काठमाडौं । नेपालले सीमा क्षेत्रमा कडा लकडाउन जारी राखेपछि नेपाल भारत सीमा क्षेत्रमा तनाव बढ्दो छ । यसै क्रममा शुक्रबार सर्लाहीको नारायणपुर नाकामा भारतीय नागरिकको एक समुह र नेपालको सशस्त्र प्रहरीबीच तनाव भएको छ । भारतीय नागरिक जबरजस्ती नेपाल प्रवेश गर्न खोजेपछि प्रहरीसँग झडप भएको हो ।

भारतीय नागरिकहरु बल प्रयोग गरेर नेपाल भित्र छिर्न खोजेका थिए । उनीहरुले सशस्त्रको हतियार नै खोस्ने प्रयास गरेपछि प्रहरीले गोली चलाएको बताएको छ । झडपमा एक जनालाई गोली लागेको र उनलाई उपचारका लागि भारत नै लगिएको बताइएको छ ।

भारतीय संचारमाध्यममा उनको मृत्यु भएको प्रसारण भएको छ । नेपालमा भने प्रहरीले यसको पुष्टी गरेको छैन । झडपका क्रममा तीन जना प्रहरीसमेत घाइते भएको प्रहरी बलले जनाएको छ ।

भारतीय नागरिक नारायणपुर नाका हुँदै शुक्रबार बिहान जबरजस्ती नेपाल आउने खाजेको थिए । शुरुमा सानो समूह छिर्न खोजेको र उनीहरुलाई प्रहरीले रोकेपछि ठूलो समुह आई प्रहरीसँग लफडा गर्न थालेको थियो ।

झडपमा सशस्त्र प्रहरीले चलाएको गोली लागि भारतको प्रिपा प्रसाइन जानकीनगरका २७ वर्षीय विकेश कुमार घाइते भएका थिए । झडपमा घाइते सशस्त्र प्रहरीको जिल्ला अस्पताल मलङ्गवामा उपचार भइरहेको छ ।

झडपमा भारतीयले खोसेका हतियार समेत फिर्ता भइसकेको प्रहरीले जनाएको छ । सर्लाहीको सर्लाहीको विष्णु गाउँपालिकास्थित पकडी नाकामा पनि यसअघि भारतीयसँग झडप भएको थियो । अहिले भन स्थिति सामान्य रहेको र सीमा क्षेत्रमा प्रहरी बल बढाइएको सशस्त्र प्रहरीले जनाएको छ ।