका छन् । राष्ट्रपति पौडेलले शनिबार एक वक्तव्य जारी गरी बडो जुक्तिले प्राप्त अवसरको सदुपयोग गर्दै जनता रिझाउने र आफैंमा सम्हालिँदै आगामी फागुनका लागि तोकिएको चुनाव सम्पन्न गराउन सबै पक्षलाई हार्दिक अपिल गरेका हुन् । राष्ट्रपति पौडेलले वक्तव्यमा भनेका छन्, “देशको अत्यन्त असहज परिस्थितिमा कठिन प्रयत्न पश्चात् एउटा शान्तिपूर्ण निकास निस्किएको छ । संविधान बचेको छ, संसदीय प्रणाली बचेको छ र सङ्घीय लोकतान्त्रिक गणतन्त्र कायम रहेको छ । छ महिनाभित्र प्रतिनिधिसभाको निर्वाचन सम्पन्न गरी अझ उन्नत लोकतन्त्रको बाटोमा अघि बढ्न जनताले अवसर पाएका छन् ।”

प्रतिनिधिसभाको निर्वाचनका निम्ति सहयोग गर्न राष्ट्रपतिको अपिल

२८ भदौ, काठमाडौं । नेपाल कम्युनिष्ट पार्टी (एमाले)ले संविधान, सङ्घीय लोकतान्त्रिक गणतन्त्रको रक्षाका लागि संविधान पक्षधर शक्तिहरूसँग सहकार्य गर्ने भएको छ । एमाले महासचिव शङ्कर पोखरेलले आज एक विज्ञप्ति निकालेर मुलुकमा उत्पन्न असमान्य परिस्थितिमाझ देशको संविधान, लोकतान्त्रिक गणतन्त्र र आन्दोलनका अन्य उपलब्धिको रक्षाका लागि संविधान पक्षधर शक्तिहरूबीच निरन्तर संवाद, समझदारी निर्माण र सहकार्य आवश्यक भएकामा जोड दिएका छन् । 



महासचिव पोखरेलले यही भदौ २७ गते पूर्वप्रधानन्यायाधीश सुशीला कार्कीलाई प्रधानमन्त्रीमा नियुक्त गरेपछि राजनीति नयाँ प्रक्रियामा प्रवेश गरेको उल्लेख गर्दै प्रधानमन्त्री नियुक्त हुने बित्तिकै उनकै सिफारिसमा राष्ट्रपति रामचन्द्र पौडेलबाट गरिएको प्रतिनिधिसभा विघटनको घोषणाप्रति नेकपा (एमाले) गम्भीर भएको बताएका छन् । एमालेले यही भदौ २३ र २४ गतेका घटनाको निष्पक्ष छानबिन गरी दोषीहरूलाई कानुनको दायरामा ल्याउनुपर्नेमा जोड दिएको छ ।

एमालेले संविधान पक्षधर शक्तिसँग सहकार्य गर्ने

कल्पना शाक्य, काठमाडौं (अधिवक्ता)



सन् १९१४ २८ जुनका दिन एक १९ वर्षीय युगोस्लाभिकियन स्कूले विद्यार्थी गाभ्रिलो प्रिन्सकीपले अस्ट्रो हंगेरियनका राजकुमारको गोली हानेर हत्या गरिदिन्छ । त्यसै हत्याको कारण युद्ध छेडिन्छ जुन ४ वर्षसम्म चल्छ र २ करोड भन्दा बढी मानिसको मृत्यु हुन्छ । यही एक घटनाको कारण प्रथम विश्वयुद्धको जन्म हन्छ, हेर्दाखेरी यस्तो देखिएतापनि यत्रो ठूलो युद्ध हुनुको पछाडि धेरै पहिलेदेखि कारणको बिऊ रोपिएको हुन्छ, कारणहरु थपिदै गएको हुन्छ । अनि फेरी कुनै एउटा घटना घट्छ चाहे सानै किन नहोस जसबाट ठूलै क्रान्ति अथवा युद्धको शुरुवात हुन्छ । मानौं एउटा डायनामाइटको पहाड छ त्यसमा एउटा सानो सलाईको काँटी फालेपछि डायनामाइट् विस्फोट हुन्छ तर वास्तवमा सलाईको कारणबाट बिस्फोट भएको नभई पहिलादेखि बिद्यमान डायनामाइटको कारण बिस्फोट भएको हो ।



