काठमाडौं । नेपाल एयरलाइन्सको इतिहासमा आज एकै गन्तब्यमा एकै पटक सर्वाधिक यात्रुसहित उडान भएको छ । नेपाल एयरलाइन्सका अपरेशन विभाग प्रमुख दीपु ज्वार्चनका अनुसार नेपाल एयरलाइन्सले आज हङकङका लागि तीन वटा जहाज उडाएको छ । सोमबार साँझ एक एक घण्टाको फरकमा यी उडान भएका हुन् । यी जहाजले नेपालमा रहेका हङकङ आइडी होल्डर यात्रु बोकेका छन् ।

करीव ६ सय यात्रु नेपालबाट हङकङतर्फ लागेका हुन् । लामो लकडाउनका कारण नेपालमा रोकिएका हङकङको आइडी होल्डर नेपालीहरु यी उडानबाट फिर्ता भएका हुन् । नेपाल एयरलाइन्सले हङकङमा नियमित उडान गर्छ । तर, अहिले भने नेपालमा अन्तर्राष्ट्रिय व्यवसायिक उडानमाथि प्रतिवन्ध लागेका कारण १४ सय भन्दा बढी हङकङ आडी होल्डर नेपाली नेपालमै अड्किएका छन् ।

उनीहरुलाई ट्राभक कम्पनीमार्फत आफ्नै खर्चमा टिकट काटी हङकङ फर्काउने व्यवस्था मिलाइएको हो । यसक्रममा टिकट दर भने झण्डै दोब्बर परेको छ । नेपाल एयरलाइन्सले दुई वटा न्यारोबडी र एउटा वाइडबडी जहाज एकै पटक उडाएको हो ।