न्युयोर्क      

संसार यति साँघुरो भै सक्यो कि अब मानिसको हेर्ने घुम्ने ठाउँ पनि सकिन लागि सक्यो जस्तो भान हुन थालेको छ । के गर्दा, कसो गर्दा, धेरै भन्दा धेरै मनोरन्जन लिन सकिन्छ वा मनोरन्जन प्रदान गर्न सकिन्छ ? भन्ने होडबाजी चलेको छ – विश्वमा ।  चलचित्र निर्माता र निर्देशक बीच नौला नौला ठाउँ देखाएर दर्शकलाई आकर्षित पार्ने होडबाजी बढेको छ । यस्तै होडबाजी बीच चलचित्र निर्माणको सम्बन्धमा नयाँ समाचार सार्वजनिक भएको छ । फिल्म क्षेत्रका चर्चित ब्यक्तित्व टम क्रुज यतिबेला पृथ्वीको कुनै एउटा सुन्दर स्थानमा चलचित्र निर्माण गर्दै छैनन् । उनी चलचित्र छायाँकनको लागि पृथ्वी छाडेर अन्तरिक्षमा जाने तयारीमा छन् ।अभिनेता तथा निर्माता क्रुज फिल्म निर्माणको क्रममा अन्तरिक्ष जाने तयारीमा रहेको नासाले पुष्टि गरेको छ ।  

अन्तरराष्ट्रिय अन्तरिक्ष केन्द्रमा फिल्म निर्माणको लागि अन्तरिक्ष एजेन्सीले अभिनेता टम क्रुजसँग काम गरिरहेको नासा प्रमुखले मंगलवार बताएका हुन् । चलचित्र छायाँनकनको लागि अन्तरिक्ष केन्द्रमा रहेको अरबौं डलरको प्रयोगशालामा बसेर अभिनेता क्रुजले पृथ्वीबाट २५० माईल्स माथि घुमेर चलचित्र बनाउने कुरा नासाका प्रबक्ताले सि एन एनलाई बताएको जनाईएको छ । यस अगाडि अन्तरिक्ष केन्द्र वरिपरीको अन्तरिक्षमा सन् २००२ मा म्याक्स डकुमेन्ट्री “स्पेस स्टेसन थ्री डि” र संन २०१२ मा “अपोजी अफ फियर” दुई डकुमेन्ट्रीको छायाँनकन भएको थियो भने बिशेष कथामा आधारित यो चलचित्र भने अन्तरिक्षमा छायाँङ्कन हुने पहिलो कथानक चलचित्र हुने छ ।  

अन्तरिक्षमा चलचित्र छायाँङ्कनको बिषयमा मे ५ तारिख मंगलवार नासाका प्रशासक जिम ब्रिडेन्स्टिनले ट्विटमा लेखेका छँन् – टम क्रुजसँग काम गर्न नासा उत्साहित भएको छ ।  अहिले हामीलाई त्यस्तो चर्चित संचार माध्यमको आवश्यकता परेको छ जस्ले नासाको महत्वाकाँक्षी योजनालाई साकार बनाउन मद्दत गर्ने नयाँ पुस्ताका ईन्जिनियर र बैज्ञानिकहरुलाई प्रोत्साहन गरोस् ।