नेपालमा भरखरै भएको सत्तै पल्टाउने गरी ‘जेनेरेशन जी’ अर्थात जेन्जी समुहले गरिएको आन्दोलन सामाजिक सञ्जालमा सरकारले लगाएको प्रतिबन्धको कारण भएको जस्तो देखिएतापनि प्रजातन्त्र प्राप्ति पश्चात २०४६ साल देखिकै दलीय अकर्र्मण्यता, २०६३ सालपछिको माओवादीको खुला राजनीतीमा प्रवेशपछिको गणतन्त्रीय लोकतान्त्रिक व्यवस्था पनि झन् झन् निरंकूशता तर्फ बढीरहेको राजनीतिबाट जनताहरु वाक्क, दिक्क, प्याक्क भएर थुक्क गर्ने अवस्थासम्म आईपुग्नुनै मुख्य कारण हो ।



लोकतन्त्रले जनतालाई बोल्ने बिरोध गर्ने अधिकार त दियो तर जनताको बोली नेतृत्व तहबाट सुन्दै सुनिएन । कानमा तेल हालेर बसियो, एउटा कानबाट सुनेर अर्को कानबाट उडाईयो । त्यसपछि जनता बोल्नु ब्यर्थ हुन थाल्यो । तिमीहरु जति कराओ जति उफ्र फेरी पनि चुनाव हामीले नै जित्ने हो भन्ने आत्मविश्वास र अहमले गर्दा नेताहरु मनपरी गर्नबाट टसकामस भएनन् । लोकतन्त्र होईन मनपरितन्त्र चलाईरहे । ४६ साल देखिनै जतिनैसुकै भ्रष्टाचारका काण्ड घटुन् ठूलाठूला भ्रष्ट्राचारका मुद्दामा दोषिले सधै सफाई पाईरहे । कानुन सानालाई ऐन ठूलालाई चैन बनेर रह्यो ।



पछिल्लो समयमा बालेन शाह, हर्क साम्पाङ्, गोपाल हमाल, राष्ट्रिय स्वतन्त्र पार्टीका उम्मेदवारहरुको लोकप्रियताबाट भने भूत देखे जस्तै बूढा नेताहरु तर्सिन थाले । जनताको ब्यापक बिरोध हुँदाहुँदै पनि कुलमन घिसिङ्लाई उनको लोकप्रियताको आरिसै आरिसले र आफुहरुले ईन्भर्टर र सोलार व्यवसायीकाट कमिशन खान नपाएपछिको झोकमा बिद्युत प्राधिकरणबाट बिदाई गरेर आफ्ना खेलौना हितेन्द्रमान शाक्यलाई नियुक्ति दिए । कुलमानले नाफामा लगेको संस्थालाई ती खेलौनाले नियुक्ति पाएको भोलीपल्टै घाटा देखाईदिए र अघोषित लोडसेडिङ् पनि शुरु गरे । यस्तै यस्तै घटनाक्रमहरुबाट लोकतन्त्र निरंकुशतन्त्र बनिसकेको भान जनताले पाईसकेका थिए । लोकप्रिय युवापुस्ताको उदय पश्चात भने जनतालाई “कहाँ जालास ढडिया मेरै पञ्जामा” भनेर जिस्काईरहेका पुराना नेताहरु आगामी चुनाव हारिने शंकाले शाम दाम दण्ड भेद अपनाएर नयाँ जतिलाई फसाउने षडयन्त्र बुन्नमै तल्लीन रहे र राजनीतिक प्रतिसोध राखेर खत्तम पार्ने दौडमा लागे । श्रीलंका, बङ्गलादेशमा भएको र ईएण्डोनेशियामा भईरहेको जनता नेताको घरघरमै गई घिसार्दै कुटेको लखेटेको र सत्ता नै पल्टाएको घटना सबैले देखैकै हो । तर नेपालका ज्याद्रो नेताहरुलाई नेपाली जनताले पनि यसो गर्न सक्नेमा विश्वासै थिएन । ३६ वर्षदेखि आफुहरुले जतिसुकै अन्याय, अत्याचार, भ्रष्टाचार गरे पनि चुनाव जित्दै आएकोले यिनीहरु सम्पत्ति र शक्तिको आडमा अन्धा भईसकेका थिए शायद । तर हालसालै ईएण्डोनेशियाली जनताले नेताका छोराछोारीको बिलासी जिवनको बिरोधबाट शुरु हुँदै श्रीलंका र बंगलादेशमा जस्तै बिध्वंश मच्चाउन थाले नेपाली जेन्जी पुस्ताले पनि नेताको छोराछोरीको अम्बानी परिवार सहरको लाईफ स्टाईलमाथि प्रश्न उठाउँन थालेपछि भने शायद आगामी चुनाव हारिने डरले सातो गएर सामाजिक सञ्जालनै बन्द गर्ने निर्णय गरे ।



