काठमाडौं । कुवेतबाट बिहीबार ५ सय ३१ जना नेपाली महिला श्रमिक काठमाडौं ओर्लिए । सरकारले उद्दारको सूचिमा प्राथमिकतामा रहेका उनीहरुलाई घर फर्कने वातावरण बनाइदिएको हो । उनीहरुलाई कुवेत सरकारले नै घर फर्काएको हो । जहाज भाडा समेत कुवेत सरकारले बेहोरेका कारण नेपाल सरकारको खर्च लागेन ।

विहीबार जजिरा एयरवेजको दुई वटा उडानबाट नेपाली महिला श्रमिकलाई घर फर्काइएको हो । यस टोलीमा रहेकामध्ये थप १५० जना भने शुक्रबार काठमाडौं आउने विमानस्थल स्रोतले जानकारी दिएको छ । विमानस्थलमा विदेशबाट आउने नागरिकको व्यवस्थापन नेपाली सेनाले गरिरहेको छ । बिहीबार ल्याइएका ५३१ जनामध्ये दुई जना गर्भवती महिला समेत बताइएको छ ।

उनीहरुलाई एकरात होल्डिंग सेन्टरमा राखिएको छ । अब सम्बन्धित प्रदेशमा पठाइने छ । प्रदेशमा जान नसक्ने ४९ जना भने छहारी होममा छन् ।

१० जना होटेलमा बस्ने भएका छन् । विदेशबाट फर्कने सबै १४ दिनको क्वारेन्टिनमा बस्नुपर्छ । कुवेतमा आम माफी पाएका, जागिर छाडेर अलपत्र परेका, भिसा सकिएर गैरकानूनी बनेका नेपाली श्रमिक महिलाई प्राथमिकताका आधारमा घर फर्काइएको हो ।