न्युयोर्क

अमेरिकाको टेक्सस राज्यको एक परिवारमा आयोजित ‘बर्थ डे’ पार्टी पछि एकै परिवारका १८ जना नातेदार कोरोना संक्रमित भएका छन्  । पार्टी गत महिना उत्तरी टेक्ससको क्यारेल्टिनस्थित एक घरमा आयोजना गरिएको थियो । पार्टीमा सहभागी भएका एक बृद्ध दम्पत्ती र एक महिला जो ब्रेस्ट क्यान्सरसँग लडिरहेकी थिईन ती तीन जना अहिले अस्पतालमा कोरोनासँग संघर्ष गरी रहेको डेली न्युजले लेखेको छ । रोन बार्बोसा नामका उक्त परिवारका सदश्य जो ‘बर्थ डे’ पार्टीमा सहभागी भएका थिएनन्, उनले स्थानीय डब्लुएफएए -टिभीलाई भनेका छन्; “हाम्रो नराम्रो दिन मेई ३० तारिख सुरु भयो” ।

बार्बोसाको ३० बर्षीय बुहारीको तिसौं जन्मदिन उनको भान्जाले आयोजना गरेका थिए । बार्बोसाको भान्जा त्यही बर्थ डे पार्टीमा थाहै नपाई संक्रमित भए र उनले परिवारको ७ जनालाई सरेको बताए । ती सात जनाले परिवारको अन्य १० जनालाई कोरोना संक्रमित बनाए । बार्बोसा भन्छन्; ‘पार्टी त्यति लामो समयको लागि पनि थिएन । छोटो समयको पार्टीले पनि परिवारको १८ जना संक्रमित हुन पुगे’ । बार्बोसा आफु पेशाले ईएमटी (ईमर्जेन्सी मेडिकल टेक्निसियन) हुन् । उनकी चिकित्सक पत्नी सहित दुबै जना भाईरस संक्रमणको डरले बुहारीको जन्मदिन मनाउन गएका थिएनन् । अहिले बार्बोसाको ८० बर्ष कटेका माता पिता अस्पतालमा छन् भने क्यान्सरसँग लडिरहेकी उनकी बहिनी पनि अस्पताल मै छिन् ।