पढ्न दिए भने बाठा हुन्छन्, बुझ्ने भएपछि हाम्रो शासनको बिरोध गर्छन भनेर जनताका छोराछोरीलाई पढ्न नदिने राणा शासन र सामाजिक सञ्जालको प्रयोगबाट देश विदेशमा घटित राजनीतिक परिस्थितिका बारे बुझ्छन् अनि हाम्रो पनि पत्तासाफ गर्न सक्छन् भनेर जनतालाई सूचनाको हकबाट कुण्ठित गर्न खोज्ने कथित लोकतन्त्रको ठेकेदार भनौदा तिमी नेताहरुमा के फरक रह्यो र?



के फेरी राणा शासन फर्काउनलाई नेपालीले राजा फालेका हुन र? उखान बोलिरहन्थे “केटाकेटी आए गुलेली खेलाए मट्याङ्खरा सत्यानास” भन्दै । आज तिमी बुढाहरुभन्दा धेरै बुद्धिमता र सुझबुझ देखाए ति केटाकेटीरुले । तिमी बुढाहहरुको अनुभवले नेपाली जनतालाई के दिन सक्यौ आजसम्म? विश्वसामु के ईज्जत जोगाउन सक्यौ जहाँ जादा पनि हात जोरेर भिख मागेर आउँछौ, भारतको राजदूतको नोकर को हैसियत राख्छौ यो भन्दा धेरै तिमीहरुको अनुभवले के ख्यासेका छौ? आन्दोलनको दोश्रो दिन जुन विध्वंश भयो त्यो जेन्जीले गरेको थिएन । अन्य दलहरु र व्यक्तिहरु घुसेको प्रमाणितै छ । जेन्जीले हात नहाल पुलिसलाई जिम्मा लगाउ भनेर बारम्बार भनि पुलिसलाई जिम्मा नलाएको भए शायद देउवा दम्पति थोरै घाईते मात्र भएर उम्कन पाउदैन थिए होला । उनिहरुको राजनीतिक एजेण्डा, एकदिन अगाडिनै गरिएको शान्तिपूर्ण आन्दोलनको घोषणा, आन्दोलनको पहिलो दिन गरिएको शान्तिपूर्ण बिरोध कार्यक्रमबाट उनिहरुको राजनैतिक चेतना, बौद्धिकता र धैर्यवानताको परिक्षामा उनीहरु पास भईसकेका छन् ।



अर्को तर्फ निहत्था युवाहरुको टाउकोमै गोली प्रहार गर्ने नालायक सरकारको निरंकुशता पनि प्रमाणित भईसकेको छ । दोश्रो दिन भएको निरंकुश भ्रष्टाचारीहरुको निजी सम्पत्तिमा आगजनि हुनुमा अन्य शक्तिहरुको हात भएको शंका गरिएतापनि १८ जनाको हत्याको अगाडि सिन्को भाँचेजति पनि भएन । तर सत्तामा बसेका सबै भ्रष्टाचारी थिएनन् होला भ्रष्ट बाहेकका अरुको घर जल्नु, सरकारी सम्पत्तिमा आगलागी र जेल तोड्नु कैदी भगाउनु, निजी निवास जलाउदा घरभित्रै रहेका मानिस जल्नु त्यो दुःखद घटना हो । तर यसको दोष जेन्जीलाई नदिऊ । यसमा आफुहरुको संलग्नता नरहेको कुरा उनीहरुले बारबार पुष्टि गरिसकेका छन् । घटनास्थलको भिडीयोहरु हेर्दा पनि यो कुरा प्रमाणित हुन्छ । सदियौंदेखिको ईतिहास हेर्दा पुष्टि भईसकेको कुरा हो कलिला युवाहरुकै कारण ठूलाठूला क्रान्ति सफल भएका छन् । नेपालका जेन्जी पनि देशमा निकाकसकोक बाटो खोल्न सफल भयो अब यी निरंकुश नेताहरुलाई राजिनामा दिएकै भरमा छाड्ने हो भने भोलीको पुस्ताले पनि परिघटना नदोहोर्याउलान भन्न सकिन्न । त्यसैले तपाई जेन्जीहरु यिनी देश लुट्नेहरुलाई कानुन कारवाही गर्न मरिमेटेर लाग्नुहोस् ।



