१९ कात्तिक, काठमाडौं । युरोपको हवाई क्षेत्रमा एक्कासि शृङ्खलाबद्ध रूपमा आएका बम धम्कीका कारण बिहीबार युरोपभरका विभिन्न विमानस्थल तथा उडानहरूमा ठूलो हलचल पैदा भएको छ। डब्लिन, लन्डन, वारसा, मिलाउन, एथेन्स र हेल्सिङ्की जस्ता प्रमुख सहरहरूबाट उडान भरेका कम्तीमा १८ वटा व्यावसायिक उडानहरूलाई लक्षित गरी बम राखिएको धम्की दिइएपछि कतिपय विमानहरूलाई आपत्कालीन रूपमा अन्यत्रै मोडिएको छ । कतिपयलाई लडाकु विमानको सुरक्षा घेराभित्र अवतरण गराइएको छ।



अहिलेसम्म गरिएका सम्पूर्ण सुरक्षा जाँचहरूमा कुनै पनि प्रकारको विस्फोटक पदार्थ वा शङ्कास्पद वस्तु फेला परेको छैन। अधिकारीहरूले यसलाई आतङ्क र अन्योल सिर्जना गर्ने उद्देश्यले गरिएको दुर्भावनापूर्ण झुटा धम्की भएको पुष्टि गरेका छन्। बिहीबार बिहानैदेखि युरोपका विभिन्न एयरलाइन्स तथा विमानस्थलका इमेल र सञ्चार प्रणालीमा शृङ्खलाबद्ध रूपमा धम्कीपूर्ण सन्देशहरू आएका थिए। यस घटनाबाट युरोपका धेरैजसो प्रमुख वायुसेवा कम्पनीहरू र विमानस्थलहरू प्रभावित बनेका छन् । 



डब्लिनबाट रोमका लागि १५१ जना यात्रु र ६ जना चालक दलका सदस्य लिएर उडेको एर लिङ्गसको उडानलाई उडानकै क्रममा बमको धम्की आएपछि फ्रान्सको नोर्मान्डीस्थित इभ्रेक्स फौभिल सैन्य हवाई अड्डामा आकस्मिक अवतरण गराइएको थियो। यात्रुहरूलाई दुई घण्टाभन्दा बढी विमानभित्रै राखेर तालिमप्राप्त कुकुर तथा सैन्य टोलीले गहन खोजी गरेका थिए।



बेलग्रेडबाट रोमानियाको बुकारेस्टतर्फ उडेको एयर सर्बियाको उडानलाई पनि गन्तव्यमा पुग्ने क्रममा बमको धम्की दिइएको थियो। विमान सुरक्षित रूपमा बुकारेस्टमा अवतरण भएपछि प्रहरीले जाँच गरी धम्की निराधार रहेको पुष्टि गरेको छ। मड्रिड–बाराजास विमानस्थललाई लक्षित गरी इबेरियाका दुई उडानहरू (मिलानबाट मड्रिड र रोमबाट मड्रिड) मा बम राखिएको सन्देश प्राप्त भएको थियो। विमानहरूलाई मड्रिडमा सुरक्षित अवतरण गराई यात्रुहरूलाई सामान्य प्रक्रियाबाटै ओरालेर जाँच गरिएको थियो।



बेलायतका न्युकासल र ग्लास्गोबाट चेक गणतन्त्रको प्रागका लागि उडेका दुई वटा इजिजेटका उडानहरूसहित प्राग पुगेका कुल ४ वटा विमानहरूलाई बमको आशङ्कामा प्रहरी र सुरक्षा निकायले घेरेर विशेष जाँच गरेका थिए। ग्रिसको एजीयन एयरलाइन्सका थिस्सालोनिकीबाट मिलान र एथेन्सबाट भियना जाँदै गरेका दुई उडानमा धम्की आएको थियो। भियना जाँदै गरेको विमानमा ग्रिसका उपविदेशमन्त्री तासोस च्यात्जिभासिलिओयु समेत सवार थिए।



बेलायतको लन्डन स्थित हिथ्रो र बर्मिङ्गम विमानस्थलले पनि बिहीबार बिहान धम्कीपूर्ण सन्देश प्राप्त भएको पुष्टि गरेका छन्। यद्यपि, हिथ्रो विमानस्थलले यसलाई गैरविश्वासयोग्य ठहर गर्दै उडान सञ्चालन सामान्य राखेको थियो। फिनल्यान्डको फिनएयर पोल्यान्डको लट विज एयरर रायन एयरका उडानहरू समेत यसबाट प्रभावित भएका छन्। पोल्यान्डको वारसाबाट पेरिस उड्न लागेको लटको विमानलाई धावनमार्गबाटै फर्काएर सुरक्षा जाँच गरिएको थियो।



धम्कीको प्रकृति गम्भीर र विशिष्ट देखिएपछि विभिन्न देशका वायुसेनाले आफ्ना लडाकु विमानहरू परिचालन गरेका थिए । अस्ट्रियाको रक्षा मन्त्रालयका प्रवक्ता माइकल बाउरका अनुसार, अस्ट्रियाली आकाशमा प्रवेश गरेका प्रभावित नागरिक विमानहरूलाई सुरक्षा दिन यूरोफाइटर लडाकु विमानहरू परिचालन गरिएको थियो।



इटाली र बुल्गेरियाको वायुसेनाले पनि आफ्नो क्षेत्रमा प्रवेश गरेका शङ्कास्पद उडानहरूलाई एस्कर्ट गर्दै विमानस्थलसम्म पुर्‍याएका थिए। डब्लिनबाट रोम जाँदै गरेको विमानका यात्रुहरूले अवतरणका क्रममा लडाकु विमानहरूको आवाज सुनेको र पछाडि अवतरण गरेको देखेको बताएका छन्।



इटालीका विमानस्थल अधिकारीहरूसँगको कुराकानी अनुसार, रोमका विमानस्थलहरूलाई प्राप्त धम्कीपूर्ण इमेलमा ,मेल स्टेटका योद्धा, भन्ने समूहको नाम उल्लेख गरिएको छ। इमेलमा उनीहरूले नारीवादी शासनलाई लक्षित गरेको र आकाशलाई रातो बनाइदिने जस्ता चेतावनी दिएका थिए।



