काठमाडौं । सरकारले लकडाउन केही खुकुलो बनाएको छ । लकडाउनको मोडालिटीमा परिवर्तन गर्दै बजार पसल खोल्न दिने निर्णय गरेको हो । यसबारे विस्तृत जानकारी भने आज पत्रकार सम्मेलन मार्फत अर्थमन्त्री तथा सूचना प्रविधि मन्त्री डा. युवराज खतिवडाले गराउने छन् ।

बुधबार बसेको मन्त्रिपरिषद् बैठकले लकडाउनको मोडालिटी परिवर्तन गर्ने निर्णय गरेको छ । यस बीचमा स्वास्थ्य सुरक्षासम्बन्धी मापदण्ड पुरा गरी कृषि, उद्योग, ब्यापार र आंशिक रुपमा यातायात समेत खुकुलो बनाउने निर्णय भएको छ ।

काठमाडौं उपत्यकासहित जोखिम कम भएका क्षेत्रहरूमा जोर विजोर प्रणालीबाट निजी सवारी साधन संचलनमा ल्याउन दिने तयारी छ । विद्यालय, सिनेमा हल, खेल मैदान भने तत्काल खुल्ने छैनन ।

रेष्टुरेन्टले प्याकिंग गरेर खाना सप्लाई गर्न सक्नेछन् । नेपालमा ११ चैतयता लकडाउन जारी रहेको छ । पछिल्लो समय ३२ जेठसम्म लकडाउन कायम छ । सरकारले त्यसअगाडी नै बजार पसल भने खुलाउने भएको छ । लकडाउनको मोडालिटीमा भएको परिवर्तन आज सार्वजनिक गनेए तयारी रहेको छ ।