न्युयोर्क

अमेरिकाको मिनियापोलिसमा गत मई २५,२०२० का दिन प्रहरी कस्टडीमा जर्ज फ्लोएडको मृत्‍यु भएपछि अमेरिकाभर फैलिएको रंगभेद बिरुद्धको आन्दोलनमा न्युयोर्कस्थित जिपी फाउन्डेसनले पनि एैक्यबद्दता जाहेर गर्दै प्रदर्शनमा सहभागी भएको छ । सुरुमा हिंसात्मकरुप लिएको आन्दोलन बुधबारदेखि भने देशभर शान्तिपूर्ण प्रदर्शन भै रहेका छन् । नेपाली प्रजातन्त्रको हरेक आन्दोलनका अगुवा गिरिजा प्रसाद कोईरालाको नाममा अमेरिकामा सकृय फाउन्डेसनले अमेरिकामा बढ्दै गएको रंगभेदले तेश्रो विश्वका नेपालीलाई पनि पोलिरहेको छ, भन्दै प्रदर्शनमा सहभागी भएको फाउन्डेसनले जनाएको छ ।  

न्युयोर्क राज्यका आप्रबासी नेता तथा सेनेटर जोन सि. लियुको अगुवाईमा “हामी सास फेरौं” भन्ने नाराका साथ प्रहरी प्रशासनमा सुधारको माग गर्दै आयोजित शान्ति र्यालीमा एक्यबद्वता जनाउँदै फाउण्डेशन पनि प्रदर्शनमा सहभागी भएको हो । प्रदर्शनमा संस्थाका अध्यक्ष सोमनाथ घिमिरे, उपाध्यक्ष सुवर्ण लामा, केन्द्रीय सदस्य एवं समुदाय सम्बन्ध निर्देशक छिरिङ राप्के लामा, केन्द्रीय सदस्य सुर्य सिम्खडा लगायत फाउन्डेसनसँग आबद्धहरुको सहभागिता रहेको थियो ।  

रंगभेद बिरुद्धको प्रदर्शनमा सहभागिता जनाएको प्रसँगमा अध्यक्ष सोम नाथ घिमिरे भन्छन् ‘मिनियानापोलिसमा भएको जर्ज फ्लोडको मृत्युबाट अत्यन्तै दु:ख लागेको छ । एक्काईसौं शताब्दीमा पनि अमेरिका जस्तो बैभबशालि देशमा रंगभेद अन्त्य गर्न नसक्नु दुःखद कुरा हो ।जबसम्म हाम्रो सोचमा परिवर्तन आउँदैन, समस्याको समाधान निकै गाह्रो छ’।  

फाउन्डेसनले अमेरिकास्थित मुलधारमा सकृय सहभगिता देखाउँदै आएको छ भने कोरोना महामारीमा ठुलो परिमाणमा न्युयोर्क क्षेत्रमा खाध्य सामग्री बितरण गर्दै आएको छ ।