यद्यपि, युरोपेली सङ्घका यातायात आयुक्त अपोस्टोलोस त्जित्जिकोस्टासले यी सबै धम्कीहरू आपसमा जोडिएका छन् या छैनन् भन्नेबारे अहिल्यै निष्कर्षमा पुग्न हतार हुने बताएका छन्। उनले भने, हामी अवस्थालाई नजिकबाट नियालिरहेका छौँ। राष्ट्रिय अनुसन्धान एजेन्सीहरूले यसको गहिरो अध्ययन गरिरहेका छन्।’



विमानस्थल सुरक्षा विशेषज्ञ प्राध्यापक फिलिप बाउमका अनुसार, विमानसेवा क्षेत्रले दैनिक जसो धम्कीहरू सामना गर्ने भए तापनि एकैदिन यति धेरै विशिष्ट र गम्भीर प्रकारका धम्कीहरू आउनु असामान्य हो। यस्ता झूटा धम्कीहरूले उड्डयन सुरक्षा प्रणालीलाई अल्मल्याउने, आर्थिक क्षति पुर्‍याउने र मानिसहरूमा त्रास फैलाउने काम गर्दछन्।



बेलायतकी यातायात मन्त्री हेडी अलेक्जेन्डरले घटनाबारे प्रतिक्रिया दिँदै युरोपभरका उडानहरू दुर्भावनापूर्ण झुटा धम्कीबाट प्रभावित भएको पुष्टि गरिन्। उनले भनिन्, हामी यस्ता धम्कीहरूलाई अत्यन्त गम्भीरताका साथ लिन्छौँ। तर अहिलेको अनुसन्धानले यो पूर्ण रूपमा अफवाह र झुटो धम्की मात्रै भएको देखाएको छ।’ यस्तै, बेलायती सरकारका प्रवक्ताले बिहीबार बिहानैदेखि सुरु भएको यो तनावपूर्ण स्थिति अब नियन्त्रण र हल इसकेको जानकारी दिएका छन्।



अन्तराष्ट्रिय सञ्चारमाध्यमहरुको सहयोगमा

युरोपभरका हवाई सेवामा बम धम्कीको तरङ्ग, १८ भन्दा बढी उडान प्रभावित

१९ कात्तिक, काठमाडौं । अमेरिकाको मध्यावधि निर्वाचनमा प्रमुख विपक्षी डेमोक्रेटिक पार्टीले संसद्का दुवै सदनमा बहुमत हासिल गरेको छ । राष्ट्रपति डोनाल्ड ट्रम्पको सत्तारूढ रिपब्लिकन पार्टीले दुवै सदनमा बहुमत गुमाएको छ । यस परिणामसँगै राष्ट्रपति डोनाल्ड ट्रम्पको बाँकी दुई वर्षको कार्यकालका लागि रिपब्लिकन पार्टीको एकल वर्चस्व अन्त्य भएको अमेरिकी निजी टेलिभिजन संस्था सिएनएनले जनाएको छ । अमेरिकामा मङ्गलबार मध्यावधि निर्वाचन भएको हो ।



निर्वाचनको यो परिणामले राष्ट्रपति ट्रम्पले बाँकी दुई वर्षको कार्यकाल डेमोक्रेटिक पार्टीसँग मिलेर काम गर्नुपर्ने बाध्यात्मक अवस्था सिर्जना भएको छ । चरम महँगीले जीवनयापनको बढ्दो लागत, भन्सार शुल्क र इरानसँगको युद्धप्रति मतदाताको असन्तुष्टि निर्वाचन परिणाममा प्रतिविम्बित भएको छ । ८० वर्षीय राष्ट्रपति ट्रम्पले निर्वाचन परिणाम स्वीकार गर्ने बताउँदै डेमोक्रेटहरूले राम्रो चुनावी अभियान सञ्चालन गरेको प्रशंसा गरे । उनले रिपब्लिकनहरूको हारलाई आफ्नो व्यक्तिगत पराजय मान्न अस्वीकार गरे ।



 डेमोक्रेटहरूले मेन, टेक्सास, कन्सास, आयोवा, दक्षिण क्यारोलिना, उत्तर क्यारोलिनालगायत राज्यमा सफलता हासिल गरेका छन् । मेनमा ट्रोय ज्याक्सनले रिपब्लिकन सिनेटर सुसान कोलिन्सलाई पराजित गरे । जर्जियामा केइसा लान्स बटम्स अमेरिकी इतिहासकै पहिलो अश्वेत महिला गभर्नर निर्वाचित भइन् । दुवै सदनमा बहुमत पाएपछि डेमोक्रेटहरूले इरान युद्ध, आप्रवासन नीति र भ्रष्टाचारका आरोपमाथि अनुसन्धान गर्न तथा ट्रम्पका विधेयक र सरकारी नियुक्तिलाई चुनौती दिने सम्भावना बढेको छ । 



राष्ट्रपति ट्रम्पले डेमोक्रेटहरूले पारित गरेका विधेयकमा राष्ट्रपतीय भिटो प्रयोग गर्ने चेतावनी भने दिएका छन् । यसले आगामी दुई वर्ष अमेरिकामा राष्ट्रपति र संसद्बिचको राजनीति पेचिलो बन्ने सम्भावना बढेको छ । यद्यपि द न्युयोर्क टाइम्ससँगको अन्तर्वार्तामा राष्ट्रपति ट्रम्पले निर्वाचनको परिणाम स्विकार्न आफू पूर्ण रूपमा तयार रहेको बताउँदै डेमोक्रेटहरूसँग सहकार्य गरेर केही काम गर्न सकिने उल्लेख गरे ।



हारको कारण युद्ध र महँगी



राष्ट्रपति ट्रम्पले मध्यावधि निर्वाचनमा रिपब्लिकन पार्टीको पराजयमा इरान युद्धले भूमिका निर्वाह गरेको स्वीकार गर्दै विपक्षी डेमोक्रेटिक पार्टीलाई बधाई दिए । इरान युद्ध र बढ्दो तेलको मूल्य मतदातामाझ अलोकप्रिय बनेको स्वीकार गर्दै उनले युद्ध निर्वाचन परिणाम प्रभावित पार्ने एउटा कारण भएको बताए । यद्यपि इरानप्रति आफूले अपनाएको नीतिको महत्व मतदाताले बुझेको उनको दाबी थियो । राष्ट्रपति ट्रम्पले टेक्सासका गभर्नर ग्रेग एबटको आलोचना गर्दै उनी नाम मात्रका रिपब्लिकन भएकाले पराजित भएको टिप्पणी गरे । 