अनि अर्को सत्य यो पनि हो कि पद, पैसा र पावर प्राप्त भएपछि मानिसमा घमण्ड पलाउन थाल्छ यो स्वभाविक हो । अहिलेका नेताहरु पनि धेरै वर्ष भुमिगत भएर, जेल जिवन भोगेर देश बनाउँछु भनेरै आएका थिए तर पदमा पुगेपछि पावर हातमा परेपछि आफ्नो लक्ष्य बिर्सिए, पैसा देख्न थालेपछि पुरानो दुःख सबै बिर्सिए । उखाने बाको मात्र कति उखान सुन्नु आज हामी पनि उनलाई उखान सुनाईदिऊ न है “पैसा देखेपछि महादेवको त तिन नेत्र” भन्छन् तिमी नाथे सुकुम्बासीहरुको किना माथा नरन्कीयोस ! रावण प्रकाण्ड बिद्धान थिए, धर्मात्मा थिए, शिवका महान भक्त थिए तर आफ्नो बौद्धिकता, शक्ति, सम्पत्ति, पराक्रम यी सब कारणहरुले गर्दा उनमा पलाएको अहम बढ्रदै जाँदा उनको पतन भयो । हो अब यही कुरा नयाँ पुस्ताले पनि बुझ्नु जरुरी छ । तपाईहरु आजको दिनसम्म जति प्रशंसा गरेपनि नपुग्ने अवस्थामा हुनुहुन्छ, भोली बागडोर तपाईहरुको हातमा पुगेपछि दम्भ र लोभले तपाईहरुलाई अनि भोली चुनाव जितेर आउने जोसुकैलाई पनि छुन सक्छ यसबाट आफूलाई जोगाउनहोस । मेरो गोरुको बाह्रै टक्का भन्ने सोचेर अगाडी बढ्नु हँदैन । किनभने संसारमा सबै कुरा परिवर्तनशिल छ । अब बन्ने सरकारले पनि पुरानैको बाटो अपनाए भने पुन: नयाँ जेन्जीले लखट्नेछन् । त्यसैले तपाईहरु दामको मात्र होईन, नामको पनि लोभ नगर्नुस । निस्वार्थ भावले काम गर्दै जानुहोला तपाईहरुले देशको मुहार फेर्न सक्नुहुनेछ ।



विनाश नभई विकास हुँदैन त्यस्तै हरेक अवसरसँगै चुनौती पनि सँगसँगै आउँछन् । जति ठूलो अवसर त्यति नै ठूलो चुनौति । यो संकटको घडीमा हामीले बुद्धिमता, धैर्यता, संयमता अपनाएनौ भने भारत, चीन र अमेरीकाको हस्तक्षेप छिर्न सक्छ । अबको अवस्था भनेको संक्रमणकालको अवस्था हो । हामी सबै बच्चा, युवा बूढापाका सबै नेपाली मिलेर देशको स्वाभिमान् जोगाऊ । यो लेख लेख्दै गर्दा मेरो कानमा आन्दोलनका सामाजिक सञ्जालमा भेटिएका भिडियो क्लिपहरुमा ब्याकग्राउण्डमा बजिरहेको गीतो लय सहित गुञ्जिरहेको छ, “म नेपाल बाँचेको हेर्न चाहन्छु, म नेपाल हाँसेको हेर्न चाहन्छु”

