न्युयोर्क

राष्ट्रपति डोनाल्ड ट्रम्पले कोरोना महामारीका कारण अमेरिकी अर्थतन्त्र लगातार लर्बराए पछि दोश्रो पटक पनि ‘स्टिमुलस पेमेन्ट’ बितरण गरिने संकेत गरेका छन् । ट्रम्पले सोमबार एक टेलिभिजन अन्तर्वातामा अर्को पटक पनि स्टिमुलस पेमेन्ट पठाउने बारेमा भनेका हुन् । अन्तर्वार्ताकारले कोरोना महामारी पछि फ्लोरिडा, ओहायो, विस्कन्सिन, मिचिगन राज्यहरु आर्थिकरुपमा संघर्ष गरी रहेको र पहिलो चरणमा पठाएको रकम खर्च भै सकेको हुँदा पुन: दोश्रो चरणमा पनि स्टिमुलस पेमेन्ट निकासा गर्ने योजना छ ? भन्ने प्रश्नमा ट्रम्पले भने; “हो ! हामी पठाउँछौं पठाउँछौं । हामी अर्को पटक पनी पठाउँछौ । यो धेरै नै राम्रो हुने छ । यो निकै उदारको काम हुने छ” ।

कति रकमको स्टिमुलस प्याकेज हुनेछ ? भन्ने प्रश्नमा उनले भनें; “तिमीहरुलाई थाहा हुन्छ यस्को बारेमा । तिमीहरुलाई थाहा हुन्छ” । राष्ट्रपति ट्रम्पले दोश्रो चरणको राहत रकम डेमोक्र्याट र रिपब्लिकनको दुई पक्षीय सहमतीको आधारमा केही हप्ता भित्रै पठाईने बताएका छन् । एनबिसि न्युजले ह्वाईट हाऊस अधिकारीको हवाला दिदैं यो बिषयमा ह्वाईट हाऊसस्थित आर्थिक टिमले अध्ययन गरी रहेको तर हालसम्म केही निर्णय नभएको जनाएको छ ।  

गत मार्चमा डेमोक्र्याट नियन्त्रित हाऊसले वार्षिक १ लाख भन्दा कम आर्जन गर्नेलाई  प्रति ब्यक्ति १२ सय डलर राहत रकम कोरोनाको महामारीमा राहत स्वरुप पास गरेको थियो । जुन महिनासम्म पहिलो चरणको त्यो राहत रकम १६ करोड अमेरिकाबासीलाई पठाई सकिएको आईआरएसले जनाएको छ । पहिलो चरणको राहत प्याकेज डेमोक्र्याट नियन्त्रित हाऊस र रिपब्लिकन नियन्त्रित सिनेट एकै भएर पास गरेपनि गत महिना डेमोक्र्याट नियन्त्रित हाऊसले पुन: दोश्रो चरणको कोरोना महामारी राहतको लागि ३ खरब अमेरिकी डलरको ‘हिरोज एक्याक्ट’ पास गरेर रिपब्लिकन नियन्त्रित सिनेटमा पठाए पनि सिनेटले उक्त प्रस्ताबको प्रतिरोध गर्दै केही समय हेर्नु पर्ने भन्दै रोकेको थियो ।