काठमाडौं । विश्‍व नम्बर एक साविर्याका टेनिस स्टार नोभाक जोकोभिच र उनकी पत्नी जेलेनामा कोरोना संक्रमण भएको छ । यो अहिलेसम्मकै स्टार खेलाडीमाथि कोरोनाको आक्रमण हो ।

जोकोभिचको अगुवाईमा सम्पन्न एड्रिया टूर टेनिस प्रतियोगितामा भाग लिएका अन्य दुई खेलाडीमा कोरोना देखिएपछि जोकोभिचले परिक्षण गरेको अन्तर्राष्ट्रिय संचारमाध्यमले जनाएका छन् । उक्त परीक्षणबाट दम्पत्तिमा कोरोना पुष्टी भएको हो ।

जोकोभिचले ट्विटर ह्याडिलबाट यसको पुष्टी गरेका हुन् । आफ्नी पत्नीमा समेत परीक्षण नतिजा पोजेटिभ आएको उनको स्वीकारोक्ती छ । जोकोभिचका सन्तानमा भने कोरोना नदेखिएको बताइएको छ ।

प्रतियोगितामा भाग लिएका कुल तीन जना खेलाडीमाथि कोरोनाको संक्रमण देखिएको हो । प्रतियोगितापछि खेलाडी र टीमका सदस्यले पार्टी मनाएको र त्यसपछि कोरोना पुष्टी भएपछि जोकोभिचको आलोचना समेत भइरहेको छ । जोकोभिचले प्रतियोगिता सकारात्मक कामका लागि आयोजना भएपनि अवस्था प्रतिकुल बनेको बताएका छन् ।