नेपालमा जेन्जी बिद्रोहको कारणसँग बिगत

२६ भदौ, काठमाडौं । राष्ट्रपति रामचन्द्र पौडेलले संवैधानिक दायरामा रहेर निकास दिनका लागि आफूले प्रयासरत रहेको बताएका छन् । उनले आज एक वक्तव्य जारी गरेर उनले यस्तो बताएका छन् । ‘देशको अहिलेको विषम परिस्थितिमा मुलुकलाई संवैधानिक दायरामा रहेर कसरी निकास दिन सकिन्छ र मुलुकमा लोकतन्त्रको संरक्षण तथा शान्ति सुव्यवस्था कसरी कायम गर्न सकिन्छ भनेर म विचार विमर्श एवं हर प्रयास गर्दैछु,’ उनले वक्तव्यमा भनेका छन् । 



सामाजिक सञ्जालमा भने उनको खोजी भइरहेको छ । प्रधानमन्त्री चयनमा सेना सक्रिय भएको र राष्ट्रपति गायव भएको भन्दै उनको खोजी भएको हो । उनको भिडियो वक्तब्य आउनु पर्ने माग समाजिक संजालमा भइरहेको छ ।

राष्ट्रपतिको छोटो सन्देश : संवैधानिक दायरा भित्रैबाट निकास दिन्छु

२६ भदौ, काठमाडौं । नेपाल कम्युनिष्ट पार्टी (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संविधान र संसद्को शून्यतामा खोजिने राजनीतिक निकासले प्रतिगमनलाई नै फाइदा पु¥याउने भएकाले अहिलेको सङ्क्रमणकालीन अवस्थाको हल संविधानसम्मत तरिकाबाट खोजिनुपर्ने बताएका छन् । 



पूर्वप्रधानमन्त्री समेत रहेका पार्टी अध्यक्ष दाहालले संविधान कार्यान्वयनमा देखिएका चुनौतीको गम्भीर समीक्षासहित समावेशी लोकतन्त्रको रक्षा गर्दै प्रत्यक्ष कार्यकारी रहने राजनीतिक प्रणालीका पक्षमा संविधान संशोधन गर्न सकेमात्रै समुन्नत लोकतन्त्रको विकास गर्न सकिने बताए । “यो पक्षलाई अत्यन्तै संवेदनशील र गम्भीर रुपमा लिएर आन्दोलनकारी पक्षले आफ्नो भावी रणनीति विकास गर्ने विश्वास लिएका छौँ”, अध्यक्ष दाहालद्वारा आज जारी वक्तव्यमा भनिएको छ ।



‘जेन–जी’ आन्दोलनका ‘एजेन्डा’ले यथास्थिति र तदर्थवादी शासन प्रणालीको साटो उन्नत लोकतन्त्रको माग गरेको उल्लेख गर्र्दै अध्यक्ष दाहालले यो स्थितिमा आन्दोलनभित्र घुसेर प्रतिगामी तत्वहरुले तोडफोड, आगजनी र विध्वंसमार्फत बलिदानीपूर्ण सङ्घर्षबाट प्राप्त उपलब्धिलाई उल्ट्याउने ढृष्टता गरिरहेका बताए । “हाम्रो स्पष्ट मत छ, लोकतन्त्रको विकल्प समुन्नत र अझ बढी सुदृढ लोकतन्त्र, गणतन्त्रको विकल्प अझ सुदृढ गणतन्त्र मात्रै हो”, उनले भने ।



 अध्यक्ष दाहालले सङ्क्रमणकालीन परिस्थितिको फाइदा उठाउँदै धमिलो पानीमा माछा मार्ने प्रतिगामी षडयन्त्रविरुद्ध सचेत रहँदै एकजुट भएर अघि बढ्न शान्ति, संविधान र गणतन्त्र पक्षधर सम्पूर्ण शक्ति तथा आमजनसमुदायसँग अपिल गरे । माओवादी केन्द्रका अध्यक्ष दाहालले जनताको जीउधन, सार्वजनिक संरचना र निजी सम्पत्तिमा तोडफोड, लुटपाट तथा आगजनीलगायत गतिविधि हुनसक्ने सम्भावनाप्रति सजग रहँदै जनतालाई आइपर्ने कुनै पनि खालको समस्यासँग जुध्नका लागि तम्तयार रहन पार्टीपङ्क्तिलाई निर्देशित गरेका छन् । यसैगरी, समुन्नत उहाँले लोकतन्त्रको सपना सोचेर सुशासनका पक्षमा ‘जेन–जी’ पुस्ताले आह्वान गरेको आन्दोलनमा सहादत प्राप्त गर्ने सम्पूर्ण युवामा श्रद्धाञ्जलि तथा परिवारजनमा संवेदना र घाइतेहरूको शीघ्र स्वास्थ्यलाभको कामना गरेका छन् ।



