काठमाडौं । विदेशमा रहेका नेपालीको उद्दार गर्ने सिलसिलामा आज अष्ट्रेलियाबाट पहिलो चरणमा नेपालीहरु घर फर्कने भएका छन् । त्यसका लागि नेपाल एयरलाइन्सको जहाज अष्ट्रेलियाको सिड्नी पुगिसकेको छ । नेपाल एयरलाइन्सको वाइडबडी जहाज अन्नपूर्णले २५९ जना नेपालीलाई बोकर काठमाडौं आउनेछ ।

उनीहरु अधिकांश छोराछोरी भेट्न पुगी उतै अलपत्र परेका नागरिक रहेको बताइएको छ । यस उडानमा न्यूजिल्याण्डबाट समेत ११ जना नेपाली मिसिएका छन् । उनीहरु बिहान न्यूजिल्याण्डबाट अष्ट्रेलिया आइपुगेका छन् । अष्ट्रलियाबाट नेपाल फर्किन इच्छुक नेपालीको संख्या १३ सय रहेको छ ।

पहिलो चरणमा २५९ जनालाई काठमाडौं पठाउन लागिएको छ । यस गन्तब्यबाट प्रतियात्रु २ हजार ३ सय ५० अष्ट्रेलियन डलरमा उडान भएको हो । सबै यात्रुको पीसीआर परीक्षण गरिएको र नतिजा नेगेटिभ आएको बताइएको छ ।

यो जहाज सिड्नी आउने क्रममा भने २९ जना अष्ट्रेलियन नागरिक तथा अष्ट्रेलियन स्थायी बासिन्दालाई लगेर गएको थियो । अष्ट्रेलियाबाट दोस्रो उद्दार उडान भने २७ जुनमा मेलबर्नबाट तोकिएको नेपाली दूतावासले जनाएको छ ।