अमेरिकी समाचार संस्था एपीका अनुसार तल्लो सदनको ४३५ सिटमध्ये बहुमतका लागि आवश्यक २१८ सिट पार गर्दै डेमोक्रेटिक पार्टीले २३१ सिट जितेको छ भने रिपब्लिकनले १३९ सिट प्राप्त गरेको छ । एनबिसी न्युजको विश्लेषण अनुसार डेमोक्रेटिक पार्टीले अन्तिम नतिजा आउँदा कम्तीमा २५२ सिट पु¥याउने अनुमान छ । माथिल्लो सदनका कुल १०० सिटमध्ये ३५ सिटका लागि मतदान भएकोमा डेमोक्रेटिक पार्टीले कुल ५४ सिट र रिपब्लिकन पार्टीले ४४ सिट जितेका छन् । डेमोक्रेटिक पार्टीले रिपब्लिकन पार्टीको गढ मानिएका राज्यहरू–टेक्सास, ओहायो, कान्सास, आयोवा, मेन, उत्तर क्यारोलिना र दक्षिण क्यारोलिनामा जित निकाल्दै सिनेटमा ५४ सिटसहित पूर्ण बहुमत सुनिश्चित गरेको छ ।



गभर्नरमा ऐतिहासिक नतिजा



विभिन्न राज्यका गभर्नर पदमा पनि डेमोक्रेटिक पार्टीले महत्वपूर्ण जित हासिल गरेको छ । टेक्सासमा डेमोक्रेट गिना हिनोजोसाले तीन कार्यकालदेखि गभर्नर रहेका रिपब्लिकन ग्रेग एबोटलाई पराजित गर्दै सन् १९९० यता पहिलो पटक सो राज्यमा गभर्नर बन्न सफल हुनुभएको छ । डेमोक्रेटिक पार्टीबाट किसा लान्स बटम्स जर्जियाको इतिहासमै पहिलो अश्वेत महिला गभर्नर निर्वाचित भइन् । डा. एमी एक्टनले रिपब्लिकन उम्मेदवार विवेक रामास्वामीविरुद्धको प्रतिस्पर्धा जित्दै ओहायोको पहिलो महिला गभर्नर बनेर इतिहास रचिन् ।



 चुनावी परिणामप्रति अमेरिकाका पूर्वराष्ट्रपति बाराक ओबामाले आफ्नो पार्टीको ठुलो जित अमेरिकीहरू परिवर्तन चाहन्छन् भन्ने प्रमाण भएको बताए । इरानी संसद्का सभामुख तथा मुख्य वार्ताकार मोहम्मद बागेर गालिबाफले अमेरिकी जनताले मतमार्फत युद्धलाई अस्वीकार गरेको दाबी गरे । अमेरिकामा हाउस अफ रिप्रिजेन्टेटिभ अर्थात् प्रतिनिधि सभाका सदस्यको कार्यकाल दुई वर्ष, राष्ट्रपतिको चार वर्ष र सिनेटका सदस्यको छ वर्ष हुन्छ ।



प्रत्येक दुई वर्षमा प्रतिनिधि सभाका सबै सदस्यका लागि निर्वाचन हुन्छ । त्यही बेला सिनेटका करिब एक तिहाइ सदस्यको कार्यकाल सकिने भएकाले ती पदका लागि पनि सम्बन्धित राज्यमा निर्वाचन हुन्छ । राष्ट्रपतिको चारबर्से कार्यकालको बिचमा अर्थात् राष्ट्रपति निर्वाचित भएको दुई वर्षपछि हुने यो निर्वाचनलाई मध्यावधि निर्वाचन भनिन्छ । अमेरिकामा संसद्को बहुमत गुमाउँदैमा सरकार ढल्दैन । राष्ट्रपतिको कार्यकाल छुट्टै हुन्छ । त्यसैले यो निर्वाचनले ट्रम्पको नियमित कार्यकाल छोट्याउँदैन । उनी सन् २०२९ को जनवरीसम्मका लागि निर्वाचित भएका हुन् । सन् २०२८ को नोभेम्बरमा मात्र राष्ट्रपतिको निर्वाचन हुनेछ ।

अमेरिकाको दुवै सदनमा डेमोक्रेटिकको बहुमत

१८ कात्तिक, काठमाडौं । अमेरिकी मध्यावधि चुनावअघि मतदाताहरूमा गरिएको एक सर्भेक्षणको प्रारम्भिक नतिजा अनुसार, करिब दुई–तिहाइ मतदाताहरूले राष्ट्रपति ट्रम्पका नीतिहरूले अमेरिकी अर्थतन्त्रको स्थितिलाई अझ बिगारेको बताएका छन्। यस विपरीत, २८ प्रतिशत मतदाताहरूले ट्रम्पका नीतिहरूले आर्थिक स्थितिमा सुधार ल्याएको विश्वास गरेका छन् । आठ प्रतिशतले राष्ट्रपतिका नीतिहरूको अर्थतन्त्रमा कुनै महत्त्वपूर्ण प्रभाव नपरेको बताएका छन्।



सर्भेमा मतदाताहरूलाई उनीहरूको मतदानको एउटा कारण राष्ट्रपति ट्रम्पप्रति समर्थन वा विरोध जनाउनु थियो कि थिएन भनेर पनि सोधिएको थियो । ४३ प्रतिशत मतदाताहरूले आफ्नो मतदानको एउटा मुख्य कारण राष्ट्रपतिप्रतिको असन्तुष्टि वा विरोध व्यक्त गर्नु रहेको बताए। 



४१ प्रतिशत ले ट्रम्प उनीहरूको मतदानको निर्णयमा कुनै महत्त्वपूर्ण कारक नभएको उल्लेख गरे। केवल १६ प्रतिशत मतदाताहरूले मात्र राष्ट्रपतिप्रति समर्थन जनाउनका लागि मतदान गरेको बताए। उल्लेखित तथ्याङ्कहरू प्रारम्भिक हुन् र रातभरमा थप विवरणहरू प्राप्त हुँदै जाँदा यसमा परिवर्तन हुन सक्छ। रिपब्लिकन र डेमोक्रेटिक मतदाताहरू बीचको विस्तृत विभाजन सम्बन्धी जानकारी भने अझै उपलब्ध भइसकेको छैन। एजेन्सीहरुको सहयोगमा

ट्रम्पको आर्थिक नीतिमा अमेरिकी जनताको असन्तुष्टि :भोटर सर्भे

अमेरिकामा मध्यावधि चुनाव: अन्तिम नतिजा कहिले आउँछ र मतहरूको गणना कसरी हुन्छ?

काठमाडौँ, कात्तिक १७ गते । अमेरिकामा मङ्गलबार मध्यावधि निर्वाचन हुँदै छ । यो निर्वाचनलाई वर्तमान राष्ट्रपति डोनाल्ड ट्रम्प र उनको प्रशासनको लोकप्रियताको मापन वा परीक्षाका रूपमा हेरिएको छ । संसद्मा आफ्नो नियन्त्रण कायम राख्न सत्तारूढ रिपब्लिकन पार्टीका लागि यो निर्वाचन निकै चुनौतीपूर्ण मानिएको छ ।



निर्वाचनमा प्रतिनिधि सभा (कङ्ग्रेस) र माथिल्लो सदन (सिनेट) दुवैमा डेमोक्रेटिक रिपब्लिकन पार्टी र डेमोक्रेटिक पार्टीबिच तीव्र प्रतिस्पर्धा हुने देखिएको छ । विशेष गरी सिनेटको प्रतिस्पर्धालाई निकै रोचक मानिएको छ । यस निर्वाचनमा बढ्दो जीवनयापन खर्च (महँगी) र आर्थिक नीतिलाई मतदाताले प्रमुख मुद्दा बनाएका छन् । निर्वाचन प्रचारप्रसारका क्रममा दुवै पक्षबाट ठुलो धनराशि खर्च गरिएको छ ।



निर्वाचनको ठिकअघि अमेरिकी सङ्घीय निर्वाचन आयोगको विद्युतीय फाइलिङ प्रणालीमा ह्याकरहरूले अवरोध पु¥याएका कारण प्राविधिक सुरक्षाको विषयलाई लिएरसमेत चर्चा र सतर्कता अपनाइएको छ । यो निर्वाचनले अमेरिकाको आगामी राजनीतिक दिशा तय गर्ने भएकाले यसलाई विश्वभर चासोका साथ हेरिएको छ ।



द न्युयोर्क टाइम्स र सिएना कलेजको अन्तिम मत सर्वेक्षण अनुसार सिनेट (माथिल्लो सदन) को नियन्त्रण निर्धारण गर्ने सात वटा मुख्य राज्यहरू (मिसिगन, कान्सास, टेक्सस, मेन, ओहायो, अलास्का र आयोवा)मा डेमोक्रेटिक पार्टीका उम्मेदवार अगाडि देखाइएको छ । यो निर्वाचनलाई राष्ट्रपति ट्रम्पको दोस्रो कार्यकालको दुई वर्षमाथिको जनमत सङ्ग्रहका रूपमा हेरिएको छ । बढ्दो महँगी र आर्थिक नीतिका कारण मतदाताहरू माझ रहेको असन्तुष्टिलाई उपयोग गर्दै डेमोक्रेटहरूले कङ्ग्रेसको दौडमा अग्रता कायम गरेका छन् । हाल सिनेटमा ५३ सिटसहित रिपब्लिकनको बहुमत रहे पनि बहुमतका लागि आवश्यक पर्ने थप चार सिट जित्न डेमोक्रेटहरूले कडा मेहनत गरेका छन् ।



टेक्सासमा जेम्स तालारिकोले रिपब्लिकन केन प्याक्सटनलाई ५०–४३ प्रतिशत, कन्सासमा क्रिस ह्यामिल्टनले रोजर मार्सललाई ४९–४४ प्रतिशत र मेनमा ग्राहम प्लाटनरले सुसान कोलिन्सलाई ५१–४५ प्रतिशतले पछाडि पारेका छन् । ओहायोमा सेरोड ब्राउन र अलास्कामा मेरी पेल्टोला पनि आफ्ना रिपब्लिकन प्रतिस्पर्धीभन्दा अगाडि छन् । आयोवामा डेमोक्रेट जोस टुरेकले ४८ र रिपब्लिकन एस्ले हिन्सनले ४७ प्रतिशत समर्थन पाएका छन् । मिसिगनमा डेमोक्रेटिक उम्मेदवार अब्दुल एल–सायेद ५३ प्रतिशतसहित अगाडि छन् ।



 सर्वेक्षणले डेमोक्रेटहरूलाई सिनेटको नियन्त्रण प्राप्त गर्ने सम्भावना देखाए पनि अन्तिम नतिजा मतदाताको निर्णयमा निर्भर रहने छ । अमेरिकामा मध्यावधि निर्वाचन भनेको राष्ट्रपतिको चारबर्से कार्यकालको ठिक आधा अवधि ९दुई वर्ष० पूरा भएपछि गरिने आमनिर्वाचन हो । यस निर्वाचनमा राष्ट्रपति पदका लागि मतदान हुँदैन तर देशको संसद् र राज्यस्तरका विभिन्न महत्वपूर्ण पदहरूको फैसला हुन्छ ।

अमेरिकामा आज मध्यावधि निर्वाचन

१६ कात्तिक, काठमाडौं । रुस र युक्रेनले आ–आफ्ना आपतकालीन चेतावनी (इमरजेन्सी वार्निंग) सिस्टममा ठूलो स्तरमा साइवर आक्रमण भएको दाबी गरेका छन्। आक्रमणका क्रममा ह्याकरहरूले दुवै देशका नागरिकहरूलाई नक्कली चेतावनीहरू पठाएका थिए, जसका कारण केही समयका लागि मानिसहरूमा आतंक र भागदौडको स्थिति सिर्जना भयो। ती सन्देशहरूमा विकिरण (रेडिएसन) को खतरा र परमाणु आक्रमणजस्ता गम्भीर चेतावनीहरू दिइएको थियो।



रुसको आपतकालीन मन्त्रालयले आफ्नो आधिकारिक अलर्ट एपमा ठूलो साइवर आक्रमण भएको पुष्टि गरेको छ। मन्त्रालयका अनुसार यस आक्रमणको मुख्य उद्देश्य गलत सूचनाहरू प्रवाह गर्नु थियो। यद्यपि, मन्त्रालयले देशको मुख्य सार्वजनिक अलर्ट सिस्टम अहिले सामान्य रूपमा काम गरिरहेको र स्थिति नियन्त्रणमा रहेको स्पष्ट पारेको छ।



यता, युक्रेनको एयर रेड वार्निंग एपमा पनि यस्तै किसिमको साइवर आक्रमण भएको र नक्कली चेतावनीहरू पठाइएको घटना बाहिर आएको छ। युक्रेनको सेन्टर फर स्ट्ररेटिक कम्युनिकेसन्स ले यस साइवर आक्रमणका लागि प्रत्यक्ष रूपमा रुसलाई जिम्मेवार ठहराएको छ। यस सम्बन्धमा उक्त संस्थाले सामाजिक सञ्जाल प्लेटफर्म एक्स (पूर्व ट्विटर) मा एक आधिकारिक पोस्ट साझा गर्दै युक्रेनको एयर रेड एपमा देखिएका ती नक्कली अलर्टहरूको तस्बिरहरू पनि सार्वजनिक गरेको छ।

रुस र युक्रेनको 'इमर्जेन्सी वार्निंग सिस्टम'मा साइवर आक्रमण

१६ कात्तिक, काठमाडौं । दङ्गाकारीहरूले शनिवार अबेर मध्य फ्र्याङ्फर्टका पसलहरूमा लुटपाट गरेका छन् भने मूलतः शान्त रहेका महँगी विरुद्धका प्रदर्शनहरूपछि प्रहरी र प्रदर्शनकारीहरूबीच जर्मनीका विभिन्न सहरमा झडप भएको छ। जर्मनीको वित्तीय केन्द्र फ्र्याङ्फर्टबाहेक बर्लिन, कोलोन र ह्यामबर्गमा हिंसात्मक घटनाहरू भएका थिए। प्रहरीले आन्दोलनकारीलाई तितरबितर बनाउन अश्रुग्यास प्रहार गरेको जनाएको छ। आन्दोलनकारीहरूले भने आपत्कालीन सेवाका कर्मचारीहरूमाथि आतिशबाजी, ढुङ्गा र बोतलहरू प्रहार गरेका थिए।



 अभियान समूह जेन जी रिग्लेट (जेन जीले नेतृत्व लिनुपर्छ) ले त्यसअघि आयोजना गरेका प्रदर्शनमा हजारौँ मानिसहरू सहभागी थिए। उनीहरू विद्यालयमा बजेट घटाइएको, महँगी बढेको र सार्वजनिक खर्च कटौती र अनिवार्य सैन्य सेवाको व्यवस्थाप्रति विरोध जनाएका थिए। यसअघि यस्तै खालको प्रदर्शन फ्रान्समा पनि भएको थियो र त्यहाँ ३ लाख २० हजार भन्दा बढी मानिसहरूले शनिवार प्रदर्शन गरेको जनाइएको छ।



एएफपी समाचार संस्थाका अनुसार फ्र्याङ्कफर्टको प्रमुख सपिङ स्ट्रिटको ठूलो हिस्सा प्रहरीले बन्द गराएको थियो। एक जना प्रहरी प्रवक्ताले सहरबाट धेरै जनालाई पक्राउ गरिएको बताएका छन्। फ्र्याङफर्ट, म्युनिख र बर्लिनका अधिकारीहरूले झन्डै १८ हजार प्रदर्शनकारीहरूले विरोध कार्यक्रममा सहभागिता जनाएको आकलन गरेका छन्।



 त्यो आयोजकहरूले आफ्नो वेबसाइटमा दाबी गरेको सङ्ख्याको तुलनामा लगभग आधा हो। जेन जी रिग्लेटकी प्रवक्ता लीना फ्रिडरिकले ती प्रदर्शनहरू युद्ध वा जबरजस्ती भन्दा पनि शान्ति र स्वतन्त्रताको लागि सङ्घर्ष भएको बताइन्। उनले भनिन्, हाम्रा लागि सबैभन्दा महत्त्वपूर्ण भनेको स्वास्थ्य र शिक्षा प्रणालीमा अझ राम्रो सहयोग हो। हामी अनिवार्य सैन्य सेवाको विरोधमा छौँ। र, हामी जिम्मेवारीको बोझ न्यायपूर्ण ढङ्गले वितरण गरिनुपर्छ भन्नेमा छौँ।



दिनभरका प्रदर्शनहरू शान्तिपूर्ण भए पनि रात परेसँगै तीनले हिंसात्मक रूप लिएका थिए। फ्रयाङ्कफर्ट प्रहरीले सहरको मध्य भागमा हिंसात्मक दङ्गाहरू भइरहेको एक्समा उल्लेख गरेको थियो। कैयौँ पसलहरूका झ्यालहरू तोडफोड गरिएका छन् भने आपत्कालीन सेवा प्रदायकहरूमाथि प्रज्वलनशील तरल पदार्थ सिसाको बोतलमा राखेर तयार पारिएका घरेलु बम प्रहार गरिएको जनाइएको छ। प्रहरीले बन्दुक बिक्री गर्ने एउटा पसलको झ्याल तोडफोड गरिएको उल्लेख गर्दै एक जना सन्दिग्ध व्यक्तिलाई पक्राउ गरी दुई वटा हतियार बरामद गरेको जनाएको छ।



फ्रायङफर्ट राजधानी रहेको हेस राज्यका आन्तरिक मन्त्रीले स्पष्ट रूपमा चिनिएका झन्डै १०० अति वामपन्थी अतिवादीहरूले प्रदर्शनहरूमा घुसपैठ गरेको जनाएका छन्। उनले प्रदर्शन टुङ्गिएको शैली लज्जास्पद भएको पनि बताए। आन्तरिक मन्त्री होमान पोसेकले भने, फ्रान्समा भएका लुटपाट, घरहरूमा आगजनी, प्रहरीका सवारी साधन जलाइएका घटना र प्रहरीमाथिको आक्रमण हामी सबैको स्मृतिमा ताजै छन्। ‘यस सम्बन्धमा फ्रान्सलाई उदाहरण मानेर अनुकरण गर्नुहुँदैन। बीबीसीबाट

जर्मनीमा किन भइरहेको छ हिंसात्मक प्रदर्शन ?

नयाँदिल्ली, कात्तिक १५ गते । भारतका विपक्षी दलहरूले प्रधानमन्त्री नरेन्द्र मोदी नेतृत्वको सरकारप्रति असन्तुष्टि जनाउँदै आइतबार प्रमुख निर्वाचन आयुक्त ज्ञानेश कुमारको राजीनामाको मागसहित प्रदर्शन गरेका छन् । विपक्षी गठबन्धन ‘इन्डिया’को आह्वानमा भएको प्रदर्शनमा हजारौँ मानिस सहभागी भए । उनीहरूले विभिन्न झण्डा बोकेर बाजागाजासहित केन्द्र सरकारका नीतिविरुद्ध नाराबाजी गरेका थिए ।



सन् २०२३ मा मोदी सरकारलाई सत्ताबाट हटाउने उद्देश्यले गठन गरिएको गठबन्धनमा आबद्ध दलहरूले विभिन्न राज्यबाट आफ्ना कार्यकर्ता भेला गराएका थिए । नयाँदिल्लीमा प्रदर्शनकारीमाथि प्रहरीले बल प्रयोग गरेको केही सातापछि यो प्रदर्शन भएको हो । प्रमुख विपक्षी दल काङ्ग्रेसका नेता राहुल गान्धीको नेतृत्वमा भएको प्रदर्शनमा युवाहरूको ‘कक्रोच’ आन्दोलनले पनि समर्थन जनाएको थियो । प्रदर्शनकारीहरूले भारतीय लोकतन्त्रको रक्षा गर्न आह्वान गर्दै मतदाता नामावली पुनरावलोकनमा देखिएको विवादलाई लिएर प्रमुख निर्वाचन आयुक्त कुमारको राजीनामा माग गरेका थिए ।



गत महिना प्रहरीले नयाँदिल्लीमा प्रदर्शनका लागि तोकिएका स्थानको सूचीबाट ‘जन्तर मन्तर’ हटाएपछि प्रदर्शनकारीहरू रामलीला मैदानमा भेला भएका थिए । जन्तर मन्तर लामो समयदेखि राजधानीमा विरोध प्रदर्शनको प्रमुख स्थलका रूपमा परिचित छ । अधिकारीहरूका अनुसार प्रदर्शनस्थल र प्रदर्शन मार्गमा हजारौँ प्रहरी तथा अर्धसैनिक सुरक्षाकर्मी परिचालन गरिएको थियो । निगरानीका लागि २०० भन्दा बढी सीसीटीभी क्यामेरा, ड्रोन र सुरक्षाकर्मीले शरीरमा जडान गर्ने क्यामेरासमेत प्रयोग गरिएको थियो ।



मतदाता नामावली पुनरावलोकनका क्रममा गत वर्षयता १३ करोडभन्दा बढी नाम हटाइएको छ । आलोचकहरूले यो प्रक्रिया राजनीतिक उद्देश्यबाट प्रेरित रहेको आरोप लगाएका छन् । उनीहरूका अनुसार यसबाट लाखौँ मानिस मताधिकारबाट वञ्चित हुन सक्नेछन् भने अल्पसङ्ख्यक, विशेषगरी मुस्लिम समुदाय बढी प्रभावित हुने जोखिम छ ।



निर्वाचन आयोग र मोदी सरकारले भने यी आरोप अस्वीकार गरेका छन् । उनीहरूका अनुसार दोहोरिएका र अयोग्य मतदाताका नाम हटाउन पुनरावलोकन गरिएको हो । ‘ह्युमन राइट्स वाच’ले बिहीबार जारी गरेको विज्ञप्तिमा मतदाता नामावली पुनरावलोकनसम्बन्धी आरोपले भारतमा आगामी निर्वाचनको निष्पक्षतामाथि गम्भीर प्रश्न उठाएको जनाएको छ ।



संस्थाकी एसिया निर्देशक इलेन पियर्सनले पुनरावलोकन प्रक्रिया तत्काल रोक्न आग्रह गर्दै यसले भारतका सीमान्तकृत समुदायलाई मताधिकार र अन्य सरकारी सेवा प्राप्त गर्ने अधिकारबाट वञ्चित गरेको बताए । मोदीको हिन्दू राष्ट्रवादी दल भारतीय जनता पार्टी (भाजपा) लाई चुनौती दिइरहेका विपक्षी दल र ‘कक्रोच जनता पार्टी’का समर्थकहरूले पछिल्ला केही सातादेखि कुमारको राजीनामालाई प्रमुख माग बनाउँदै आएका छन् ।



मोदीले प्रदर्शनबारे सार्वजनिक रूपमा कुनै टिप्पणी गर्नुभएको छैन् । उहाँका दलका केही नेताले भने प्रदर्शनकारीलाई ‘अराजकतावादी’ भन्दै उनीहरूलाई विदेशी शक्तिको समर्थन रहेको आरोप लगाएका छन् । उनीहरूले आफ्नो आरोपको समर्थनमा कुनै प्रमाण प्रस्तुत गरेका छैनन् । रासस-एपी

भारतका विपक्षी दलद्वारा प्रमुख निर्वाचन आयुक्तको राजीनामा माग्दै प्रदर्शन

१५ कात्तिक, काठमाडौं । नेपाल मौसम विज्ञान विभाग मौसम पूर्वानुमान महाशाखाका अनुसार दक्षिणपश्चिम बङ्गालको खाडी तथा आसपासको मध्यमपश्चिम बङ्गालको खाडीमा चक्रवाती आँधी ‘मुरासु’ बनेको छ । महाशाखाका अनुसार मौसम मोडल तथा भू–उपग्रहबाट प्राप्त तस्बिर र तथ्याङ्कको विश्लेषणको आधारमा कात्तिक १५ गते आइतबार बिहान ११ः४५ बजे सो चक्रवाती आँधी बनेको छ ।



कात्तिक १६ गते सोमबार मध्यमपश्चिम बङ्गालको खाडीमा यो प्रणाली शक्तिशाली चक्रवाती आँधीमा परिणत हुने सम्भावना रहेको महाशाखाले जनाएको छ ।



महाशाखाका अनुसार यस प्रणाली निरन्तर पश्चिम–उत्तरपश्चिम दिशातर्फ अघि बढ्दै कात्तिक १७ गते भारतको आन्ध्र प्रदेशको दक्षिणी तटीय क्षेत्रमा नेल्लोर रर नरसापुरबिचबाट शक्तिशाली चmत्रवाती आँधीका रुपमा जमिनमा प्रवेश गर्ने सम्भावना रहेको छ । हालसम्मको विश्लेषण अनुसार उक्त मौसम प्रणालीका कारण नेपालको मौसममा उल्लेखनीय प्रभाव पर्ने सम्भावना देखिएको छैन । विभागले सो प्रणालीको निरन्तर अनुगमन गरिरहेको र आवश्यकता अनुसार थप सूचना अद्यावधिक गर्ने बताएको छ ।

बङ्गालको खाडीमा चक्रवाती आँधी ‘मुरासु’ बन्दै

१४ कात्तिक, काठमाडौं । रुसको बढ्दो हवाई आक्रमणबाट युक्रेनको रक्षा गर्न अत्यावश्यक ठानिएका ५०० वटा प्याट्रिअट क्षेप्यास्त्र बिक्री गर्न अमेरिकाले स्वीकृति दिएको छ। तर, युक्रेनी राष्ट्रपति भोलोदिमिर जेलेन्स्कीले ती क्षेप्यास्त्र युक्रेन आइपुग्न केही वर्ष लाग्न सक्ने बताएका छन्। अमेरिकी विदेश मन्त्रालयका अनुसार अत्याधुनिक पीएसी–३ इन्टरसेप्टर क्षेप्यास्त्रको मूल्य २ अर्ब १० करोड डलर पर्नेछ। त्यसको सम्पूर्ण खर्च युक्रेनको सहयोगी रहँदै आएका युरोपेली राष्ट्र र क्यानडाले बेहोर्ने पनि उक्त मन्त्रालयले जनाएको छ।



जेलेन्स्कीले अमेरिकालाई प्याट्रियट क्षेप्यास्त्र यथाशीघ्र उपलब्ध गराउन शुक्रवार पुनः आग्रह गरेका थिए। उनका अनुसार रुसका घातक बलिस्टिक क्षेप्यास्त्रलाई आकाशमै निस्तेज पार्ने एकमात्र हतियार प्याट्रिअट प्रणाली हो। यो पछिल्लो निर्णय यसै महिनाको सुरुमा जेलेन्स्की र अमेरिकी राष्ट्रपति डोनल्ड ट्रम्पबीच भएको विवादपछि आएको हो। रुसबाट डिजेल आपूर्ति सुनिश्चित गर्ने सम्झौताअन्तर्गत अमेरिकाले रुसमाथिका प्रतिबन्धहरू खुकुलो पारेपछि दुई नेताबीच मतभेद चुलिएको थियो। ट्रम्पले रुससँगको युद्ध अन्त्य गर्ने सम्झौताका लागि युक्रेनमा नयाँ नेतृत्व आउनुपर्ने समय भएको बताएका थिए।



रुसले सन् २०२२ को फेब्रुअरीमा युक्रेनमाथि पूर्ण स्तरको आक्रमण सुरु गरेको थियो। त्यसअघि नै उसले क्राइमिया र पूर्वी युक्रेनको डोनबास क्षेत्रका केही भूभाग कब्जा गरिसकेको थियो। गत अक्टोबर २० मा जेलेन्स्कीले ओस्लोमा अमेरिकी प्रतिनिधिमण्डलसँग वार्ता गरेपछि दुई पक्षबीचको तनाव केही मत्थर भएको थियो। शुक्रवार जारी वक्तव्यमा अमेरिकी विदेश मन्त्रालयले भनेको छ, ‘यो प्रस्तावित बिक्रीले युरोपको राजनीतिक र आर्थिक स्थिरताका लागि महत्त्वपूर्ण भूमिका खेल्ने साझेदार राष्ट्रको सुरक्षा सुदृढ गर्दै अमेरिकाको विदेश नीति र राष्ट्रिय सुरक्षा उद्देश्य हासिल गर्न सहयोग पुर्‍याउनेछ।’ मन्त्रालयका अनुसार युक्रेनले यो खरिदको भुक्तानी जम्पस्टार्ट कार्यक्रमअन्तर्गत क्यानडा, जर्मनी र नर्वेबाट प्राप्त सहायता रकम तथा युरोपेली सङ्घले युक्रेनलाई दिएको ऋण सहायतामार्फत गर्नेछ।



वक्तव्यमा अमेरिकी कम्पनी लकहिड मार्टिन मुख्य ठेकेदार रहने उल्लेख गर्दै भनिएको छ, यस बिक्रीमा अमेरिकी सरकारको कुनै पनि रकम संलग्न हुने छैन। जेलेन्स्कीले यसै साताको सुरुमा युक्रेनमा क्षेप्यास्त्रको मौज्दात अत्यन्तै कम भइरहेका बेला अत्यावश्यक क्षेप्यास्त्र आपूर्तिका लागि अमेरिकी स्वीकृति पाउन झन्डै एक महिना कुर्नुपरेको बताएका थिए। शुक्रवार अबेर सामाजिक सञ्जाल एक्समा पोस्ट गर्दै उनले अमेरिकी घोषणाको स्वागत गरेका छन्। सँगसँगै उनले युक्रेनलाई प्याट्रिअट क्षेप्यास्त्रको ुतत्कालु खाँचो परेकोमा जोड पनि दिएका छन्।