 आन्दोलनका कैयन् पीडादायी पक्ष भएपनि समग्रमा राष्ट्रले अग्रगमनतर्फ अघि बढ्ने सम्भावनाको ढोका खोलेको उनले बताए । अध्यक्ष दाहालले वक्तव्यमार्फत आन्दोलनमा क्रममा भएका हिंसात्मक गतिविधि, तोडफोड, आगजनी, लुटपाटजस्ता घटनाको उच्चस्तरीय न्यायिक छानबिन गर्न समेत माग गरेका छन् ।

अहिलेको सङ्क्रमणकालीन अवस्थाको निकास संविधानसम्मत तरिकाबाट खोजिनुपर्छः माओवादी अध्यक्ष दाहाल

२४ भदौ, काठमाडौं । राष्ट्रपति रामचन्द्र पौडेलले विषम परिस्थितिको शान्तिपूर्ण समाधानका लागि आन्दोलनकारी एवं नागरिकलगायत सबैलाई सहयोग गर्न आग्रह गरेका छन् । उनले आज विज्ञप्तिमार्फत लोकतन्त्रमा नागरिकले उठाएका मागहरू जेनजीका प्रतिनिधिसमेत बसी वार्ता र संवादमार्फत समाधान गर्न सकिने भएकाले संयमित हुन र वार्तामा आउन सबै पक्षलाई अपिल गरे । 



उनले प्रधानमन्त्री केपी शर्मा ओलीको राजिनामा स्वीकृती भइसकेकाले अहिलेको विषम परिस्थितिबाट मूलुक, जनता र लोकतन्त्रलाई माया गर्दै समस्या समाधानका लागि सबै पक्षले सहयोग गर्नुहुनेछ भन्ने विश्वास व्यक्त गरेका छन् ।

राष्ट्रपति पौडेलद्वारा वार्तामा आउन सबै पक्षलाई अपिल

२४ भदौ, काठमाडौं । काठमाडौं महानगरपालिकाका मेयर बालेन्द शाह बालेनले उग्र प्रदर्शनमा उत्रिएका जेनजीहरूलाई संयमित हुन आग्रह गरेका छन् । उनले सामाजिक सञ्जालमाफर्त यस्तो आग्रह गरेका हुन् । ‘तपाईं–हामी अब संयमित हुनु जरुरी छ । अब तपाईंको पुस्ताले नै देशको नेतृत्व गर्नु पर्नेछ,’ मेयर शाहले भनेका छन्, ‘तयार रहनुहोला ।’ अहिले देशैभरी प्रदर्शन उग्र बनेको छ । नेताका घरहरुलाई लक्षित गरी आन्दोलन गरिएको छ ।

प्रदर्शनमा संयमित हुन बालेनको आग्रह

२४ भदौ, काठमाडौं । नेपाली कांग्रेसका महामन्त्री गगन थापाले कांग्रेस सरकारबाट तत्काल फिर्ता हुनुपर्ने बताएका छन् । महामन्त्री थापाले कांग्रेस एक दिन पनि यो परिस्थितिको थप साक्षी र साझेदारका रुपमा रहनुहुँदैन, रहन सक्दैन नसक्ने उल्लेख गरेका छन् ।



‘नेपाली कांग्रेस सरकारबाट तत्काल फिर्ता हुनुपर्छ। पार्टीको बैठकबाट यो निर्णय गराउन म लाग्नेछु’, महामन्त्री थापाले सामाजिक सञ्जालमा लेखेका छन्,‘रातभर सुत्न सकिन । म जस्तै देशभित्र र बाहिर रहेको सिंगो नेपाल सुत्न सकेको छैन। अबोध युवाहरू अनाहकमा मारिएको त्यो क्रुर दृष्य आँखा अगाडि घुमिरहेको छ। प्रधानमन्त्रीज्यूले यो दमनको जिम्मा लिएर अबिलम्ब पद छोड्नुपर्छ ।’

बिचार

Vishwa Sandesh Newspaper Inc.

Address

USA:

Nepal:

Contact Information

Email:

Phone: