न्युयोर्क

न्युयोर्क राज्यको म्यानहाटनस्थित टाईम्स स्क्वायरको भवनको टुप्पोमा एउटा नयाँ बिलबोर्ड जडान गरिएको छ, जुन बिलबोर्डमा डिजिटल अक्षरमा अमेरिकामा कोरोना संक्रमणको कारण मृत्‍यु भएकाहरुको अद्यावधिक संख्या देखाउँछ । अचम्म लाग्दो कुरा त यो छ कि; संसारकै चर्चित पर्यटकीय गन्तब्यको गगनचुम्बी भवनको टुप्पोमा कोरोनाको कारण मृत्‍युहुनेहरुको अद्यावधिक संख्या देखाउने डिजिटल बोर्डलाई देश कै राष्ट्रपतिको नाम राखेर ‘ट्रम्प  डेथ क्लक’ नाम दिईएको छ । फिल्म निर्माता युजिन जरेकीले डिजाईन गरेको उक्त डिजिटल बोर्डलाई ‘ट्रम्प डेथ क्लक’ नाम राख्नुको कारण उनले भनेका छन्; यदि राष्ट्रपति डोनाल्ड ट्रम्पले समयमा नै कोरोनालाई सही तरिकाले सकारात्मक सम्बोधन गरेको भए अमेरिकामा यति धेरै मानिसको मृत्‍यु हुने थिएन । ५६ फिट लम्बाईको बिलबोर्डमा अमेरिकामा मृत्‍यु हुनेको संख्याको साथमा ट्रम्प प्रशासनको फितलो ब्यबस्थापनको कारणले मृत्‍यु हुनेहरुको अनुमानित संख्या समेत देखाउने गरेको छ । उक्त घडीले अमेरिकामा मंगलवार ८० हजार ६ सय ८४ को मृत्‍यु हुँदा ‘ट्रम्प डेथ क्लक’ मा ४८ हजार ६ सय ६८ को मृतकको संख्या देखाएको थियो । 

शुक्रबार जडान गरिएको उक्त घडीको परिकल्पनाकार जरेकीका अनुसार यदि राष्ट्रपति ट्रम्पले समय मै कोरोनालाई सम्बोधन गरेको भए मार्च १६ मा बन्द गर्ने बिद्यालय र मार्च १६ देखि लागू गरिएको सामाजिक दुरीको नियम ९ तारिखदेखि गरिएको भए यति धेरै क्षति हुने थिएन ।  उनको अनुसार हाल अमेरिकामा ६० प्रतिशत थप मानिसको मृत्‍यु राष्ट्रपतिको गैह्र जिम्मेबारीको कारण भएको छ । जरेकी सण्डेन्स फिल्म फेस्टिबलमा दुई पटक अवार्ड बिजेता हुन् ।