उनका अनुसार जाडो याम नजिकिँदै गर्दा रुसले युक्रेनका महत्त्वपूर्ण ऊर्जा पूर्वाधारमाथिको आक्रमण तीव्र बनाइरहेको छ। पछिल्लो दुई सातामा मात्रै युक्रेनको विद्युत् प्रसारण प्रणालीका ुमहत्त्वपूर्ण संरचनाहरूु माथि रुसले ३० भन्दा बढी आक्रमण गरेको उनले जानकारी दिए।



 इरानविरुद्धको युद्धमा अमेरिकाले पनि यी क्षेप्यास्त्र प्रयोग गरिरहेकाले विश्व बजारमा यसको अभाव रहेको बताइन्छ। प्याट्रिअट क्षेप्यास्त्र उत्पादनको समय तालिका कस्तो हुनेछ भन्ने अझै स्पष्ट छैन। यद्यपि, यो निर्णयमा मौज्दातमा रहेका क्षेप्यास्त्र नभई नयाँ उत्पादन गरिने क्षेप्यास्त्र समावेश रहेको बुझिएको छ। त्यसैले युक्रेनले यी क्षेप्यास्त्र तत्काल प्राप्त गर्ने सम्भावना कम देखिन्छ।



प्याट्रिअट क्षेप्यास्त्र उत्पादन गर्न लामो समय लाग्छ। अमेरिकी रक्षा मन्त्रालयका अनुसार अमेरिकाले प्रतिवर्ष करिब ६०० वटा मात्रै यस्ता क्षेप्यास्त्र उत्पादन गर्छ। जुलाईमा युक्रेनलाई प्याट्रिअट क्षेप्यास्त्र उत्पादन गर्ने अधिकार दिने प्रस्ताव गरेको तीन सातापछि ट्रम्पले वासिङ्टनले त्यसका लागि सहमति नदिएको बताएका थिए।



बीबीसीबाट

युक्रेनलाई ५०० वटा प्याट्रिअट क्षेप्यास्त्र बेच्न अमेरिकाको स्वीकृति

१३ कात्तिक, काठमाडौं । पाकिस्तानको दक्षिणी सिन्ध प्रान्तमा बुधबार राति एम्बुलेन्सभित्र अक्सिजन सिलिन्डर विस्फोट हुँदा आठ जनाको मृत्यु भएको छ भने अन्य चार जना घाइते भएका छन् । प्रहरीका अनुसार थारपारकर जिल्लाको नगरपारकर सहरस्थित स्वास्थ्य केन्द्रमा पार्क गरिएको एम्बुलेन्समा विस्फोट भएको हो ।



घाइतेहरूलाई प्रारम्भिक उपचारपछि थप उपचारका लागि कराची सारिएको छ । मृत्यु भएकाहरूको शव पहिचानका लागि स्थानीय अस्पतालमा राखिएको अधिकारीहरूले बताएका छन् । विस्फोटको कारण पत्ता लगाउन मिरपुरखास र कराचीबाट विशेषज्ञ टोली बोलाइएको प्रहरीले जनाएको छ । टोलीले घटनास्थलका प्रमाणको जाँच गरी विस्फोटको कारणबारे अनुसन्धान गर्नेछ ।



सिन्ह्वा

पाकिस्तानमा एम्बुलेन्सभित्र सिलिन्डर विस्फोट, कम्तिमा आठको मृत्यु

१२ कात्तिक, काठमाडौं । बंगालको खाडीमा विकसित भएको भीषण साइक्लोन अर्नबका कारण भारतको आंध्र प्रदेश राज्यमा ठूलो जनधनको क्षति भएको छ। आँधीका कारण हालसम्म ५ जनाको ज्यान गएको आंध्र प्रदेशका मुख्यमन्त्री एन. चन्द्रबाबु नायडूले पुष्टि गरेका छन्। मंगलबार मध्यरातपछि बुधबार बिहान सबेरै तटमा ठोक्किएको यो चक्रवातका कारण आंध्र प्रदेशसहित ओडिशा र तेलंगानाका धेरै भागहरूमा भारी वर्षा भइरहेको छ।



आँधी र त्यससँगै आएको विपद्का कारण आंध्र प्रदेशमा पाँच जनाको मृत्यु भएको छ भने राज्य सरकारले क्षतिको प्रारम्भिक आकलन गरिरहेको छ। भारतीय मौसम विज्ञान विभागका अनुसार साइक्लोन अर्नब हाल कमजोर हुँदै गएर निम्न दबाब क्षेत्रमा परिणत भएको छ। पछिल्लो ६ घण्टामा यो उत्तरतर्फ करिब १५ किलोमिटर प्रतिघण्टाको गतिमा अघि बढेको छ।



आंध्र प्रदेशको उत्तरी भागका जिल्लाहरूका साथै काकीनाडा, कोनासीमा र पूर्वी गोदावरी जिल्लामा सबैभन्दा बढी वर्षा र प्रभाव देखिएको छ। आँधीका कारण कोनासीमा जिल्लामा मात्रै करिब ६,००० वटा विद्युतका खम्भा ढलेका छन्। काकीनाडा र उत्तरी आंध्रका अन्य जिल्लाहरूमा पनि सयौं खम्भाहरू उखेसिएका छन्।



तटीय क्षेत्रका कैयौं गाउँ तथा सहरहरूमा विद्युतका तारहरू चुँडिएका कारण व्यापक रूपमा विद्युत आपूर्ति ठप्प भएको छ। विद्युत सेवा पुनः सञ्चालनका लागि छिमेकी राज्य तेलंगानाबाट समेत सहयोग माग गरिएको छ। आंध्र प्रदेश आपदा व्यवस्थापन प्राधिकरणका प्रमुख निर्देशक प्रखर जैनले भारी वर्षा जारी रहेकोले नागरिकहरूलाई अनावश्यक रूपमा घर बाहिर ननिस्कन कडा आग्रह गरेका छन्। प्रशासनले प्रभावित क्षेत्रहरूमा उद्धार र राहत कार्यलाई तीव्र पारेको छ भने जनजीवन सामान्य बनाउनका लागि क्षतिग्रस्त संरचनाहरूको मर्मत कार्य सुरु गरिएको छ।

विश्व

Vishwa Sandesh Newspaper Inc.

Address

USA:

Nepal:

Contact Information

Email:

Phone: